ସିତାରଗଞ୍ଜ : ଉତ୍ତରାଖଣ୍ଡର ସିତାରଗଞ୍ଜରେ ଏକ ସ୍କୁଲ ବସ୍ ଓଲଟିବା କାରଣରୁ ୨ ଛାତ୍ରୀଙ୍କର ମୃତ୍ୟୁ ହୋଇଛି । ଏହା ସହିତ ଅନେକ ଆହତ ହୋଇଛନ୍ତି । ଯେଉଁ ସମୟରେ ଦୁର୍ଘଟଣା ହୋଇଥିଲା ସେତେବେଳେ ବସ୍ରେ ୫୧ ଜଣ ଛାତ୍ରୀ ଓ ୭ ଜଣ ସ୍କୁଲ କର୍ମଚାରୀ ଥିଲେ । ପୋଲିସର ତଦନ୍ତ ଅନୁସାରେ, ବସ୍ ଡ୍ରାଇଭର ରଙ୍ଗ୍ ସାଇଡ୍ରେ ଯାଉଥିବା ବେଳେ ଏକ ଟ୍ରକ୍ ସହିତ ମାଡ ହୋଇଥିଲା । ଏହି କାରଣରୁ ବସ୍ଟି ଓଲଟି ପଡିଥିଲା । ଅନ୍ୟପକ୍ଷେ ଆହତଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।
ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ଏହି ଦୁର୍ଘଟଣା ନେଇ ଟ୍ୱିଟ୍ କରିଛନ୍ତି । ସେ କହିଛନ୍ତି, ବୈଧରାମ ସୁଧି ସିଂହ ଗାର୍ଲସ ହାଇସ୍କୁଲର ବସ୍ ଦୁର୍ଘଟଣାଗସ୍ତ ହେବାର ଦୁଃଖଦ ଖବର ଶୁଣି ଖୁବ୍ ମର୍ମାହତ । ଦୁର୍ଘଟଣାରେ ୨ ଜଣ ଛାତ୍ରୀଙ୍କର ମୃତ୍ୟୁ ହୋଇଛି । ପ୍ରଶାସନ ଆହତଙ୍କ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲ ପଠାଇଛି ।
କୁହାଯାଇଛି ଯେ, ଶିଶୁ ଦିବସ ଅବସରରେ ନାନକମାତା ଗୁରୁଦ୍ବାରା ବୁଲିବା ପାଇଁ ଛାତ୍ରଛାତ୍ରୀଙ୍କ ନିଆଯାଇଥିଲା । ସିତାରଗଞ୍ଜରେ ବସ୍ ହଠାତ ଓଲଟିବା କାରଣରୁ ଏହି ଦୁର୍ଘଟଣା ହୋଇଥିଲା । ବସ୍ରେ ୫୧ ଜଣ ଛାତ୍ରୀ ଥିଲେ । ଘଟଣାସ୍ଥଳରେ ଜିଲ୍ଲା ଓ ପୋଲିସ ପହଁଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ।