ବଲାଙ୍ଗିର, (କେପିଏନ୍ଏସ୍) : ଶ୍ରୀରାମ ମନ୍ଦିର ପ୍ରତିଷ୍ଠା ଉପଲକ୍ଷେ ବଲାଙ୍ଗିର ସଦେଇପାଲି ଉତ୍ସବମୁଖର ହୋଇଉଠିଛି । ଗତ ୨୯ ତାରିଖ ଦିନ ଏଥିସକାଶେ କଳସ ଶୋଭାଯାତ୍ରାର ଆୟୋଜନ ହୋଇଥିବା ବେଳେ ସଦେଇପାଲିର ଆବାଳ ବୃଦ୍ଧ ବନିତା ଏହି କାର୍ଯ୍ୟକ୍ରମରେ ଯୋଗଦାନ କରିଥିଲେ । ୩୦ ତାରିଖ ଦିନରୁ ଆରମ୍ଭ ହୋଇଥିଲା ବିଭିନ୍ନ କାର୍ଯ୍ୟକ୍ରମ ସହ ରାମାୟଣ ପାରାୟଣ କାର୍ଯ୍ୟକ୍ରମ । କଳାହାଣ୍ଡି ଜିଲ୍ଲାର ବିଶିଷ୍ଟ କଣ୍ଠଶିଳ୍ପୀ ତଥା ପୁରାଣ ଗାୟିକା ଗୀତାଂଜଳି ମହାପାତ୍ର ଏଠାରେ ପାରାୟଣ ଦାୟିତ୍ୱ ନେଇଥିବା ବେଳେ ବହୁସଂଖ୍ୟାରେ ଭକ୍ତ ଓ ଶ୍ରଦ୍ଧାଳୁ ଏଥିରେ ଯୋଗଦାନ କରି ଭକ୍ତି ରସାମୃତ ପାନ କରୁଛନ୍ତି । ଆଜି ସୀତା ବିବାହ ପାଳନ ଅବସରରେ ଆହୁରି ଉଲ୍ଲସିତ ହୋଇ ଉଠିଥିଲା ସଦେଇପାଲି । ସୂଚନା ଅନୁସାରେ ଗ୍ରାମବାସୀଙ୍କ ସଂପୂର୍ଣ୍ଣ ସହଯୋଗରେ ଗାଁର ଗଉନ୍ତିଆ ସୁରେଶ ନାଏକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି କାର୍ଯ୍ୟକ୍ରମ ଚାଲିଛି । ପ୍ରତ୍ୟେକ ସଂଧ୍ୟାରେ ଭଜନ କାର୍ଯ୍ୟକ୍ରମ ଏବଂ ପରେ ପରେ ରାବଣ ଦରବାର ଚାଲିଥିବା ବେଳେ ଆସନ୍ତା ୬ ତାରିଖ ଦିନ ଶ୍ରୀରାମଙ୍କ ବିଗ୍ରହ ସ୍ଥାପନ ହେବ ଏବଂ ୭ ତାରିଖ ଦିନଠାରୁ ୨୪ ପ୍ରହର ନାମଯଜ୍ଞ ଅନୁଷ୍ଠିତ ହେବ ।
