• ପ୍ରଧାନମନ୍ତ୍ରୀ ଭାରତୀୟ ନ୍ୟାୟପାଳିକାର ବାର୍ଷିକ ରିପୋର୍ଟ ୨୦୨୩-୨୪କୁ କଲେ ଉନ୍ମୋଚନ
• ଆମ ସମ୍ବିଧାନ କେବଳ ଏକ ଆଇନ ପୁସ୍ତକ ନୁହେଁ, ଏହା ଏକ ନିରନ୍ତର ପ୍ରବାହିତ, ସଜୀବ ଧାରା : ପ୍ରଧାନମନ୍ତ୍ରୀ
• ଆମ ସମ୍ବିଧାନ ହେଉଛି ଆମର ବର୍ତ୍ତମାନ ଏବଂ ଭବିଷ୍ୟତ ପାଇଁ ମାର୍ଗଦର୍ଶକ : ପ୍ରଧାନମନ୍ତ୍ରୀ
• ଆଜି ପ୍ରତ୍ୟେକ ନାଗରିକଙ୍କର କେବଳ ଗୋଟିଏ ଲକ୍ଷ୍ୟ ରହିଛି, ଗୋଟିଏ ବିକଶିତ ଭାରତ ନିର୍ମାଣ କରିବା : ପ୍ରଧାନମନ୍ତ୍ରୀ
• ତ୍ୱରିତ ନ୍ୟାୟ ସୁନିଶ୍ଚିତ କରିବା ପାଇଁ ଏକ ନୂତନ ନ୍ୟାୟିକ ସଂହିତା ଲାଗୁ କରାଯାଇଛି, ଦଣ୍ଡ ଆଧାରିତ ବ୍ୟବସ୍ଥା ବର୍ତ୍ତମାନ ନ୍ୟାୟ ଆଧାରିତ ବ୍ୟବସ୍ଥାରେ ପରିବର୍ତ୍ତିତ ହୋଇଛି : ପ୍ରଧାନମନ୍ତ୍ରୀ
ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀ ସ୍ଥିତ ସର୍ବୋଚ୍ଚ ନ୍ୟାୟାଳୟ ପ୍ରଶାସନିକ ଭବନ ଠାରେ ଆୟୋଜିତ ସମ୍ବିଧାନ ଦିବସ କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି । ଏହି କାର୍ଯ୍ୟକ୍ରମରେ ଭାରତର ପ୍ରଧାନ ବିଚାରପତି ସଞ୍ଜୀବ ଖନ୍ନା, ସର୍ବୋଚ୍ଚ ନ୍ୟାୟାଳୟର ବିଚାରପତି ବି. ଆର. ଗାଭାଇ ଏବଂ ବିଚାରପତି ସୂର୍ଯ୍ୟକାନ୍ତ, ଆଇନ ଏବଂ ନ୍ୟାୟ ମନ୍ତ୍ରୀ ଅର୍ଜୁନ ରାମ ମେଘୱାଲ, ଭାରତର ଆଟର୍ଣ୍ଣି ଜେନେରାଲ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ । ସମାବେଶକୁ ସମ୍ବୋଧିତ କରି ଶ୍ରୀ ମୋଦୀ ସମ୍ବିଧାନ ଦିବସ ଅବସରରେ ସମସ୍ତ ମାନ୍ୟଗଣ୍ୟ ବ୍ୟକ୍ତି, ପ୍ରତିନିଧି ଏବଂ ନାଗରିକମାନଙ୍କୁ ଶୁଭେଚ୍ଛା ଜଣାଇଥିଲେ । ସେ କହିଥିଲେ ଯେ ଭାରତୀୟ ସମ୍ବିଧାନର ୭୫ତମ ବର୍ଷ ପୂରଣ ହେବା ଅତ୍ୟନ୍ତ ଗର୍ବର ବିଷୟ । ଏହି ଅବସରରେ ସେ ସମ୍ବିଧାନ ସଭା ଏବଂ ସମ୍ବିଧାନର ସଦସ୍ୟମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ, ଆଜି ଯେତେବେଳେ ଆମେ ସମ୍ବିଧାନ ଦିବସ ପାଳନ କରୁଛୁ, ସେହିସମୟରେ ଆଜିର ଦିନରେ ଘଟିଥିବା ମୁମ୍ବାଇ ଆତଙ୍କବାଦୀ ଆକ୍ରମଣର ବାର୍ଷିକୀକୁ ମଧ୍ୟ ଭୁଲି ହେବ ନାହିଁ । ସେ ଆତଙ୍କବାଦୀ ଆକ୍ରମଣର ଶିକାର ହୋଇଥିବା ଲୋକଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଶ୍ରୀ ମୋଦୀ ଦୋହରାଇଥିଲେ ଯେ ଭାରତର ସୁରକ୍ଷା ଏବଂ ଅଖଣ୍ଡତା ପ୍ରତି ବିପଦ ସୃଷ୍ଟି କରୁଥିବା ପ୍ରତ୍ୟେକ ଆତଙ୍କବାଦୀ ସଙ୍ଗଠନକୁ ଭାରତ ଉପଯୁକ୍ତ ଜବାବ ଦେବ । ଭାରତର ସମ୍ବିଧାନକୁ ନେଇ ସମ୍ବିଧାନ ସଭାର ବିସ୍ତୃତ ବିତର୍କ ଏବଂ ଆଲୋଚନାକୁ ସ୍ମରଣ କରି ଶ୍ରୀ ମୋଦୀ ବାବାସାହେବ ଆମ୍ବେଦକରଙ୍କ ବକ୍ତବ୍ୟକୁ ଉଦ୍ଧୃତ କରି କହିଥିଲେ, ‘‘ସମ୍ବିଧାନ କେବଳ ଓକିଲଙ୍କ ଦସ୍ତାବିଜ ନୁହେଁ, ଏହା ଏକ ଭାବନା, ଏହା ସବୁ ଯୁଗରେ ଭାବନା ହୋଇ ରହିବ ।’’ ଏହି ଭାବନା ଜରୁରୀ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଛନ୍ତି ଯେ ସମ୍ବିଧାନ ନିର୍ମାତାମାନେ ଦେଶ, ସମୟ ଏବଂ ପରିସ୍ଥିତି ଅନୁଯାୟୀ ଉପଯୁକ୍ତ ନିଷ୍ପତ୍ତି ନେଇ ସମ୍ବିଧାନକୁ ବିଭିନ୍ନ ସମୟରେ ବ୍ୟାଖ୍ୟା କରିବାର ସ୍ୱାଧୀନତା ପ୍ରଦାନ କରିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ସମ୍ବିଧାନ ନିର୍ମାତାମାନେ ଭଲ ଭାବରେ ଜାଣନ୍ତି ଯେ ଭାରତର ସ୍ୱପ୍ନ ଏବଂ ଆକାଂକ୍ଷା ସମୟ ସହିତ ନୂତନ ଉଚ୍ଚତାକୁ ଛୁଇଁବ ଏବଂ ଏହି ଆହ୍ୱାନ ସହିତ ସ୍ୱାଧୀନ ଭାରତର ଲୋକଙ୍କ ଆବଶ୍ୟକତା ମଧ୍ୟ ବିକଶିତ ହେବ । ତେଣୁ ସମ୍ବିଧାନ ନିର୍ମାତାମାନେ ସମ୍ବିଧାନକୁ କେବଳ ଦସ୍ତାବିଜ ଭାବେ ନୁହେଁ, ବରଂ ଏକ ଜୀବନ୍ତ, ନିରନ୍ତର ପ୍ରବାହିତ ଧାରାରେ ପରିଣତ କରିଛନ୍ତି । ‘‘ଆମ ସମ୍ବିଧାନ ଆମର ବର୍ତ୍ତମାନ ଏବଂ ଆମର ଭବିଷ୍ୟତ ପାଇଁ ଏକ ମାର୍ଗଦର୍ଶକ’’, ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ସମ୍ବିଧାନ ଏହାର ଅସ୍ତିତ୍ୱର ଗତ ୭୫ ବର୍ଷ ମଧ୍ୟରେ ଉପୁଜିଥିବା ବିଭିନ୍ନ ଆହ୍ୱାନର ମୁକାବିଲା