- ଗୃହସ୍ଥ ଜ୍ଞାନ ଏବଂ ଯୋଗ-ଆୟୁର୍ବେଦ କରୋନା ମୁକାବିଲାରେ ବଡ଼ ଭୂମିକା ନିର୍ବାହ କରିଥିଲା : ପ୍ରଧାନମନ୍ତ୍ରୀ
- ଭାରତୀୟ ସ୍ୱସ୍ଥ ଓ ନିରାମୟ ବିଚାର ରୋଗର କେବଳ ଚିକିତ୍ସା ମଧ୍ୟରେ ସୀମିତ ନୁହେଁ : ଶ୍ରୀ ମୋଦୀ
- ଯୋଗ ଓ ଆୟୁର୍ବେଦ ସମଗ୍ର ବିଶ୍ୱକୁ ସେମାନେ ବୁଝୁଥିବା ଭାଷାରେ ଉପସ୍ଥାପିତ କରାଯିବା ଆବଶ୍ୟକ : ପ୍ରଧାନମନ୍ତ୍ରୀ
- ଭାରତକୁ ଆଧ୍ୟାତ୍ମିକ ଓ ସ୍ୱସ୍ଥ ପର୍ୟ୍ୟଟନ ହବରେ ପରିଣତ କରିବା ପାଇଁ ଆହ୍ୱାନ
ନୂଆଦିଲ୍ଲୀ, (ପିଆଇବି) :ଶ୍ରୀରାମଚନ୍ଦ୍ର ମିଶନର ୭୫ତମ ବର୍ଷ ପୂର୍ତ୍ତି ଉତ୍ସବରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଉଦ୍ବୋୀଧନ ଦେଇଛନ୍ତି। ସେ ତାଙ୍କ ଭାଷଣରେ ଜନସାଧାରଣଙ୍କ ମଧ୍ୟରେ ଶାନ୍ତି, ସୁସ୍ଥତା, ନିରାମୟତା, ଆଧ୍ୟାତ୍ମିକତାର ଯଥାର୍ଥ ଭାବନା ସ୍ଥାପନ କରିବାକୁ ଆହ୍ୱାନ ଦେଇଛନ୍ତି । ଯୋଗକୁ ଲୋକପ୍ରିୟ କରିବା ଦିଗରେ ମିଶନ ପକ୍ଷରୁ ଯେଉଁ ଉଦ୍ୟମ ଚାଲିଛି ତାହାକୁ ମଧ୍ୟ ସେ ପ୍ରଶଂସା କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ଆଜିର ଦ୍ରୁତ ଗତିଶୀଳ ଏବଂ ମାନସିକ ଚାପଗ୍ରସ୍ତ ଜୀବନ ଯୋଗୁଁ ମଣିଷ ନାନାପ୍ରକାର ଜୀବନ ଶୈଳୀଗତ ବ୍ୟାଧିର ସମ୍ମୁଖୀନ ହେଉଛି । ଏଭଳି ସ୍ଥିତିରେ ଏସବୁରୁ ରକ୍ଷା ପାଇବା ପାଇଁ ଯୋଗ ଏକ ସହଜ ମାର୍ଗ ଏବଂ ଏହାକୁ ମାଧ୍ୟମ କରି ସମଗ୍ର ବିଶ୍ୱ ସୁସ୍ଥ ଓ ନିରାମୟ ରହିପାରିବ ।
କରୋନା ମହାମାରୀର ମୁକାବିଲା ସଂପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ ଏହି ବ୍ୟାଧି ବିରୋଧରେ ଦେଶର ୧୩୦ କୋଟି ଜନତା ଯେପରି ସତର୍କତା ଅବଲମ୍ବନ କଲେ ତାହା ସମଗ୍ର ବିଶ୍ୱ ପାଇଁ ଏକ ଉଦାହରଣ । କରୋନା ବିରୋଧୀ ଲଢେଇରେ ଗୃହସ୍ଥ ଜ୍ଞାନ ଏବଂ ଯୋଗ ଓ ଆୟୁର୍ବେଦ ଏକ ବଡ଼ ଭୂମିକା ନିର୍ବାହ କରିଥିଲା ।
ସେ କହିଛନ୍ତି ଯେ ବିଶ୍ୱର କଲ୍ୟାଣ ପାଇଁ ଭାରତ ଏକ ମାନବ କୈନ୍ଦ୍ରିକ ଦୃଷ୍ଟିକୋଣ ନେଇ କାମ କରୁଛି । ଏଥିରେ କଲ୍ୟାଣ, ସୁଖସମୃଦ୍ଧି ଏବଂ ସଂପତ୍ତି ମଧ୍ୟରେ ଉପଯୁକ୍ତ ଭାରସାମ୍ୟ ରକ୍ଷା କରାଯାଉଛି । ଗତ ୬ ବର୍ଷ ମଧ୍ୟରେ ଭାରତ ବିଶ୍ୱର ସର୍ବବୃହତ୍ ଜନକଲ୍ୟାଣକାରୀ କାର୍ୟ୍ୟକ୍ରମମାନ ହାତକୁ ନେଇଛି । ଏହାର ପ୍ରଥମ ଲକ୍ଷ୍ୟ ହେଲା ଗରିବ ଲୋକଙ୍କୁ ଏକ ମର୍ୟ୍ୟାଦାପୂର୍ଣ୍ଣ ଜୀବନ ଯୋଗାଇଦେବା ସହ ସେମାନଙ୍କୁ ଉପଯୁକ୍ତ ସୁବିଧା ସୁଯୋଗ ପ୍ରଦାନ କରିବା । ସାର୍ବଜନୀନ ସ୍ୱଚ୍ଛ ଭାରତ କାର୍ୟ୍ୟକ୍ରମଠାରୁ ଆରମ୍ଭ କରି ସାମାଜିକ କଲ୍ୟାଣକାରୀ ଯୋଜନାଗୁଡିକ ଏଥିରେ ସ୍ଥାନ ପାଇଛି । ଆହୁରି ମଧ୍ୟ ଧୂମହୀନ ଚୁଲା, ବ୍ୟାଙ୍କ ନ ଥିବା ଅଞ୍ଚଳରେ ବ୍ୟାଙ୍କିଙ୍ଗ ସୁବିଧା, ସବୁ ଭୂମିହୀନଙ୍କୁ ଘର ଯୋଗାଣ ଆଦି କାର୍ୟ୍ୟକ୍ରମ ମାଧ୍ୟମରେ କୋଟି କୋଟି ଭାରତୀୟଙ୍କ ଜୀବନରେ ସରକାର ଏକ ନୂଆ ରଚନାତ୍ମକ ସ୍ପର୍ଶ ଦେଇଛନ୍ତି ।
