ମୁମ୍ବାଇ : ବଲିଉଡ୍ ଅଭିନେତା ଟାଇଗର ଶ୍ରଫ୍ଙ୍କ ଉପରେ ଗୁଳିମାଡ଼ ଘଟଣାରେ ପୁଲିସକୁ ମିଳିଛି ଆଉ ଏକ ବଡ଼ ସଫଳତା। ମାମଲାରେ ପୂର୍ବରୁ ତିନି ଜଣ ଅଭିଯୁକ୍ତ ଗିରଫ ହୋଇଥିବାବେଳେ, ଏବେ ହରିୟାଣା ପୁଲିସ ସହାୟତାରେ ସମୀର ନାମକ ଆଉ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି। ସେ ଏହି ଆକ୍ରମଣର ମାଷ୍ଟରମାଇଣ୍ଡ ଅନିଲ ପଣ୍ଡିତଙ୍କ ସହଯୋଗୀ ବୋଲି ପୁଲିସ ସୂତ୍ରରୁ ଜଣାପଡ଼ିଛି। ସୂଚନା ଅନୁସାରେ, ଅକ୍ଟୋବର ୧୮ ତାରିଖ ରବିବାର ସନ୍ଧ୍ୟାରେ ମୁମ୍ବାଇର ଜୁହୁ ଅଞ୍ଚଳରେ ଟାଇଗର ଶ୍ରଫ୍ଙ୍କ କାର୍ ଉପରକୁ ସାତ ରାଉଣ୍ଡ ଗୁଳିମାଡ଼ ହୋଇଥିଲା। ଏକ ଫୁଟବଲ୍ ମ୍ୟାଚ୍ ଖେଳି ଟାଇଗର ନିଜ ବିଏମ୍ଡବ୍ଲ୍ୟୁ କାର୍ରେ ଫେରୁଥିବା ସମୟରେ ଏହି ଆକ୍ରମଣ ହୋଇଥିଲା। ଗୁଳି ତାଙ୍କ ଦେହରେ ବାଜି ନଥିବାରୁ ସେ ଅଳ୍ପକେ ବର୍ତ୍ତିଯାଇଥିଲେ। ତେବେ କାର୍ ଚାଳକ ଓ ଜଣେ ପ୍ରଶଂସକ ଆହତ ହୋଇଥିଲେ। ଘଟଣା ପରେ ପୁଲିସ ତଦନ୍ତ ଆରମ୍ଭ କରି କୋଟାରୁ ରେହାନ ଓରଫ ସୁକ୍କା, ଫୁଲ୍ ସିଂ ଓ ହ୍ରିତିକ ନାମକ ତିନି ଅଭିଯୁକ୍ତଙ୍କୁ ଗିରଫ କରିଥିଲା। ଏବେ ଚତୁର୍ଥ ଅଭିଯୁକ୍ତଙ୍କ ଗିରଫଦାରୀ ପରେ ଆକ୍ରମଣ ପଛର ଷଡ଼ଯନ୍ତ୍ର ସମ୍ପର୍କରେ ଅଧିକ ତଥ୍ୟ ସାମ୍ନାକୁ ଆସିବା ଆଶା କରାଯାଉଛି । ପୁଲିସର ସୂଚନା ଅନୁସାରେ, ଅଭିଯୁକ୍ତମାନଙ୍କୁ ଟଙ୍କା ଓ ବିଦେଶରେ ଭଲ ଚାକିରିର ପ୍ରଲୋଭନ ଦିଆଯାଇଥିବା ଅଭିଯୋଗ ରହିଛି । ମାଷ୍ଟରମାଇଣ୍ଡ ଅନିଲ ପଣ୍ଡିତ ବିଦେଶରୁ ଟଙ୍କା ପଠାଉଥିବା ଏବଂ ଅଭିଯୁକ୍ତମାନେ ଯୋଗାଯୋଗ ପାଇଁ ଜାଗି ଆପ୍ ବ୍ୟବହାର କରୁଥିବା ତଦନ୍ତରୁ ଜଣାପଡ଼ିଥିବା କୁହାଯାଉଛି। ଆକ୍ରମଣ ପରେ ତିନି ଅଭିଯୁକ୍ତ ମୁମ୍ବାଇର ଅନ୍ଧେରୀ ରେଳ ଷ୍ଟେସନରେ ପହଞ୍ଚି ଟ୍ରେନ୍ ଯୋଗେ ଫେରାର ହେବାକୁ ଯୋଜନା କରିଥିଲେ। ଏପରିକି ନେପାଳ ପଳାଇବାକୁ ମଧ୍ୟ ଯୋଜନା ଥିବା ସୂଚନା ମିଳିଛି। କିନ୍ତୁ ପୁଲିସ ସେମାନଙ୍କୁ କୋଟାରେ ଧରିବାରେ ସଫଳ ହୋଇଥିଲା। ଅନ୍ୟପଟେ, ଅଭିଯୁକ୍ତମାନେ କିପରି ଅସ୍ତ୍ରଶସ୍ତ୍ର ପାଉଥିଲେ ଏବଂ ଏହି ଆକ୍ରମଣ ପଛରେ ଆଉ କାହାର ହାତ ରହିଛି, ସେନେଇ ପୁଲିସ ତଦନ୍ତ ଜାରି ରଖିଛି। ଚତୁର୍ଥ ଅଭିଯୁକ୍ତଙ୍କ ଗିରଫଦାରୀ ପରେ ମାମଲାରେ ନୂଆ ତଥ୍ୟ ସାମ୍ନାକୁ ଆସିବା ସମ୍ଭାବନା ରହିଛି।