ପଦ୍ମପୁର, (ନିରୋଜ କୁମାର ପାଣୀ) : ବରଗଡ଼ ଜିଲ୍ଲା ପ୍ରଶାସନଙ୍କ ପ୍ରୟାସରେ ଆଜି ଝାରବନ୍ଧ ପଞ୍ଚାୟତ ସମିତି କାର୍ଯ୍ୟାଳୟ ପରିସରରେ ଏକ ସୁସଂଗଠିତ ମିଳିତ ଜନଅଭିଯୋଗ ଶୁଣାଣି ଶିବିର ସଫଳତାର ସହ ଆୟୋଜନ କରାଯାଇଥିଲା । ଏହି ଶିବିରରେ ଜନସାଧାରଣଙ୍କ ସମସ୍ୟା ସମାଧାନ ପାଇଁ ପ୍ରଶାସନର ସକ୍ରିୟ ଏବଂ ସହାନୁଭୂତିଶୀଳ ଭୂମିକା ପ୍ରକାଶ ପାଇଥିଲା । ଜିଲ୍ଲାପାଳ ଆଦିତ୍ୟ ଗୋୟଲ ଓ ଆରକ୍ଷୀ ଅଧୀକ୍ଷକ ପ୍ରହଲ୍ଲାଦ ସହାୟ ମୀନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଶିବିରରେ ବିଭିନ୍ନ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ରହି ଲୋକମାନଙ୍କ ଅଭିଯୋଗ ଶୁଣିଥିଲେ । ସଭାରେ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଲଲାଟ କୁମାର ଲୁହା, ପଦ୍ମପୁର ଉପଜିଲ୍ଲାପାଳ ଶ୍ରୀମତୀ ସ୍ନେହା ଅରୁଗୁଲା, ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କୁବେର ମହନ୍ତ, ଉପଖଣ୍ଡ ଆରକ୍ଷୀ ଅଧୀକ୍ଷକ ପାଣ୍ଡବ ଶବର ଏବଂ ଝାରବନ୍ଧ ବ୍ଲକ ଉନ୍ନୟନ ଅଧିକାରୀ ପର୍ଶୁରାମ ପଣ୍ଡା ମଧ୍ୟ ସକ୍ରିୟ ଭାବେ ଅଂଶଗ୍ରହଣ କରିଥିଲେ । ଶିବିର ସମୟରେ ରାସ୍ତା ଉନ୍ନୟନ, ରାସନ କାର୍ଡ ସମସ୍ୟାର ସମାଧାନ, ପାନୀୟ ଜଳ ସୁବିଧା ସୁଦୃଢ଼କରଣ, ସମିତି ଗ୍ରାଣ୍ଟ ବଣ୍ଟନର ପ୍ରକ୍ରିୟାର ସ୍ପଷ୍ଟତା ଏବଂ ମୁରୁମ କାମର ସୁନିଶ୍ଚିତ ନିର୍ବାହ ଭଳି ମୁଦ୍ଦାଗୁଡ଼ିକୁ ପ୍ରାଧାନ୍ୟ ଦିଆଯାଇଥିଲା । ମୋଟ ୮୩ଟି ଅଭିଯୋଗ ଗ୍ରହଣ କରାଯାଇ ଥିବାବେଳେ, ସେଥିରୁ ୪୮ଟି ବ୍ୟକ୍ତିଗତ ଏବଂ ୩୫ଟି ଗୋଷ୍ଠୀଗତ ଅଭିଯୋଗ ଥିଲା । ପ୍ରତ୍ୟେକ ଅଭିଯୋଗକୁ ଗୁରୁତ୍ୱ ସହିତ ବିଚାର କରାଯାଇ ତତ୍କ୍ଷଣାତ୍ ଆବଶ୍ୟକ ନିର୍ଦ୍ଦେଶ ଜାରି କରାଯାଇଛି । ଜିଲ୍ଲାପାଳ ଆଦିତ୍ୟ ଗୋୟଲ ଜନସାଧାରଣଙ୍କୁ ନିଶ୍ଚିତ କରିଛନ୍ତି ଯେ, ସମସ୍ତ ଅଭିଯୋଗର ସମାଧାନ ପାଇଁ ସମ୍ପୃକ୍ତ ବିଭାଗମାନେ ସମୟୋପଯୋଗୀ ଏବଂ ପ୍ରଭାବଶୀଳ ପଦକ୍ଷେପ ଗ୍ରହଣ କରିବେ । ଏହି ପ୍ରୟାସ ଜନସାଧାରଣଙ୍କ ସହ ପ୍ରଶାସନର ସଂଯୋଗକୁ ଆହୁରି ମଜବୁତ କରିବାରେ ସହାୟକ ହେବ ବୋଲି ସେ କହିଥିଲେ ।