ସ୍ୱସ୍ଥତା ଓ ନିରାମୟତା ସଂପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ ଭାରତୀୟ ବିଚାର କେବଳ ଆରୋଗ୍ୟ କରିବାରେ ସୀମିତ ନୁହେଁ, ଏହାର ପରିସର ବ୍ୟାପକ । ଚିକିତ୍ସା ସହିତ ଏହା ରୋଗର ନିରାକରଣ, ଦୂରୀକରଣ ଆଦି ଉପରେ ଭାରତ ଗୁରୁତ୍ୱ ଦେଉଛି । ସେ କହିଛନ୍ତି ଯେ ଭାରତର ଧ୍ୱଜାଧାରୀ ସ୍ୱାସ୍ଥ୍ୟ କାର୍ୟ୍ୟକ୍ରମ ‘ଆୟୁଷ୍ମମାନ ଭାରତ’ର ହିତାଧିକାରୀଙ୍କ ସଂଖ୍ୟା ଆମେରିକା ଓ ଅନେକ ୟୁରୋପ ରାଷ୍ଟ୍ରଙ୍କ ଜନସଂଖ୍ୟାଠାରୁ ଅଧିକ । ଏହା ବିଶ୍ୱର ସର୍ବବୃହତ୍ ସ୍ୱାସ୍ଥ୍ୟ ଯୋଜନା । ଭାରତରେ ମଧ୍ୟ ଡାକ୍ତରୀ ଉପକରଣ ଓ ଔଷଧପତ୍ରର ମୂଲ୍ୟକୁ ହ୍ରାସ କରାଯାଇଛି ।
ପ୍ରଧାନମନ୍ତ୍ରୀ କହିଛନ୍ତି ଯେ ବିଶ୍ୱ ଟିକାକରଣ କାର୍ୟ୍ୟକ୍ରମରେ ଭାରତ ଏକ କେନ୍ଦ୍ରୀୟ ଭୂମିକା ନିର୍ବାହ କରୁଛି । ସ୍ୱସ୍ଥ ଓ ନିରାମୟତା ସଂପର୍କରେ ଆମର ବିଚାର ଦେଶର ନାଗରିକଙ୍କ ପାଇଁ ଯାହା ସମଗ୍ର ବିଶ୍ୱ ପାଇଁ ତାହା ସମାନ । ବିଶ୍ୱର ସ୍ୱାସ୍ଥ୍ୟ ଓ ନିରାମୟତାରେ ଭାରତକୁ ଯଥେଷ୍ଟ କିଛି ଅବଦାନ ଯୋଗାଇବାକୁ ପଡିବ । ଭାରତକୁ ଏକ ଆଧ୍ୟାତ୍ମିକ ଓ ସ୍ୱସ୍ଥ ପର୍ୟ୍ୟଟନ ପରିଣତ କରିବାପାଇଁ ମିଳିତଭାବେ କାମ କରିବାକୁ ସେ ଜନସାଧାରଣଙ୍କୁ ଆହ୍ୱାନ ଜଣାଇଛନ୍ତି । ଭାରତର ଯୋଗ ଓ ଆୟୁର୍ବେଦ ଏକ ସୁସ୍ଥ ପୃଥିବୀ ଗଠନରେ ସହାୟକ ହେବ ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ ଆହୁରି କହିଛନ୍ତି ଯେ ସମଗ୍ର ବିଶ୍ୱ ବୁଝିବା ଭଳି ଭାଷାରେ ଭାରତ ଯୋଗ ଓ ଆୟୁର୍ବେଦକୁ ଉପସ୍ଥାପିତ କରିବା ଆବଶ୍ୟକ ।
ସେ କହିଛନ୍ତି ଯେ ସମଗ୍ର ବିଶ୍ୱ ଏବେ ଯୋଗ ଓ ଧ୍ୟାନ ପ୍ରତି ଅଧିକ ଗୁରୁତ୍ୱ ଦେଉଛି । ଏବେ ଆଧୁନିକ ଜୀବନରେ ଅଧିକ ଆହ୍ୱାନ ଓ କାମର ଚାପ ମାନସିକ ଅବସାଦ ସୃଷ୍ଟି କରୁଛି । ଯୋଗ ଓ ଆୟୁର୍ବେଦ ଏସବୁ ସମସ୍ୟାର ସମାଧାନ କରିପାରିବ ଏବଂ ନାଗରିକ ଶାରୀରିକ ତଥା ମାନସିକଭାବରେ ସୁସ୍ଥସବଳ ରହି ବ୍ୟାଧିମୁକ୍ତ ବିଶ୍ୱ ଗଠନ କରିପାରିବେ । ଏହାଦ୍ୱାରା ଭାରତର ମର୍ୟ୍ୟାଦା ବିଶ୍ୱରେ ବଢିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।