ମ.ରାମପୁର, (ହେମନ୍ତ ସାହୁ) : ମ.ରାମପୁର ତୁଜୁଙ୍ଗ ଗ୍ରାମ ନିକଟରେ ଗତକାଲି ଏକ ଅଜଣା ଗାଡ଼ି ଧକ୍କାରେ ଜଣେ ସାଇକେଲ ଆରୋହୀଙ୍କ ମୃତ୍ୟୁ ଘଟିଥିବା ଖବର ଜଣାପଡିଛି । ମୃତକ ଜଣକ ହେଲେ ତୁଜୁଙ୍ଗ ଗ୍ରାମର ଯୋଗିନ୍ଦର ନାଗ । ବୟସ ୪୫ ବର୍ଷ ଉପରେ ହେବ ବୋଲି ଜଣାପଡିଛି । ସେ ଜଣେ ଟେଲର ମାଷ୍ଟର । ପ୍ରାପ୍ତ ସୂଚନାରୁ ଜଣାଯାଇଛି ଯେ, ଗତକାଲି ସେ ମ.ରାମପୁରରେ ଖୋଲିଥିବା ନିଜ ଟେଲର ଦୋକାନରୁ ରାତି ପାଖାପାଖି ୯ ଟାରେ ନିଜ ଗାଁ ତୁଜୁଙ୍ଗକୁ ସାଇକେଲରେ ଯାଉଥିଲେ । ଏହି ସମୟରେ ମ.ରାମପୁର – ରିଷିଡ଼ା ରାସ୍ତା ନିଜ ଗାଁ ପାଖରେ ପଛପଟୁ ଏକ ଅଜଣା ଗାଡ଼ି ଧକ୍କା ଦେଇଥିଲା । ଫଳରେ ଜୋରରେ ଗାଡ଼ି ମାଡ ଯୋଗୁଁ ସେ ରାସ୍ତାରୁ ଛିଟିକି ପଡ଼ି ପାଖରେ ଥିବା ବିଲ କଡ଼ରେରେ ପଡ଼ିଥିଲେ । ସାଇକେଲର ପଛ ଚକ ଭାଙ୍ଗି ଚୂର୍ମାର୍ ହୋଇ ଦୁର୍ଘଟଣା ସ୍ଥାନରୁ କିଛି ଦୂରରେ ପଡ଼ିଥିଲା । ଫଳରେ ତାଙ୍କୁ ଆଉ କେହି ରାତିରେ ଦେଖି ପାରିନଥିଲେ । ସେ ରାତିସାରା ସେହି ସ୍ଥାନରେ ପଡ଼ିଥିଲେ ଏବଂ ମୃତ୍ୟୁବରଣ କରିସାରିଥିଲେ । ସକାଳୁ ଲୋକେ ଦେଖି ପୁଲିସକୁ ଖବର ଦେଇଥିଲେ । ପୁଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ କରୁଥିବା ଜଣାପଡିଛି । ମୃତକ ଜଣକ ଅତି ଗରିବ ପରିବାର ହୋଇଥିବା ବେଳେ ସେ ଗୋଟିଏ ଛୋଟିଆ ଟେଲର ଦୋକାନ କରି ନିଜର ପାଞ୍ଚ ପ୍ରାଣୀ କୁଟୁମ୍ବକୁ ଚଳାଉ ଥିଲେ । ଏଣୁ ତାଙ୍କ ପରିବାରକୁ କ୍ଷତିପୂରଣ ଏବଂ ସରକାରୀ ସହାୟତା ଦେବାକୁ ଗ୍ରାମବାସୀ ଦାବୀ କରିଛନ୍ତି ।