ସଇଁନ୍ତଲା ପୁଲିସ ପାଇଁ ବଡ଼ ଚ୍ୟାଲେଞ୍ଜ : ଜଙ୍ଗଲ ଭିତରେ ମହିଳାଙ୍କୁ ଜାଳିଦେଇ ହତ୍ୟା, ଅର୍ଦ୍ଧଦଗ୍ଧ ମୃତଦେହ ଉଦ୍ଧାର, ସନ୍ଧାନୀ କୁକୁର ଓ ସାଇନଣ୍ଟିଫିକ୍ ଟିମ୍ର ତଦନ୍ତ ଆରମ୍ଭ
ସଇଁନ୍ତଲା, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ସଇଁନ୍ତଲା ବ୍ଲକ ଘୁନସର ପଂଚାୟତ ଦେଢ଼େଲ ଜଙ୍ଗଲରୁ ଜଣେ ମହିଳାଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର କରିଛି ସଇଁତଲା ପୋଲିସ । ଜଙ୍ଗଲ ଭିତରେ ମହିଳାଙ୍କୁ ଜାଳି ଦେଇ ହତ୍ୟା କରାଯାଇଛି । ମହିଳା ଜଣକ ଠୁରନିକାନି ଗାଁର ରତିନି ରଣା (୫୫) ବୋଲି ଜଣାପଡିଛି । କାହିଁକି ଜଙ୍ଗଲ ଭିତରେ ମହିଳାଙ୍କୁ ଜାଳି ହତ୍ୟା କରାଗଲା, ତାହା ଏଯାଏଁ ସ୍ପଷ୍ଟ ଜଣାପଡିନାହିଁ । ଘଟଣା ସମ୍ପର୍କରେ ଟିଟିଲାଗଡ଼ ଏସ୍ଡିପିଓ ଅଙ୍କିତା କୁମ୍ଭାର, ସଇଁତଲା ଥାନା ଅଧିକାରୀ ଅବନି ସାହୁ, ଏଏସ୍ଆଇ ଥବୀର ମହାରଣା ସମେତ ପୁଲିସ ପ୍ରଶାସନ ଘଟଣା ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି । ସୂଚନା ମତେ ଗତକାଲି ସକାଳୁ ତାଙ୍କର କପା ବିଲକୁ ରତିନି ଆସିଥିଲେ ହେଲେ ଦୀର୍ଘ ସମୟ ପର୍ଯ୍ୟନ୍ତ ଘରକୁ ନ ଆସିବାରୁ ପରିବାର ଲୋକେ ଖୋଜା ଖୋଜି କରିବା ପରେ ଆଜି ସକାଳୁ ସ୍ଥାନୀୟ ଜଙ୍ଗଲରୁ ତାଙ୍କର ଅର୍ଦ୍ଧଦଗ୍ଧ ମୃତଦେହକୁ ଦେଖିବାକୁ ପାଇବା ପରେ ପୁଲିସକୁ ଖବର ଦେଇଥିଲେ । ପରେ ପୁଲିସ ଘଟଣାସ୍ଥଳକୁ ଆସି ତଦନ୍ତ ଆରମ୍ଭ କରିବା ପରେ ତାଙ୍କ ନିକଟରୁ ୨ଟି ଚପଲ, ଗୋଟିଏ ଛୋଟ ଧାରୁଆ ଚକୁ, କିଛି କପଡା ଏବଂ କିଛି ଦୂର ବିଲରୁ କିଛି ମଦ ପାଉଚ ମଧ୍ୟ ଉଦ୍ଧାର କରିଛି । ତେବେ ଏଭଳି ଏକ ଅଭାବନୀୟ ଘଟଣା ଅଂଚଳରେ ଏବେ ଚର୍ଚ୍ଚାର ବିଷୟ ପାଲଟିଛି । ତେବେ ପୋଲିସ ଘଟଣାର ତଦନ୍ତ ଆରମ୍ଭ କରିବା ସହ ଘଟଣାସ୍ଥଳରେ ସାଇନଣ୍ଟିଫିକ ଟିମ୍ ପହଁଚି ତଦନ୍ତ କରୁଥିବା ବେଳେ କାହିଁକି ଏଭଳି ଭାବେ ଜାଳି ଦେଇ ହତ୍ୟା କରାଯାଇଛି ତାହାକୁ ନେଇ ଅନେକ ସନ୍ଦେହ ସୃଷ୍ଟି କରିଛି ।