କରିବା ପାଇଁ ସଠିକ୍ ମାର୍ଗ ଦେଖାଇଛି । ସେ ଆହୁରି ମଧ୍ୟ କହିଛନ୍ତି ଯେ ସମ୍ବିଧାନ ଭାରତୀୟ ଗଣତନ୍ତ୍ର ସମ୍ମୁଖୀନ ହେଉଥିବା ଜରୁରୀକାଳୀନ ପରିସ୍ଥିତିର ବିପଜ୍ଜନକ ସମୟର ମଧ୍ୟ ସମ୍ମୁଖୀନ ହୋଇଥିଲା । ସମ୍ବିଧାନ ଦେଶର ସମସ୍ତ ଆବଶ୍ୟକତା ଏବଂ ଆଶାପୂରଣ କରିଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ କହିଛନ୍ତି ଯେ ସମ୍ବିଧାନ ଦ୍ୱାରା ଦିଆଯାଇଥିବା କ୍ଷମତା ଦ୍ୱାରା ହିଁ ଡ. ଭୀମରାଓ ଆମ୍ବେଦକରଙ୍କ ଦ୍ୱାରା ପ୍ରସ୍ତୁତ ସମ୍ବିଧାନ ଆଜି ଜମ୍ମୁ-କଶ୍ମୀରରେ ମଧ୍ୟ ବଳବତ୍ତର ରହିଛି । ସେ ଆହୁରି ମଧ୍ୟ କହିଛନ୍ତି ଯେ ଆଜି ପ୍ରଥମ ଥର ପାଇଁ ଜମ୍ମୁ-କଶ୍ମୀରରେ ସମ୍ବିଧାନ ଦିବସ ପାଳନ କରାଯାଇଛି । ଭାରତ ପରିବର୍ତ୍ତନର ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟ ଦେଇ ଗତି କରୁଛି ବୋଲି ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ସମ୍ବିଧାନ ଆମକୁ ମାର୍ଗଦର୍ଶକ ଭାବରେ ସଠିକ୍ ମାର୍ଗ ଦେଖାଉଛି । ବଡ଼ ସ୍ୱପ୍ନ ଓ ବଡ଼ ସଂକଳ୍ପ ହାସଲ କରିବା ଏବେ ଭାରତ ପାଇଁ ଭବିଷ୍ୟତର ମାର୍ଗ ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ କହିଥିଲେ ଯେ ଆଜି ପ୍ରତ୍ୟେକ ନାଗରିକଙ୍କ ଲକ୍ଷ୍ୟ ହେଉଛି ଏକ ବିକଶିତ ଭାରତ ଗଠନ କରିବା । ସେ ଆହୁରି ମଧ୍ୟ କହିଥିଲେ ଯେ ବିକଶିତ ଭାରତର ଅର୍ଥ ହେଉଛି ଏପରି ଏକ ସ୍ଥାନ ଯେଉଁଠାରେ ପ୍ରତ୍ୟେକ ନାଗରିକଙ୍କ ପାଇଁ ଗୁଣାତ୍ମକ ଜୀବନ ଓ ସମ୍ମାନ ସୁନିଶ୍ଚିତ କରାଯାଇପାରିବ । ଏହା ସାମାଜିକ ନ୍ୟାୟ ସୁନିଶ୍ଚିତ କରିବାର ଏକ ମହାନ ମାଧ୍ୟମ ଏବଂ ଏହା ସମ୍ବିଧାନର ଭାବନା ବୋଲି ସେ କହିଛନ୍ତି । ତେଣୁ ଗତ କିଛି ବର୍ଷ ମଧ୍ୟରେ ବ୍ୟାଙ୍କ ସେବାରୁ ବଞ୍ଚିତ ଥିବା ୫୩ କୋଟିରୁ ଅଧିକ ଲୋକଙ୍କ ବ୍ୟାଙ୍କ ଆକାଉଣ୍ଟ ଖୋଲିବା ଭଳି ସାମାଜିକ-ଆର୍ଥିକ ନ୍ୟାୟ ସୁନିଶ୍ଚିତ କରିବା ପାଇଁ ଅନେକ ପଦକ୍ଷେପ ନିଆଯାଇଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ ଜୋର ଦେଇ କହିଥିଲେ, ଗତ ଦଶନ୍ଧି ମଧ୍ୟରେ ୪ କୋଟି ଲୋକଙ୍କୁ ପକ୍କା ଘର, ଘରର ମହିଳାଙ୍କୁ ୧୦ କୋଟି ଗ୍ୟାସ୍ ସିଲିଣ୍ଡର ସଂଯୋଗ ଦିଆଯାଇଛି । ସ୍ୱାଧୀନତାର ୭୫ ବର୍ଷ ପରେ ମଧ୍ୟ ଭାରତରେ ମାତ୍ର ୩ କୋଟି ଘରେ ଘରୋଇ ନଳ ସଂଯୋଗ ରହିଥିଲା । ତାଙ୍କ ସରକାର ଗତ ୫-୬ ବର୍ଷ ମଧ୍ୟରେ ୧୨ କୋଟିରୁ ଅଧିକ ଘରୋଇ ଟ୍ୟାପ୍ ଜଳ ସଂଯୋଗ ଦେଇଛନ୍ତି ଯାହା ବିଶେଷ କରି ନାଗରିକ ଏବଂ ମହିଳାଙ୍କ ଜୀବନଧାରଣକୁ ସହଜ କରିଛି । ଏହା ଦ୍ୱାରା ସମ୍ବିଧାନର ଭାବନା ସୁଦୃଢ଼ ହୋଇଛି ବୋଲି ସେ ଖୁସି ପ୍ରକାଶ କରି କହିଛନ୍ତି । ଭାରତୀୟ ସମ୍ବିଧାନର ମୂଳ କପିରେ ଭଗବାନ ରାମ, ଦେବୀ ସୀତା, ଭଗବାନ ହନୁମାନ, ଭଗବାନ ବୁଦ୍ଧ, ଭଗବାନ ମହାବୀର ଏବଂ ଗୁରୁ ଗୋବିନ୍ଦ ସିଂହଙ୍କ ଫଟୋ ରହିଛି ବୋଲି ଶ୍ରୀ ମୋଦୀ ତାଙ୍କ ବକ୍ତବ୍ୟରେ କହିଥିଲେ । ସେ ଆହୁରି ମଧ୍ୟ କହିଛନ୍ତି ଯେ ଭାରତୀୟ ସଂସ୍କୃତିର ଏହି ପ୍ରତୀକଗୁଡ଼ିକୁ ସମ୍ବିଧାନରେ ସ୍ଥାନ ଦିଆଯାଇଛି ଯାହା ଦ୍ୱାରା ଏହା ଆମକୁ ସର୍ବଦା ମାନବିକ ମୂଲ୍ୟବୋଧ ପ୍ରତି ସଚେତନ ରଖିବ । ‘‘ମାନବିକ ମୂଲ୍ୟବୋଧ ବର୍ତ୍ତମାନ ଭାରତର ନୀତି ଏବଂ ନିଷ୍ପତ୍ତିର ଆଧାର”, ପ୍ରଧାନମନ୍ତ୍ରୀ କହିଥିଲେ । ସେ ଆହୁରି ମଧ୍ୟ କହିଛନ୍ତି ଯେ ନାଗରିକମାନଙ୍କୁ ଶୀଘ୍ର ନ୍ୟାୟ ପ୍ରଦାନ ସୁନିଶ୍ଚିତ କରିବା ପାଇଁ ଭାରତୀୟ ନ୍ୟାୟ ସଂହିତା ଲାଗୁ କରାଯାଇଛି । ସେ କହିଛନ୍ତି ଯେ, ଦଣ୍ଡ ଭିତ୍ତିକ ବ୍ୟବସ୍ଥା ଏବେ ନ୍ୟାୟ ଭିତ୍ତିକ ବ୍ୟବସ୍ଥାରେ ପରିଣତ ହୋଇଛି । ମହିଳାଙ୍କ ରାଜନୈତିକ ଭାଗିଦାରୀ ବୃଦ୍ଧି ପାଇଁ ଐତିହାସିକ ମହିଳା ସଂରକ୍ଷଣ ବିଲ୍ ଆଗତ କରାଯାଇଥିଲା ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ତୃତୀୟ ଲିଙ୍ଗର ଲୋକଙ୍କ ପରିଚୟ ଓ ଅଧିକାର ସୁନିଶ୍ଚିତ କରିବା ଏବଂ ଦିବ୍ୟାଙ୍ଗଙ୍କ ଜୀବନଧାରଣକୁ ସହଜ କରିବା ପାଇଁ ସୁବିଧା ସୁଯୋଗ ସୁନିଶ୍ଚିତ କରିବା ପାଇଁ ପଦକ୍ଷେପ ନିଆଯାଇଛି ବୋଲି ସେ କହିଛନ୍ତି । ଆଜି ଭାରତ ନାଗରିକଙ୍କ ସହଜ ଜୀବନଧାରଣ ଉପରେ ଅଧିକ ଗୁରୁତ୍ୱ ଦେଉଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ବରିଷ୍ଠ ନାଗରିକମାନଙ୍କୁ ସେମାନଙ୍କ ଘର ପାଖରେ ଡିଜିଟାଲ ଲାଇଫ୍ ସାର୍ଟିଫିକେଟ୍ ପ୍ରଦାନ କରାଯାଇଛି, ଯାହାର ଲାଭ ଆଜି ପର୍ଯ୍ୟନ୍ତ ପ୍ରାୟ ଦେଢ଼ କୋଟି ବରିଷ୍ଠ ନାଗରିକ ପାଇଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଭାରତ ସେହି ଦେଶମାନଙ୍କ ମଧ୍ୟରୁ ଅନ୍ୟତମ ଯିଏ ପ୍ରତ୍ୟେକ ଗରିବ ପରିବାରକୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପ୍ରଦାନ କରିଛି ଏବଂ ଭାରତ ହେଉଛି ଏପରି ଏକ ଦେଶ ଯିଏ କି ୭୦ ବର୍ଷରୁ ଅଧିକ ବୟସର ବରିଷ୍ଠ ନାଗରିକମାନଙ୍କୁ ମାଗଣା ସ୍ୱାସ୍ଥ୍ୟ ସେବା ପ୍ରଦାନ କରିଥିଲା । ଭାରତର ହଜାର ହଜାର ଜନ ଔଷଧି କେନ୍ଦ୍ରରେ ଏହି ଔଷଧ ୮୦% ରିହାତିମୂଲ୍ୟରେ ବିକ୍ରି ହେଉଛି ବୋଲି ସେ ଉଲ୍ଲେଖ କରିଛନ୍ତି । ଶ୍ରୀ ମୋଦୀ କହିଥିଲେ ଯେ ଅତୀତରେ ୬୦%ରୁ କମ୍ ଟିକାକରଣ ହୋଇଥିବା ବେଳେ ଆଜି ମିଶନ ଇନ୍ଦ୍ରଧନୁଷ ମାଧ୍ୟମରେ ଶିଶୁମାନଙ୍କ ମଧ୍ୟରେ ଟିକାକରଣ ୧୦୦% ପାଖାପାଖି ପହଞ୍ଚିବା ଖୁସିର ବିଷୟ । ସେ ଆହୁରି ମଧ୍ୟ କହିଛନ୍ତି ଯେ ଦୁର୍ଗମ ଗ୍ରାମଗୁଡ଼ିକର ପିଲାମାନଙ୍କୁ ଆଜି ଟିକା ଦିଆଯାଉଛି । ଏହି ପ୍ରୟାସ ଦ୍ୱାରା ଗରିବ ଓ ମଧ୍ୟବିତ୍ତ ପରିବାରର ସମସ୍ୟା ବହୁ ମାତ୍ରାରେ ହ୍ରାସ ପାଇଛି ବୋଲି ସେ କହିଛନ୍ତି । ସରକାରଙ୍କ ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମ ଉପରେ ଆଲୋକପାତ କରି ଶ୍ରୀ ମୋଦୀ କହିଥିଲେ ଯେ ୧୦୦ରୁ ଅଧିକ ପଛୁଆ ଜିଲ୍ଲା ଚୟନ କରାଯାଇଛି ଏବଂ ପ୍ରତ୍ୟେକ ବିକାଶମୂଳକ ମାନଦଣ୍ଡରେ ଗତିକୁ ତ୍ୱରାନ୍ୱିତ କରାଯାଇଛି । ସେ ଆହୁରି ମଧ୍ୟ କହିଛନ୍ତି ଯେ ଆଜି