ବ୍ରହ୍ମପୁର ବିମାନ ବନ୍ଦର ଟ୍ରାଫିକ ସମସ୍ୟାର ଶୀଘ୍ର କାର୍ଯ୍ୟ ସମାପ୍ତି କରିବା ପାଇଁ ଓଡ଼ିଏଫକୁ ଗଞ୍ଜାମ ଜିଲ୍ଲାପାଳଙ୍କ ନିର୍ଦ୍ଦେଶ
ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ବ୍ରହ୍ମପୁର ଓ ଗଞ୍ଜାମ ଜିଲ୍ଲାରେ ଚାଲିଥିବା ବିଭିନ୍ନ ବିକାଶ ମୂଳକ କାର୍ଯ୍ୟର ଅଗ୍ରଗତି ସମ୍ପର୍କରେ ଓଡ଼ିଶା ଡେଭେଲପମେଣ୍ଟ ଫୋରମ(ଓଡ଼ିଏଫ୍)ର ସଦସ୍ୟମାନେ ଗଞ୍ଜାମ ଜିଲ୍ଲାପାଳଙ୍କୁ ଭେଟି ଗତକାଲି ଆଲୋଚନା କରିଛନ୍ତି । ରଙ୍ଗେଇଲୁଣ୍ଡା ବିମାନ ବନ୍ଦର, ବ୍ରହ୍ମପୁର ରିଙ୍ଗ ରୋଡ଼, ବାଇପାସ୍ ରୋଡ଼, ଜଗନ୍ନାଥପୁର ଜଙ୍କସନ୍, ଅମ୍ବପୁଆ ରେଲୱେ ଓଭର ବ୍ରିଜ, ଆନ୍ତଃ ରାଜ୍ୟ ବସ୍ ଟର୍ମିନାଲ, ଗେଟ୍ ବଜାର ଓଭର୍ ବ୍ରିଜ, ଆୟୁଷ ଚିକିତ୍ସାଳୟ,ଏମ୍କେସିଜି କ୍ୟାନ୍ସର ହସ୍ପିଟାଲ, ବ୍ରହ୍ମପୁର ପ୍ଲାନେଟୋରିୟମ୍, ଏନ୍ଏଚ୍ ଲାଞ୍ଜିପଲ୍ଲି ଓ ଜଗନ୍ନାଥପୁର ଓଭର୍ ବ୍ରିଜ, ସହର ତଳି ପଞ୍ଚାୟତ ଗୁଡ଼ିକୁ ମହାନଗର ନିଗମରେ ମିଶ୍ରଣ ଏବଂ ସହର ମଧ୍ୟରେ ଅନିୟନ୍ତ୍ରିତ ଟ୍ରାଫିକ ଯନ୍ତ୍ରଣାକୁ ଦୂର କରିବା ପ୍ରଭୃତି ବିଷୟ ଉପରେ ବିସ୍ତୃତ ଆଲୋଚନା ହେବା ସହ ଏହାର ତୁରିତ ସମାଧାନ ପାଇଁ ଦାବିପତ୍ର ପ୍ରଦାନ କରାଯାଇଥିଲା । ବ୍ରହ୍ମପୁର ଓ ଗଞ୍ଜାମ ବାସୀ ଖୁବଶୀଘ୍ର ବିମାନ ସେବା ପାଇବା ନେଇ ଜିଲ୍ଲାପାଳ ପ୍ରତିଶ୍ରୁତି ଦେବା ସହ ବିମାନ ବନ୍ଦରରେ ଚାଲିଥିବା ବିଭିନ୍ନ କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ କରିବା ଏବଂ ଡି.ଜି.ସି.ଏ ଅନୁମତି ପାଇଁ ଆବେଦନ କରାଯିବା, ରିଙ୍ଗ ରୋଡ଼ କାର୍ଯ୍ୟକୁ ଦ୍ରୁତ ଗତିରେ ସାରିବା, ରେଲୱେ ଓଭର ବ୍ରିଜ ଗୁଡ଼ିକୁ ଆସନ୍ତା ମଇ ମାସ ସୁଦ୍ଧା କାର୍ଯ୍ୟକାରୀ, ଫାଷ୍ଟ ଗେଟ୍ ନିକଟେ ସ୍ୱଳ୍ପକାଳୀନ ବସଷ୍ଟାଣ୍ଡକୁ ଆସନ୍ତା ମାସରେ କାର୍ଯ୍ୟକ୍ଷମ ଏବଂ ସହର ମଧ୍ୟରେ ଟ୍ରାଫିକ ସମସ୍ୟାର ସମାଧାନ ପାଇଁ ବିଭିନ୍ନ ସ୍ଥାନରେ ସିଗ୍ନାଲିଙ୍ଗ, ବ୍ୟାରିକେଡ, ଜବରଦଖଲ ହଟାଇବା ସହିତ ଆନୁଷଙ୍ଗିକ ବ୍ୟବସ୍ଥା କରିବାକୁ ସେ ଆଶ୍ୱାସନା ଦେଇଛନ୍ତି । ଏଥିରେ ଓଡ଼ିଶା ଡେଭେଲପମେଣ୍ଟ ଫୋରମ ସଂପାଦକ ଭି. ସୋମେଶ୍ୱର ରାଓ, ଲକ୍ଷ୍ମୀ ନାରାୟଣ ପାଢ଼ୀ, ପ୍ରବୀଣ ପଟ୍ଟନାୟକ, ଦକ୍ଷିଣ ଓଡ଼ିଶା ଛାତ୍ର ସଂଘ (ଏସ୍ଓଏସ୍ଏ)ସଭାପତି ନରସିଂହ ନୀଳମାଧବ ପାତ୍ର, ନିମାଇ ଚରଣ ପଣ୍ଡା ଓ ଅନ୍ୟମାନେ ଉପସ୍ଥିତ ଥିଲେ ।