ପାତ୍ରପୁର : ପାତ୍ରପୁର ବ୍ଲକ ପଦାଦିଗି ପଂଚାୟତ ନୂଆଁପେଣ୍ଠ ଗ୍ରାମରେ ନାଟକ ଦେଖୁଥିବା ବେଳେ ବିଦ୍ୟୁତ ସଂସ୍ପର୍ଶରେ ଆସି ୫ ଜଣ ଛାତ୍ର ଆହତ ହୋଇଥିବା ଜଣାପଡିଛି । ସମସ୍ତ ଆହତମାନଙ୍କୁ ୧୦୮ଯୋଗେ ପାତ୍ରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଛି । ଆହତମାନେ ହେଲେ ଶ୍ରୀତମ ପାଣିଗ୍ରାହୀ(୧୦), ଆଶିଷ ପାଣିଗ୍ରାହୀ(୧୮), ଶୁଭମ ପାଣିଗ୍ରାହୀ(୧୮), ଦେବରାଜ ସାବତ(୯) ଏବଂ ସତ୍ୟସାଇ ଚୌଧୁରୀ(୧୧) । ସୂଚନା ଅନୁସାରେ ନୂଆପେଣ୍ଠ ବିଦ୍ୟାଳୟ ନିକଟରେ ଗଣେଷ ପୂଜା ପାଇଁ ଗତ ରାତିଠାରୁ ମହାଭାରତ ନାଟକ ପରିବେଷଣ ହେଉଥିଲା । ଏହି ସମୟରେ ଯାତ୍ରା ପେଣ୍ଡାଲ ଉପର ଦେଇ ଯାଇଥିବା ଏକ ବିଦ୍ୟୁତ ତାର କୌଣସି କାରଣରୁ ଛିଣ୍ଡି ପଡ଼ି ପେଣ୍ଡାଲର ଲୁହାଗ୍ରୀଲ ଉପରେ ପଡି ଯାଇଥିଲା । ତଳେ ନାଟକ ଦେଖୁଥିବା ଜଣେ ପିଲା ଏହି ଲୁହାକୁ ଲାଗି ଯିବା ଫଳରେ ବିଦ୍ୟୁତ ସଂସ୍ପର୍ଶରେ ଆସିଯାଇଥିଲା । ଏହାପରେ ଅନ୍ୟ ପିଲାମାନେ ମଧ୍ୟ ବିଦ୍ୟୁତ ସଂସ୍ପର୍ଶରେ ଆସିଥିଲେ । ତେବେ ପ୍ରାଥମିକ ଚିକିତ୍ସାପରେ ସବୁ ପିଲା ସୁସ୍ଥ ହୋଇ ଘରକୁ ଫେରିଥିବା ସୂଚନା ମିଳିଛି ।