ବଲାଙ୍ଗିର, (ଦେବାଶିଷ ମିଶ୍ର) : ଯୁବକର ରକ୍ତାକ୍ତ ମୃତଦେହ ଠାବ ଘଟଣାରେ ହତ୍ୟା ଅଭିଯୋଗ ଆଣିଲେ ପରିବାର ଲୋକେ । ସୂଚନା ଅନୁସାରେ ସ୍ଥାନୀୟ ହାତୀଶାଲପଡା ସ୍ଥିତ ଫରେଷ୍ଟ କଲୋନୀଠାରେ ଆଜି ସକାଳୁ ଏକ ରକ୍ତାକ୍ତ ମୃତ ଶରୀର ଠାବ ହୋଇଛି । ମୃତକ ଜଣକଙ୍କ ନାମ ଅଭିମନ୍ୟୁ ହାତୀ ଓ ସେ ଠିକାଦାରପଡା ବାସିନ୍ଦା ବୋଲି ଜଣାପଡିଛି । ଖବର ପାଇ ପୋଲିସ ଘଟଣା ସ୍ଥଳକୁ ପହଞ୍ଚି ମୃତଦେହକୁ ଜବତ କରି ଶବ ବ୍ୟବଚ୍ଛେଦ ପାଇଁ ଡାକ୍ତରଖାନକୁ ପଠାଇଛି । ତେବେ କେହି ଅଭିମନ୍ୟୁଙ୍କୁ ହତ୍ୟା କରିଛନ୍ତି ବୋଲି ପରିବାର ବର୍ଗ ଅଭିଯୋଗ କରିଛନ୍ତି । ମା’ ସୁଶାନ୍ତି ଓ ପୁଅ ଅଭିମନ୍ୟୁ ଦୁଇ ପ୍ରାଣୀ କୁଟୁମ୍ବ । ମା’ ଏକ ଛୋଟ ହୋଟେଲରେ କାମ କରୁଥିବା ବେଳେ ପୁଅ ଅଭିମନ୍ୟୁ ଘର କଲର କାମ କରନ୍ତି । ଗୁରୁବାର ସଂନ୍ଧ୍ୟା ପ୍ରାୟ ୭ଟା ସମୟରେ ଜଣେ ବନ୍ଧୁଙ୍କୁ ଦେଖା କରିବାକୁ ବୁର୍ଲା ଯିବି ବୋଲି ମା’ଙ୍କ ଠାରୁ ୭ ଶହ ଟଙ୍କା ନେଇ ଘରୁ ବାହାରି ଥିଲେ । ଆଜି ସକାଳୁ ୮ଟାରେ ସ୍ଥାନୀୟ ଫରେଷ୍ଟ କଲୋନୀ ନାଳରେ ତାଙ୍କ ମୃତଦେହ ଦେଖି ଲୋକେ ଖବର ଦେଇଥିଲେ । ମୋ’ ପୁଅ ବେଳେ ବେଳେ ନିଶା କରେ । ଗତ ସଂନ୍ଧ୍ୟାରେ କିଛି ଯୁବକ ତାକୁ ଘରୁ ଡାକି ଆଣିଥିଲେ । ସେମାନେ ହିଁ ତାଙ୍କୁ ହତ୍ୟା କରିଛନ୍ତି ବୋଲି ମା’ ସୁଶାନ୍ତି ହାତୀ ଅଭିଯୋଗ କରିଛନ୍ତି । ସକାଳୁ ଖବର ପାଇ ପୋଲିସର ସାଇଣ୍ଟିଫିକ ଟିମ୍ ଓ ଡଗ୍ ସ୍କ୍ୱାର୍ଡ ଘଟଣା ସ୍ଥଳକୁ ପହଞ୍ଚି ଛାନ୍ ଭିନ୍ କରିଛନ୍ତି । ମୃତକଙ୍କ ଶରୀରରେ କୌଣସି ଧାରୁଆ ଅସ୍ତ୍ର ଦ୍ୱାରା କ୍ଷତ ଚିହ୍ନ ନଥିବା ବେଳେ ପ୍ରାଥମିକ ତଦନ୍ତରୁ ଛାତ ଉପରୁ ପଡି ଯୁବକଙ୍କ ମୃତ୍ୟୁ ହୋଇଥାଇ ପାରେ, ଶବ ବ୍ୟବଚ୍ଛେଦର ରିପୋର୍ଟ ଆସିଲେ ସମସ୍ତ ତଥ୍ୟ ସାମ୍ନାକୁ ଆସିବ ବୋଲି ପୋଲିସ କହିଛି । ତେବେ ପୋଲିସ ଅନ୍ୟ ଦିଗରେ ମଧ୍ୟ ତଦନ୍ତ ଜାରି ରଖିଥିବା ସୂଚନା ମିଳିଛି ।