ଅନେକ ଆକାଂକ୍ଷୀ ଜିଲ୍ଲା ଅନ୍ୟ ଜିଲ୍ଲା ତୁଳନାରେ ଭଲ ପ୍ରଦର୍ଶନ କରିଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ସରକାର ବର୍ତ୍ତମାନ ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମର ମଡେଲ ଉପରେ ଆଧାରିତ ଆକାଂକ୍ଷୀ ବ୍ଲକ କାର୍ଯ୍ୟକ୍ରମ ଆରମ୍ଭ କରିଛନ୍ତି । ନାଗରିକମାନଙ୍କ ଜୀବନରେ ଥିବା ଅସୁବିଧାକୁ ଦୂର କରିବା ପାଇଁ ସରକାର କୌଣସି କସରତ ଛାଡ଼ୁନାହାନ୍ତି ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଥିଲେ । ସେ ଉଲ୍ଲେଖ କରିଥିଲେ ଯେ ମାଗଣା ବିଦ୍ୟୁତ ଯୋଜନା ମାଧ୍ୟମରେ ୨.୫ କୋଟିରୁ ଅଧିକ ପରିବାରକୁ ବିଜୁଳି ସଂଯୋଗ କରାଯାଇଥିଲା ଯେଉଁଥିରେ କିଛି ବର୍ଷ ପୂର୍ବରୁ ବିଦ୍ୟୁତ ସଂଯୋଗ ନଥିଲା । ୪ଜି ଓ ୫ଜି ଟେକ୍ନୋଲୋଜି ଜରିଆରେ ଲୋକଙ୍କୁ ମୋବାଇଲ୍ ସଂଯୋଗ ସୁନିଶ୍ଚିତ କରିବା ପାଇଁ ଦୁର୍ଗମ ଅଞ୍ଚଳରେ ମୋବାଇଲ୍ ଟାୱାର ସ୍ଥାପନ କରାଯାଇଛି ବୋଲି ସେ ଉଲ୍ଲେଖ କରିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଆଣ୍ଡାମାନ ଓ ନିକୋବର ଏବଂ ଲାକ୍ଷାଦ୍ୱୀପ ଦ୍ୱୀପପୁଞ୍ଜରେ ଅଣ୍ଡରୱାଟର ଅପ୍ଟିକାଲ ଫାଇବର ସଂଯୋଗ ମାଧ୍ୟମରେ ହାଇ ସ୍ପିଡ୍ ବ୍ରଡବ୍ୟାଣ୍ଡ ସଂଯୋଗ ବର୍ତ୍ତମାନ ଉପଲବ୍ଧ ହୋଇଛି । ପ୍ରଧାନମନ୍ତ୍ରୀ କହିଥିଲେ ଯେ ଭାରତରେ ଘର ଡିହ ଏବଂ ଚାଷ ଜମିର ରେକର୍ଡ ସୁନିଶ୍ଚିତ କରିବାରେ ଭାରତ ବିକଶିତ ରାଷ୍ଟ୍ରମାନଙ୍କ ଠାରୁ ଅଗ୍ରଣୀ ଭୂମିକା ଗ୍ରହଣ କରିଛି । ସେ ଆହୁରି ମଧ୍ୟ କହିଛନ୍ତି ଯେ ପିଏମ୍ ସ୍ୱାମୀତ୍ୱ ଯୋଜନା ଅଧୀନରେ ଗାଁର ଜମି ଓ ଘରର ଡ୍ରୋନ୍ ମ୍ୟାପିଂ ଏବଂ ଏହାର ଆଧାରରେ ଆଇନଗତ ଦସ୍ତାବିଜ ଜାରି କରାଯାଇଛି । ଆଧୁନିକ ଭିତ୍ତିଭୂମିର ଦ୍ରୁତ ବିକାଶ ଦେଶର ବିକାଶ ପାଇଁ ଏକ ବଡ଼ ଆବଶ୍ୟକତା ବୋଲି ଶ୍ରୀ ମୋଦୀ କହିଥିଲେ । ସେ ଆହୁରି ମଧ୍ୟ କହିଥିଲେ ଯେ ଭିତ୍ତିଭୂମି ପ୍ରକଳ୍ପଗୁଡିକ ଠିକ୍ ସମୟରେ ଶେଷ ହେବା ଦ୍ୱାରା ଅର୍ଥ ସଞ୍ଚୟ ସୁନିଶ୍ଚିତ ହେବା ସହ ପ୍ରକଳ୍ପର ଉପଯୋଗିତା ସୁନିଶ୍ଚିତ ହୋଇଛି । ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ପ୍ରଗତି ପ୍ଲାଟଫର୍ମ ବ୍ୟବହାର କରି ଭିତ୍ତିଭୂମି ପ୍ରକଳ୍ପଗୁଡ଼ିକର ନିୟମିତ ସମୀକ୍ଷା କରାଯାଇଛି । ୧୮ ଲକ୍ଷ କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପର ସମୀକ୍ଷା କରାଯାଇଛି ଏବଂ ସେଗୁଡ଼ିକର ସମ୍ମୁଖୀନ ହେଉଥିବା ପ୍ରତିବନ୍ଧକଗୁଡ଼ିକୁ ଦୂର କରାଯାଇଛି ବୋଲି ମୋଦୀ କହିଥିଲେ । ପ୍ରଧାନମନ୍ତ୍ରୀ କହିଥିଲେ, ଭିତ୍ତିଭୂମି ପ୍ରକଳ୍ପଗୁଡିକ ଠିକ୍ ସମୟରେ ସମ୍ପୂର୍ଣ୍ଣ ହେବା ଲୋକଙ୍କ ଜୀବନ ଉପରେ ଅନେକ ସକାରାତ୍ମକ ପ୍ରଭାବ ପକାଇଛି । ଏହି ପ୍ରୟାସ ଦେଶର ପ୍ରଗତିକୁ ସୁନିଶ୍ଚିତ କରିବା ସହିତ ସମ୍ବିଧାନର ମୌଳିକ ଭାବନାକୁ ସୁଦୃଢ଼ କରୁଛି । ଅଭିଭାଷଣ ଶେଷ କରି ଶ୍ରୀ ମୋଦୀ ୧୯୪୯ ମସିହା ନଭେମ୍ବର ୨୬ ତାରିଖରେ ଡ. ରାଜେନ୍ଦ୍ର ପ୍ରସାଦଙ୍କ ଭାଷଣରୁ କିଛି ଭାଗର ଉଦାହରଣ ଦେଇ କହିଥିଲେ, ‘‘ ଭାରତକୁ ଆଜି ଯାହା ଦରକାର ତାହା ସଚ୍ଚୋଟ ଲୋକଙ୍କ ଏକ ଗୋଷ୍ଠୀ ବ୍ୟତୀତ ଆଉ କିଛି ନୁହେଁ, ଯେଉଁମାନେ ନିଜ ସ୍ୱାର୍ଥ ପରିବର୍ତ୍ତେ ଦେଶର ସ୍ୱାର୍ଥକୁ ଆଗରେ ରଖିବେ’’ । ସେ ଆହୁରି ମଧ୍ୟ କହିଛନ୍ତି ଯେ ରାଷ୍ଟ୍ର ପ୍ରଥମ ଏହି ଭାବନା ଆଗାମୀ ଶତାବ୍ଦୀ ପର୍ଯ୍ୟନ୍ତ ଭାରତର ସମ୍ବିଧାନକୁ ବଞ୍ଚାଇ ରଖିବ ।
ପୃଷ୍ଠଭୂମି
ଭାରତୀୟ ସମ୍ବିଧାନ ପ୍ରଣୟନ ୭୫ ବର୍ଷ ପୂର୍ତ୍ତି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୁପ୍ରିମକୋର୍ଟର ପ୍ରଶାସନିକ ଭବନ ପରିସରରେ ଆୟୋଜିତ ସମ୍ବିଧାନ ଦିବସ ସମାରୋହରେ ଯୋଗଦେଇଥିଲେ । ସୁପ୍ରିମକୋର୍ଟ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଏଥିରେ ପ୍ରଧାନ ବିଚାରପତି ଏବଂ ସୁପ୍ରିମକୋର୍ଟର ଅନ୍ୟ ବିଚାରପତିମାନେ ମଧ୍ୟ ଉପସ୍ଥିତ ରହିଥିଲେ ।