ଗ୍ରାମ ଭିତରେ ପଶି ଜଣେ ବ୍ୟକ୍ତିକୁ ଆକ୍ରମଣ କଲା ଜଙ୍ଗଲୀ ବରାହ

ଖପ୍ରାଖୋଲ, (ଅଶୋକ କୁମାର ବାଗ) : ଜଙ୍ଗଲରେ ଖାଦ୍ୟ ଅଭାବ ଯୋଗୁଁ ଜନବସତି ମୁହାଁ ହେଉଛନ୍ତି ବନ୍ୟଜନ୍ତୁ । ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ହରିଶଙ୍କର ରେଞ୍ଜ ଅନ୍ତର୍ଗତ ଧଣ୍ଡାମୁଣ୍ଡା ଗ୍ରାମର ଭିତରକୁ ବନ୍ୟଜନ୍ତୁ ପ୍ରବେଶ କରି ଜଣେ ବ୍ୟକ୍ତିକୁ ଆକ୍ରମଣ କରିଥିବା ଜଣାପଡିଛି । ଆହତ ବ୍ୟକ୍ତି ହେଲେ ଧଣ୍ଡାମୁଣ୍ଡା ଗ୍ରାମର ସହଦେବ ସାହୁ । କୌଣସି କାର୍ଯ୍ୟରେ ଘରୁ ବାହାରି ରାସ୍ତାରେ ଚାଲି ଚାଲି ଯାଉଥିବା ସମୟରେ ହଠାତ୍ ଏକ ଜଙ୍ଗଲୀ ବରାହ ଖାଦ୍ୟ ଅନ୍ୱେଷଣରେ ଗ୍ରାମ ଭିତରକୁ ପଶି ଆସି ତାଙ୍କୁ ଆକ୍ରମଣ କରିଥିଲା । ବରାହର ଜୋରଦାର ଧକ୍କାରେ ସହଦେବ ତଳେ ପଡିଯାଇଥିଲେ । ଫଳରେ ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ଏବଂ ସେ ଗୁରୁତର ହୋଇଥିଲେ । ପରିବାର ଲୋକ ତାଙ୍କୁ ଗୁରୁତର ଅବସ୍ଥାରେ ଖପ୍ରାଖୋଲ ଡାକ୍ତରଖାନାକୁ ଆଣିଥିଲେ । ଡାକ୍ତରଖାନାରେ ତାଙ୍କୁ ଚିକିତ୍ସା କରି ଡାକ୍ତର ତାଙ୍କୁ ଘରକୁ ପଠେଇଦେଥିବା ଜଣାପଡିଛି । ପରିବାର ଲୋକ ଖପ୍ରାଖୋଲ ବନବିଭାଗ କାର୍ଯ୍ୟାଳୟକୁ ଆସିଥିବା ବେଳେ ସେମାନଙ୍କୁ କିଛି କାଗଜପତ୍ର ଆଣିକି ଆସିଲେ ବନବିଭାଗ ତରଫରୁ କିଛି ସହାୟତା ରାଶି ମିଳିବ ବୋଲି କହିଥିବା ପରିବାର ଲୋକ କହିଛନ୍ତି ।