ଭୁବନେଶ୍ୱର : ଏକବିଂଶ ଶତାବ୍ଦୀରେ ବି ମହାତ୍ମା ଗାନ୍ଧୀ ଅଧିକ ପ୍ରାସଙ୍ଗିକ ହୋଇପାରିଛନ୍ତି । ଯେହେତୁ ବିଶ୍ୱ ଆତଙ୍କବାଦର ଆହ୍ୱାନର ସମ୍ମୁଖୀନ ହେଉଅଛି, ମହାତ୍ମା ଗାନ୍ଧୀଙ୍କ ଆଦର୍ଶ ସବୁଠୁ ଅଧିକ ପ୍ରଯୁଜ୍ୟ ଏବଂ ଏହାର ମୁକାବିଲା ପାଇଁ ଗାନ୍ଧୀ ଉପାୟ ଏକ ପ୍ରକୃତ ବିକଳ୍ପ ବୋଲି ରେଭେନ୍ସା ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ପ୍ରକାଶ ଚନ୍ଦ୍ର ଷଡ଼ଙ୍ଗୀ ମତ ପ୍ରକାଶ କରିଛନ୍ତି ।
ଉତ୍କଳ ବିଶ୍ୱବିଦ୍ୟାଳୟର ରୁସା ଅଧୀନ ଭାଷା, ସାହିତ୍ୟ ଏବଂ ସଂସ୍କୃତି ଉତ୍କର୍ଷ କେନ୍ଦ୍ର ଆନୁକୂଲ୍ୟରେ ଆୟୋଜିତ ‘ସ୍ୱରାଜ ଏବଂ ସମସାମୟିକ ଆହ୍ୱାନ’ ଶୀର୍ଷକ ଏକ ଜାତୀୟ ଆଲୋଚନାଚକ୍ରକୁ ସମ୍ବୋଧିତ କରି ପ୍ରଫେସର ଷଡ଼ଙ୍ଗୀ କହିଛନ୍ତି ଯେ, ମହାତ୍ମା ଗାନ୍ଧୀଙ୍କ ଆଦର୍ଶ ଆଜି ମଧ୍ୟ ପ୍ରାସଙ୍ଗିକ ଅଟେ । ତାଙ୍କର ସ୍ୱରାଜ ମତ କାଳଜୟୀ । ଗାନ୍ଧିଜୀ ସମାଜର ପ୍ରତ୍ୟକ ବର୍ଗର ଉନ୍ନତି ଉପରେ ଧ୍ୟାନ ଦେଉଥିଲେ । “ମୁଁ କହିବି ଗାନ୍ଧିଜୀଙ୍କ ନୀତି ସାମାଜିକ କଲ୍ୟାଣ ବିଷୟରେ ନୁହେଁ ବରଂ ସାମାଜିକ ଏକତା ବିଷୟରେ ଥିଲା । ଆଜି ସମାଜରେ ଧନୀ ଏବଂ ଗରିବଙ୍କ ମଧ୍ୟରେ କୌଣସି ଯୋଗାଯୋଗ ନଥିବା ବେଳେ ଶାନ୍ତି ଏବଂ ସହାର୍ଦ୍ଦ୍ୟ ପାଇଁ ନୂତନ ବିପଦ ସୃଷ୍ଟି ହେଉଛି ବୋଲି ସେ କହିଛନ୍ତି ।
ଉତ୍କଳ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସବିତା ଆଚାର୍ଯ୍ୟ କହିଛନ୍ତି, ‘ଆଜି ଆମେ ସ୍ୱାଧୀନତାର ଗୌରବମୟ ୭୫ ବର୍ଷ ପୂର୍ତ୍ତି ପାଳନ କରୁଛୁ । କିନ୍ତୁ ଆମେ ଏକ ପ୍ରତିଯୋଗିତାମୂଳକ ଦୁନିଆରେ ବାସ କରୁଛୁ ଯେଉଁଠାରେ ସ୍ୱରାଜ ପ୍ରତିଷ୍ଠା କରିବାରେ ପ୍ରତିଦିନ ଆହ୍ୱାନ ଗ୍ରହଣ କରୁଛୁ, ଯେଉଁଠାରେ ମହାତ୍ମା ଗାନ୍ଧୀ ଜଣେ ମହାନ ମଣିଷ ନିଜର ମହାନ ଚିନ୍ତାଧାରା ସହିତ ନିଜ ଜୀବନକୁ ଉତ୍ସର୍ଗ କରିଥିଲେ । ତେଣୁ ଛାତ୍ରଛାତ୍ରୀମାନଙ୍କ ମଧ୍ୟରେ ଆତ୍ମ-ସଶକ୍ତିକରଣ ଏକାନ୍ତ ଆବଶ୍ୟକ ।’
ରାଜ୍ୟସଭାର ପୂର୍ବତନ ଯୁଗ୍ମ ସଚିବ ସତ୍ୟ ନାରାୟଣ ସାହୁ ଦକ୍ଷିଣ ଆଫ୍ରିକାରେ ଅଧ୍ୟୟନ ତଥା ଭାରତୀୟ ସ୍ୱାଧୀନତା ସଂଗ୍ରାମରେ ଗାନ୍ଧୀଙ୍କ ପଦକ୍ଷେପକୁ ମନେ ପକାଇଥିଲେ । ଦାଦାଭାଇ ନାରୋଜି ତାଙ୍କ ପୁସ୍ତକରେ ବ୍ରିଟିଶଙ୍କ ଦ୍ୱାରା ଦେଶରୁ ଧନ ନିଷ୍କାସନ ଉପରେ ତତ୍ତ୍ୱ ଦେଇଥିଲେ । ତାଙ୍କ ବିରୋଧରେ ଦେଶଦ୍ରୋହ ଅଭିଯୋଗ ସତ୍ତ୍ୱେ, ସେ ବ୍ରିଟିଶ ନିୟମ ବିଷୟରେ ପୁସ୍ତକଟି ଲେଖିପାରିଥିଲେ । କାରଣ ବକ୍ତବ୍ୟ ଏବଂ ଅଭିବ୍ୟକ୍ତିର ସ୍ୱାଧୀନତା ହିଁ ସ୍ୱରାଜ । ସେହିଭଳି ଗାନ୍ଧୀ ତାଙ୍କ ଜୀବନରେ ଦେଶଦ୍ରୋହ ଆଇନର ଜଣେ ତୀବ୍ର ସମାଲୋଚକ ଥିଲେ ବୋଲି ସେ କହିଛନ୍ତି ।
ଉଦଘାଟନୀ ସମାରୋହରେ ଅଧ୍ୟକ୍ଷତା କରି ରୁସା ସଂଯୋଜକ ତଥା ସଂସ୍କୃତ ବିଭାଗର ପ୍ରଫେସର ଡକ୍ଟର ସୁଭାଷ ଚନ୍ଦ୍ର ଦାଶ ଅତିଥିମାନଙ୍କୁ ସ୍ୱାଗତ କରିଥିଲେ । ରାଜନୀତି ବିଜ୍ଞାନ ବିଭାଗର ସହକାରୀ ପ୍ରଫେସର ଡକ୍ଟର ସ୍ୱପ୍ନା ପ୍ରଭୁ ଆଲୋଚନାଚକ୍ର ଉପରେ ବର୍ଣ୍ଣନା କରିଥିବା ବେଳେ ଇଂରାଜୀ ସହକାରୀ ପ୍ରଫେସର ଏସ୍ ଦୀପିକା ଧନ୍ୟବାଦ ଅର୍ପଣ କରିଥିଲେ ।