ଶ୍ରୀନଗର : ଜମ୍ମୁ-କଶ୍ମୀରର ଶୋପିଆନରେ ଗ୍ରେନେଡ ଆକ୍ରମଣରେ ଦୁଇ ଜଣ ଶ୍ରମିକଙ୍କ ମୃତ୍ୟୁ ପରେ ଗିରଫ ହୋଇଥିବା ହାଇବ୍ରିଡ ଆତଙ୍କବାଦୀ ଇମ୍ରାନ ବଶିର ଘନିଙ୍କୁ ମଧ୍ୟ ହତ୍ୟା କରାଯାଇଛି । ଏନକାଉଣ୍ଟର ସମୟରେ ତାଙ୍କ ସାଥୀଙ୍କ ଗୁଳିରେ ବଶିରଙ୍କ ମୃତ୍ୟୁ ଘଟିଛି । ଶୋପିଆର ନୌଗାମ ଅଞ୍ଚଳରେ ସାଧାରଣ ନାଗରିକଙ୍କ ହତ୍ୟା ପରେ ଆତଙ୍କବାଦୀ ଏବଂ ସୁରକ୍ଷା ବାହିନୀ ମୁହାଁମୁହିଁ ହୋଇଥିଲେ ।
କଶ୍ମୀର ଜୋନ ପୋଲିସ ବୁଧବାର ଏକ ଟୁଇଟରେ କହିଛନ୍ତି, ଗିରଫ ହାଇବ୍ରିଡ ଆତଙ୍କବାଦୀ ଲୁଚିଥିବା ଇନପୁଟ ଆଧାରରେ ଘେରାବନ୍ଦୀ କରିବା ସହିତ ସର୍ଚ୍ଚ ଅପରେଶନ ଆରମ୍ଭ କରିଥିଲେ ।
ଏନକାଉଣ୍ଟର ସ୍ଥାନରୁ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ସାମଗ୍ରୀ ଜବତ କରାଯାଇଥିବା ପୋଲିସ କହିଛି । ଏହି ଅଞ୍ଚଳରେ ସର୍ଚ୍ଚ ଅପରେଶନ ଜାରି ରହିଛି ।