ଯାଜପୁର : ଯାଜପୁର ଜିଲ୍ଲା କୋରେଇ ପୁଲିସକୁ ସଫଳତା । ଧରାପଡ଼ିଲେ ଲୁଟେରା ଗ୍ୟାଙ୍ଗ । ୧୫୦ ଗ୍ରାମର ସୁନା ଅଳଙ୍କାର ଜବତ । କୋରେଇ ଥାନା ଅଧୀନ ବିଭିନ୍ନ ଅଞ୍ଚଳରେ ଘଟିଥିବା ଚୋରି ଓ ଲୁଟ୍ ଘଟଣାରେ ସମ୍ପୃକ୍ତ ୪ଜଣ ଲୁଟେରା ଓ ଜଣେ କ୍ରେତାଙ୍କୁ ପୁଲିସ ଗିରଫ କରିଛି । ସେମାନଙ୍କ ନିକଟରୁ ୧୭ ଲକ୍ଷରୁ ଅଧିକ ଟଙ୍କାର ସୁନା ଅଳଙ୍କାର ଜବତ କରାଯାଇଥିବା ବେଳେ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି । ସୂଚନା ମୁତାବକ, କହ୍ନେଇପୁର ଓ ସନ୍ତରା ଅଞ୍ଚଳରେ ୨ ଜଣଙ୍କ ଘରୁ ଚୋରି ହୋଇଥିବା ନେଇ କୋରେଇ ଥାନାରେ ଅଭିଯୋଗ ହୋଇଥିଲା । ପରେ ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ତଦନ୍ତ ପରେ କୋରେଇ ପୁଲିସ ଏହି ଚୋରି ଘଟଣାର ପର୍ଦ୍ଦାଫାସ୍ କରିଛି । ଚୋରିରେ ସମ୍ପୃକ୍ତ ଥିବା ୪ ଜଣ ଲୁଟେରା ଓ ଚୋରି ସୁନା କିଣିଥିବା ଜଣେ ମହିଳାଙ୍କୁ ପୁଲିସ ଗିରଫ କରିଛି । ଲୁଟେରାମାନେ ଯାଜପୁର ରୋଡ୍ ଥାନା ଲକ୍ଷ୍ମୀନଗର ଅଞ୍ଚଳର ରବିନ୍ଦ୍ର ପାତ୍ର, କ୍ରିଷ୍ଣା ଦାସ, ଶୁଭମ୍ ଓଝା, ଯାଜପୁର ରୋଡ଼ ଥାନା ଯୋଗିସାହି ଅଞ୍ଚଳର ମଣ୍ଟୁ ମୁଣ୍ଡା ଏବଂ ଯାଜପୁର ରୋଡ୍ ଥାନା ମହରମ୍ ସାହିର ଆଜମିରା ବିବି ବୋଲି ଜଣାପଡିଛି । ପୁଲିସ ସମସ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।
