ସଙ୍ଗୀତା ଓ କନକଙ୍କ ପାଇଁ ପ୍ରଚାରର ମଙ୍ଗ ଧରିଲେ ରାଜସ୍ଥାନ ଉଦୟପୁର ରାଜକୁମାର ଲକ୍ଷରାଜ ସିଂ ମେୱାର ଓ ନିବୃତ୍ତି ସିଂ ମେୱାର
ପାଟଣାଗଡ଼, (ଅଶୋକ କୁମାର ବାଗ) : ପାଟଣାଗଡ଼ ନିର୍ବାଚନ ମଣ୍ଡଳୀ ଦୀର୍ଘ ୨୫ ବର୍ଷ ଧରି ବିଜେପିର ଗଡ଼ ଥିବାବେଳେ ଗତ ୨୦୧୯ ନିର୍ବାଚନରେ ଗଡ଼ଭେଦ କରିବାରେ ସକ୍ଷମ ହୋଇଥିଲା ବିଜେଡି । ବିଜେପି ସେହି ଗଡ଼କୁ ଫେରାଇ ଆଣିବା ପାଇଁ ଜୋର୍ଦାର୍ ପ୍ରୟାସ ଜାରି ରଖିଥିବା ବେଳେ ପ୍ରଚାର ମୈଦାନକୁ ଓହ୍ଲାଇଛନ୍ତି ପାଟଣା ମହାରାଜା କନକ ବର୍ଦ୍ଧନ ସିଂହଦେଓଙ୍କ ଝିଅ ଓ ଜ୍ୱାଇଁ । ପାଟଣାଗଡ଼ ବିଜେପି ବିଧାୟକ ପ୍ରାର୍ଥୀ ତଥା ପାଟଣା ମହାରାଜା କନକ ବର୍ଦ୍ଧନ ସିଂହଦେଓ ଓ ବଲାଙ୍ଗିର ଲୋକସଭା ସାଂସଦ ପ୍ରାର୍ଥୀ ସଙ୍ଗୀତା କୁମାରୀ ସିଂହଦେଓଙ୍କ ପାଇଁ ଭୋଟ ଭିକ୍ଷା କରିବା ପାଇଁ ଆସିଛନ୍ତି ତାଙ୍କ ଜ୍ୱାଇଁ ସୁଦୂର ରାଜସ୍ଥାନ ରାଜ୍ୟ ସ୍ଥିତ ଉଦୟପୁରର ରାଜକୁମାର ଲକ୍ଷରାଜ ସିଂ ମେୱାର ଓ ଝିଅ ନିବୃତ୍ତି ସିଂ ମେୱାର । ଝିଅ ଓ ଜ୍ୱାଇଁ ଦୁହେଁ ବିଧାନସଭା ମଣ୍ଡଳୀର ବିଭିନ୍ନ ଅଞ୍ଚଳ ବୁଲି ଲୋକଙ୍କୁ ଭେଟିବା ସହିତ ବିଭିନ୍ନ ଯାଗାରେ ମହିଳା ସମାବେଶ କରି ଭୋଟ ଭିକ୍ଷା କରୁଛନ୍ତି ।