ବଲାଙ୍ଗିର, (କେପିଏନ୍ଏସ୍) : ସ୍ଥାନୀୟ ଖଦାଲପଡାରେ ଥିବା ସୁରୁଚି ମାର୍କେଟ କମ୍ପ୍ଲେକ୍ସଠାରେ ଏକ ଅଘଟଣ ଘଟିଥିବା ଦେଖିବାକୁ ମିଳିଛି । ଏକ ଇଲେକ୍ଟ୍ରି ପୋଲରୁ ଅନ୍ୟ ଏକ ଇଲେକ୍ଟ୍ରି ପୋଲ ମଧ୍ୟରେ ଥିବା ବିଦ୍ୟୁତ କେବୁଲ ଛିଣ୍ଡି ତଳେ ପଡି ସର୍ଟସାର୍କିଟ ହୋଇଥିବା ଦେଖିବାକୁ ମିଳିଛି । ଏହି କମ୍ପ୍ଲେକ୍ସରେ ଅନେକ ବ୍ୟାଙ୍କ ରହିଥିବାରୁ ବାହାରେ ଶହ ଶହ ଗାଡ଼ି ଉପରେ ପଡ଼ିଥିଲା କେବୁଲ୍ ତାର । ଦୀର୍ଘ ସମୟ ଧରି ବାଣ ଫୁଟିଲା ଭଳି ଜଳୁଥିଲା କେବୁଲ । ପାଖରେ ଥିବା ଏକ ଜଳଛତ୍ରରେ ମଧ୍ୟ ଲାଗି ଯାଇଥିଲା ନିଆଁ । ଅଳ୍ପକେ ବଡ ଅଘଟଣରୁ ବର୍ତ୍ତି ଯାଇଥିଲେ ବ୍ୟାଙ୍କକୁ ଆସିଥିବା ଗ୍ରାହକ । ଆଖପାଖ ଲୋକେ ଭୟଭୀତ ହୋଇ ପଡିଥିବା ଦେଖିବାକୁ ମିଳିଛି । ସ୍ଥାନୀୟ ଲୋକଙ୍କ କହିବା ଅନୁସାରେ ଟାଟା ପାୱାର ପୁରୁଣା କେବୁଲ୍ ଲଗାଇଥିବାରୁ ଏହି ସବୁ ଅଘଟଣ ଘଟୁଛି । ଏହି ଟାଟା ପାୱାର ମେଣ୍ଟେନାନ୍ସ ନାଁରେ ସବୁବେଳେ ପାୱାର କଟ୍ କରି ମଧ୍ୟ ଏସବୁ ଅସୁବିଧାର ସମ୍ମୁଖୀନ ହେବାକୁ ପଡୁଛି ବୋଲି କହିଛନ୍ତି ଅଞ୍ଚଳବାସୀ ।