ଢେଙ୍କାନାଳ, (ତାପସ ଦାସ) : ଢେଙ୍କାନାଳ ଜିଲ୍ଲା ସଦର ରେଞ୍ଜ ଷଡଙ୍ଗୀ ବନାଞ୍ଚଳ କପିଳାସ ସଂରକ୍ଷିତ ଜଙ୍ଗଲ ନକଟରେ ଥିବା ନେଉଳପୋଇ କାଜୁ ବଗିଚାରେ ବନବିଭାଗ ଚଢାଉ କରି ୧୫ କେଜି ବରାହ ମାଂସ ସହିତ ୨ ଜଣକୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି । ସୂଚନା ଅନୁସାରେ ନେଉଳ ପୋଇ କାଜୁ ଜଙ୍ଗଲ ମଧ୍ୟରେ ଏକ ବରାହକୁ ମାରି ମାଂସ କାଟୁଥିବାର ଖବର କୌଣସି ସୂତ୍ରରୁ ବନ ବିଭାଗ ପାଇଥିଲା । ଏହି ଖବରକୁ ନେଇ ବନ ବିଭାଗ ତରଫରୁ ଚଢାଉ କରାଯାଇ ସେଠାରୁ ୧୫ କେଜି ବରାହ ମାଂସ ସହିତ ଗୋଟିଏ ହିରୋ ହଣ୍ଡା ସିଡି ଡିଲକ୍ସ ମୋଟର ସାଇକେଲ ନଂଓଆର୦୬କେ୦୨୭୨ ସହିତ ଗୋଟିଏ ଓଜନ ମେସିନ, କଟୁରୀ, ଟାଙ୍ଗିଆ ଏବଂ ଗୋଟିଏ ପନିକିକୁ ଜବତ କରାଯାଇଛି । ଏହି ଘଟଣାରେ ସଂପୃକ୍ତ ଥିବା ଗଁଦିଆ ଥାନା ନେଉଳପୋଇ ପଞ୍ଚାୟତ ଚନ୍ଦ୍ରଶେଖରପୁର ଗ୍ରାମର ପ୍ରାଣବନ୍ଧୁ ସାମଲଙ୍କ ପୁଅ ଅଥୟ ସାମଲ(୬୫) ଓ ପରିକ୍ଷିତ ସାମଲଙ୍କ ପୁଅ ପ୍ରସନ୍ନ ସାମଲ(୪୦)ଙ୍କୁ ଗିରଫ କରିଛି । ବନବିଭାଗ ତରଫରୁ ସେମାନଙ୍କ ନାମରେ ୫୧/୨୦୨୧-୨୨ରେ ଏକ ମାମଲା ରୁଜ୍ଜୁ କରାଯାଇ କୋର୍ଟ ଚାଲାଣ କରାଯାଇଥିବା ଜଣାପଡିଛି ।
