ବଲାଙ୍ଗିର, (ଦେବାଶିଷ ମିଶ୍ର) : ବଲାଙ୍ଗିର ସଦର ବ୍ଲକ ସ୍ଥିତ ମନହୀରା ପଞ୍ଚାୟତର ମନହୀରା ଓ ବଘାପାଲି ଗାଁରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପ ଗୁଡିକର ଉଦ୍ଘାଟନ ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ରଙ୍କ କରକମଳରେ ଅନୁଷ୍ଠିତ ହୋଇଯାଇଛି । ମନହୀରା ସରପଞ୍ଚ ରମ୍ଭା ରଣାଙ୍କ ପୌରହିତ୍ୟରେ ଅନୁଷ୍ଠିତ ଏହି ଉଦ୍ଘାଟନ ଉତ୍ସବ ପରବର୍ତ୍ତି ସଭାରେ ମୁଖ୍ୟ ଅତିଥି ଶ୍ରୀ ମିଶ୍ର କହିଥିଲେ ଲୋକଙ୍କ ଭିତରେ ଏକତା ଥିଲେ କୌଣସି ବିକାଶ ମୂଳକ କାମକୁ କେହି ଅଟକାଇ ପାରିବେ ନାହିଁ । ଅଞ୍ଚଳର ବିକାଶ ପାଇଁ ଯାହା କିଛି ବି ଦରକାର ଥିଲା ସେ ସବୁକୁ ପୁରା କରାଯାଇଛି । ଆଗାମୀ ଦିନରେ ସେ କ୍ଷମତାରେ ଥାଆନ୍ତି ବା ନଥାନ୍ତି ଲୋକଙ୍କ ଯାହା କିଛି ବି ଦାବି ସେ ସବୁକୁ ସଠିକ୍ ମଂଚରେ ଉପସ୍ଥାପନ କରି ସେ ନିଶ୍ଚିତ ଭାବରେ ସେ ସବୁ ପୂରଣ କରିବା ପାଇଁ ଚେଷ୍ଟା କରିବେ । ଆଜି ମନହିରାଠାରେ ଯୁବକମାନଙ୍କ ପାଇଁ ଏକ କ୍ଲବ ଘର, ମହିଳା ସ୍ୱୟଂ ସହାୟୀକ ଗୋଷ୍ଠି ପାଇଁ କମ୍ୟୁନିଟି ହଲ ଏବଂ ଟେରାକୋଟା ଭବନର ଉଦ୍ଘାଟନ କରାଯାଇଛି । ଠିକ୍ ସେହିପରି ଏହି ଗାଁକୁ ପାଇପ ଯୋଗେ ଘରକୁ ଘର ପିଇବା ପାଣିି ଦେବା ପାଇଁ ୩ ବର୍ଷ ପୂର୍ବେ ଲୋକଙ୍କୁ ପ୍ରତିଶୃତି ଦେଇଥିଲେ । ସେତେବେଳେ ଏହା ଭିତ୍ତି ପ୍ରସ୍ତର ଦିଆଯାଇଥିଲା । ଆଜି ତାହା ପୂର୍ଣ୍ଣାଙ୍ଗ ହୋଇ ଲୋକଙ୍କ ଉଦ୍ଦେଶ୍ୟରେ ପିଇବା ପାଣି ପ୍ରକଳ୍ପକୁ ଉସର୍ଗୀକୃତ କରାଗଲା ବୋଲି ଶ୍ରୀ ମିଶ୍ର କହିଥିଲେ । ଏହି କାର୍ଯ୍ୟକ୍ରମରେ ସ୍ଥାନୀୟ ସରପଞ୍ଚଙ୍କ ବ୍ୟତୀତ ସକମା ସମିତି ସଭ୍ୟ ସଂଜିବ ପ୍ରଧାନ, ଲକ୍ଷ୍ମୀନାରାୟଣ ନାଏକ, ସରୋଜ ପ୍ରଧାନ, ଚନ୍ଦ୍ରମଣି ରଣା, ରଘୁରାଜ ରଣା, ରବିନ୍ଦ୍ର ଭୋଇ, ଲୋକେଶ୍ୱର ଭୋଇ, ସ୍ୱୟଂ ସହାୟକ ଗୋଷ୍ଠି ସୁବୁନି ସାହୁ, ପ୍ରାଣବନ୍ଧୁ ମିଶ୍ର, ହରିଶ୍ଚନ୍ଦ୍ର ମିଶ୍ରଙ୍କ ସମେତ ସହସ୍ରାଧିକ ଗ୍ରାମବାସୀ ଉପସ୍ଥିତ ଥିଲେ ।
