ପଞ୍ଚଦଶ ଅର୍ଥ କମିଶନ ସମୟରେ ପ୍ରଧାନମନ୍ତ୍ରୀ କିଷାନ ସମ୍ପଦ ଯୋଜନା ପାଇଁ ୬୫୨୦ କୋଟି ଟଙ୍କାର ବ୍ୟୟ ଅଟକଳକୁ କ୍ୟାବିନେଟ୍ ଅନୁମୋଦନ
ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ଆଜି ପଞ୍ଚଦଶ ଅର୍ଥ କମିଶନ (ଏଫ୍ସିସି) (୨୦୨୧-୨୨ରୁ ୨୦୨୫-୨୬) ସମୟରେ ଚାଲୁଥିବା କେନ୍ଦ୍ରୀୟ କ୍ଷେତ୍ର ଯୋଜନା “ପ୍ରଧାନମନ୍ତ୍ରୀ କିଷାନ ସମ୍ପଦ ଯୋଜନା” (ପିଏମ୍କେଏସ୍ୱାଇ) ପାଇଁ ୧୯୨୦ କୋଟି ଟଙ୍କାର ଅତିରିକ୍ତ ବ୍ୟୟ ଅଟକଳ ସହିତ ମୋଟ ୬୫୨୦ କୋଟି ଟଙ୍କାର ବ୍ୟୟ ଅଟକଳକୁ ଅନୁମୋଦନ କରିଛନ୍ତି । ଏଥିରେ ଅନ୍ତର୍ଭୁକ୍ତ ରହିଛି (କ) ଉପାଦାନ ଯୋଜନା ଅଧୀନରେ ୫୦ଟି ବହୁ-ଉତ୍ପାଦ ଖାଦ୍ୟ ବିକିରଣ ୟୁନିଟ୍ ସ୍ଥାପନ ପାଇଁ ୧୦୦୦ କୋଟି ଟଙ୍କା – ସମନ୍ୱିତ ଶୀତଳ ଶୃଙ୍ଖଳ ଏବଂ ମୂଲ୍ୟ ବୃଦ୍ଧି ଭିତ୍ତିଭୂମି (ଆଇସିସିଭିଏଆଇ) ଏବଂ ୧୦୦ ଏନ୍ଏବିଏଲ୍ ସ୍ୱୀକୃତିପ୍ରାପ୍ତ ଖାଦ୍ୟ ପରୀକ୍ଷଣ ପ୍ରୟୋଗଶାଳା (ଏଫ୍ଟିଏଲ୍) – ବଜେଟ ଘୋଷଣା ଅନୁଯାୟୀ ପ୍ରଧାନମନ୍ତ୍ରୀ କିଷାନ ସମ୍ପଦ ଯୋଜନା (ପିଏମ୍କେଏସ୍ୱାଇ)ର ଖାଦ୍ୟ ସୁରକ୍ଷା ଏବଂ ଗୁଣବତ୍ତା ନିଶ୍ଚିତ ଭିତ୍ତିଭୂମି ( ଏଫ୍ଏସ୍କ୍ୟୁଏଆଇ) ଏବଂ (ଖ) ୧୫ତମ ଅର୍ଥ କମିଶନ ଚକ୍ର ସମୟରେ ପିଏମ୍କେଏସ୍ୱାଇର ବିଭିନ୍ନ ଉପାଦାନ ଯୋଜନା ଅଧୀନରେ ପ୍ରକଳ୍ପ ମଞ୍ଜୁର ପାଇଁ ୯୨୦ କୋଟି ଟଙ୍କା । ଆଇସିସିଭିଏଆଇ ଏବଂ ଏଫ୍ଏସ୍କ୍ୟୁଏଆଇ ଉଭୟ ପିଏମ୍କେଏସ୍ୱାଇର ଚାହିଦା-ଚାଳିତ ଉପାଦାନ ଯୋଜନା । ଏଥିପାଇଁ ଦେଶବ୍ୟାପୀ ଯୋଗ୍ୟ ସଂସ୍ଥାଗୁଡ଼ିକରୁ ପ୍ରସ୍ତାବଗୁଡ଼ିକୁ ଆମନ୍ତ୍ରଣ କରିବା ପାଇଁ ଆଗ୍ରହ ପ୍ରକାଶ (ଇଓଆଇ) ଜାରି କରାଯିବ। ପ୍ରଚଳିତ ଯୋଜନା ନିର୍ଦ୍ଦେଶାବଳୀ ଓ ଯୋଗ୍ୟତା ମାନଦଣ୍ଡ ଅନୁଯାୟୀ ଇଓଆଇ ମାଧ୍ୟମରେ ପ୍ରାପ୍ତ ପ୍ରସ୍ତାବଗୁଡ଼ିକୁ ଉପଯୁକ୍ତ ଯାଞ୍ଚ ପରେ ଅନୁମୋଦନ କରାଯିବ । ପ୍ରସ୍ତାବିତ ୫୦ଟି ବହୁ-ଉତ୍ପାଦ ଖାଦ୍ୟ ବିକିରଣ ୟୁନିଟ୍ କାର୍ଯ୍ୟକାରୀ ହେବା ଦ୍ୱାରା ଏହି ୟୁନିଟ୍ ଅଧୀନରେ ବିକିରଣ ହେଉଥିବା ଖାଦ୍ୟ ଉତ୍ପାଦର ପ୍ରକାର ଉପରେ ନିର୍ଭର କରି ବାର୍ଷିକ ୨୦ରୁ ୩୦ ଲକ୍ଷ ମେଟ୍ରିକ୍ ଟନ୍ ମୋଟ ସଂରକ୍ଷଣ କ୍ଷମତା ସୃଷ୍ଟି ହେବ ବୋଲି ଆଶା କରାଯାଉଛି । ଘରୋଇ କ୍ଷେତ୍ର ଅଧୀନରେ ପ୍ରସ୍ତାବିତ ୧୦୦ଟି ଏନ୍ଏବିଏଲ୍-ସ୍ୱୀକୃତିପ୍ରାପ୍ତ ଖାଦ୍ୟ ପରୀକ୍ଷଣ ପ୍ରୟୋଗଶାଳା ପ୍ରତିଷ୍ଠା ଦ୍ୱାରା ଖାଦ୍ୟ ନମୁନା ପରୀକ୍ଷା, ଖାଦ୍ୟ ସୁରକ୍ଷା ମାନଦଣ୍ଡ ସହିତ ଅନୁପାଳନ ଏବଂ ନିରାପଦ ଖାଦ୍ୟ ଉତ୍ପାଦ ଯୋଗାଣ ପାଇଁ ଉନ୍ନତ ଭିତ୍ତିଭୂମି ବିକଶିତ ହେବ ।
