ଦାରିଙ୍ଗବାଡି : ପ୍ରଥମେ ମଦ ପିଆଇଲେ । ତାପରେ ମଦ ବୋତଲରେ ହିଁ ମରଣାନ୍ତକ ଆକ୍ରମଣ କଲେ ମଦ୍ୟପ ଯୁବକ । କନ୍ଧମାଳ ଜିଲ୍ଲା ଦାରିଙ୍ଗବାଡି ଥାନା ସିମନବାଡ଼ି ଅଞ୍ଚଳରେ ଏଭଳି ଘଟଣା ଘଟିଛି । ସୂଚନା ମୁତାବକ, ତେରାବାଡ଼ି ଗ୍ରାମର ଧର୍ମେନ୍ଦ୍ର ନାୟକ ରାଜସ୍ୱ ବଙ୍ଗଳା ପରିସର ମଧ୍ୟରେ ରହୁଥିବା କୁମାରୀ ନାୟକଙ୍କ ପାଖରେ ରୁହନ୍ତି । ଗୁରୁବାର ଦିନ ରାତି ୯ ଟାରେ ଧର୍ମେନ୍ଦ୍ର ଖାଉଥିବା ସମୟରେ ଗାଁର କିଛି ଯୁବକ ମଦ ପିଇବାକୁ ଡାକିଥିଲେ । ଧର୍ମେନ୍ଦ୍ର ଖାଇବା ଅଧାରୁ ଉଠି ମଦ୍ୟପାନ କରିବାକୁ ଯାଇଥିଲେ । ଧର୍ମେନ୍ଦ୍ରଙ୍କୁ ଅଧିକ ନିଶା ହେବା ପରେ ମଦ୍ୟପାନ କରିବା ପାଇଁ ଡାକିଥିବା ଯୁବକମାନେ ମଦ ବୋତଲରେ ମରଣାନ୍ତକ ଆକ୍ରମଣ କରିଥିଲେ । କୁମାରୀ ନାୟକ ଆକ୍ରମଣ ସମୟରେ ଛଡ଼ାଇଥିବା ବେଳେ ତାଙ୍କୁ ମଧ୍ୟ ଆକ୍ରମଣ କରିଥିଲେ ଯୁବକ । ଆକ୍ରମଣରେ ୨ ଜଣ ଗୁରୁତର ହୋଇଥିଲେ । ଧର୍ମେନ୍ଦ୍ର ଭୟରେ ରାତି ସାରା ରକ୍ତ ଜୁଡୁବୁଡୁ ଅବସ୍ଥାରେ ଘରେ ରହି ଶୁକ୍ରବାର ଦିନ ସକାଳୁ ସକାଳୁ ଦାରିଙ୍ଗବାଡି ମେଡ଼ିକାଲରେ ଚିକିତ୍ସିତ ହୋଇଥିଲେ । ଧର୍ମେନ୍ଦ୍ରଙ୍କ ଅବସ୍ଥା ଗୁରୁତର ରହିଛି । ଉଭୟ ଥାନାରେ ଏତଲା ଦେବେ ବୋଲି କହିଥିବା ବେଳେ ଦୋଷୀ ବିରୋଧରେ କୋଠାର କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ।