ବଲାଙ୍ଗିର, (କେପିଏନ୍ଏସ୍) : ଜର୍ମାନୀର ବର୍ଲିନଠାରେ ଅନୁଷ୍ଠିତ ସ୍ଵତନ୍ତ୍ର ଅଲମ୍ପିକ୍ସ ୱାର୍ଲ୍ଡ ଗେମ୍ସ-୨୦୨୩ରେ ଭାଗ ନେଇ ସଟ୍ଫୁଟରେ ରୌପ୍ୟ ପଦକ ହାସଲ କରିଥିବା ବୈଷ୍ଣବ ରାଜପଲିଆଙ୍କୁ ବଲାଙ୍ଗିର ଜିଲ୍ଲା ପ୍ରଶାସନ ସମ୍ବର୍ଦ୍ଧିତ କରିଛି । ଜୁନ ୧୫ରୁ ୨୭ ତାରିଖ ପର୍ଯ୍ୟନ୍ତ ହୋଇଥିବା ଏହି ମହାକୁମ୍ଭରେ ଶ୍ରୀ ରାଜପଲିଆ ରିଲେ ଦୌଡ ଏବଂ ଜାଭେଲିନରେ ମଧ୍ୟ ଚତୁର୍ଥ ସ୍ଥାନ ହାସଲ କରିଥିଲେ । ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ ଚଞ୍ଚଳ ରାଣା ନିଜ ଅଫିସରେ କୋଚ୍ଙ୍କ ସମେତ ୩ ଜଣଙ୍କୁ ସମର୍ଦ୍ଧିତ କରିଛନ୍ତି । କୋଚ୍ ଉମାକାନ୍ତ ଷଡଙ୍ଗୀ, ଝସକେତନ ସାହୁ ମଧ୍ୟ ଉପରୋକ୍ତ ସମ୍ବର୍ଦ୍ଧନା ସଭାରେ ଉପସ୍ଥିତ ଥିଲେ । ଜିଲ୍ଲାପାଳ ଶ୍ରୀ ରାଣା ପୁଷ୍ପଗୁଚ୍ଛ, ଉତ୍ତରୀୟ, ମାନପତ୍ର ଏବଂ ଆର୍ଥିକ ପୁରସ୍କାର ସହ ସମସ୍ତଙ୍କୁ ଶୁଭେଚ୍ଛା ଜଣାଇଥିଲେ । ଶ୍ରୀ ରାଜପାଳିଆଙ୍କୁ ତିରିଶ ହଜାର ଟଙ୍କା, ଶ୍ରୀ ଷଡଙ୍ଗୀଙ୍କୁ ଦଶହଜାର ତଥା ଶ୍ରୀ ସାହୁଙ୍କୁ ପାଞ୍ଚ ହଜାର ଟଙ୍କା ଦେଇ ପୁରସ୍କୃତ କରାଯାଇଥିଲା । ଗୋଷ୍ଠୀ ଉନ୍ନୟନ ଅଧିକାରୀ ଚନ୍ଦ୍ରମଣି ନାଗ, ପ୍ରଧାନ ଶିକ୍ଷକ ଦେବାନନ୍ଦ ସାହୁଙ୍କୁ ମଧ୍ୟ ଏଥିପାଇଁ ଜିଲ୍ଲାପାଳ ପ୍ରଶଂସା କରିଥିଲେ । ଏହା ପୂର୍ବରୁ ଶ୍ରୀ ରାଜପଲିଆ ଓଡିଶାର ରାଜ୍ୟପାଳ, କ୍ରୀଡା ବିଭାଗ ତରଫରୁ ମଧ୍ୟ ସମ୍ବର୍ଦ୍ଧିତ ହୋଇଛନ୍ତି ।
