ବ୍ରହ୍ମପୁର : ଖଲ୍ଲିକୋଟ ଏକକ ବିଶ୍ୱବିଦ୍ୟାଳୟରେ ୧୧୨ଟି ଶିକ୍ଷକ ପଦବୀ ସୃଷ୍ଟି କରାଯାଇଛି । ଏନେଇ ଉଚ୍ଚ ଶିକ୍ଷା ବିଭାଗ ତରଫରୁ ବିଜ୍ଞପ୍ତି ପ୍ରକାଶ ପାଇଛି । ଏଥିରେ ପ୍ରଫେସର, ଆସୋସିଏଟ୍ ପ୍ରଫେସର ଏବଂ ଆସିଷ୍ଟାଣ୍ଟ ପ୍ରଫେସର ପଦବୀ ରହିଛି । ମୋଟ ୧୬ଟି ବିଭାଗରେ ଏହି ୧୧୨ଟି ପଦବୀ ସୃଷ୍ଟି ହୋଇଥିବା ସୂଚନା ମିଳିଛି । ପ୍ରତ୍ୟେକ ବିଭାଗରେ ଜଣେ ପ୍ରଫେସର, ଦୁଇଜଣ ଆସୋସିଏଟ୍ ପ୍ରଫେସର ଏବଂ ୪ଜଣ ଆସିଷ୍ଟାଣ୍ଟ ପ୍ରଫେସରଙ୍କୁ ମିଶାଇ ମୋଟ ୭ଜଣ ନିଯୁକ୍ତି ପାଇବେ । ଏହି ବିଭାଗଗୁଡ଼ିକ ହେଲା ନୃତତ୍ତ୍ବ, ବାୟୋ ଟେକ୍ନୋଲୋଜି, ଉଦ୍ଭିଦ ବିଜ୍ଞାନ, ରସାୟନ ବିଜ୍ଞାନ, ବାଣିଜ୍ୟ, କମ୍ପ୍ୟୁଟର ବିଜ୍ଞାନ ଏବଂ ଏମ୍ସିଏ, ଅର୍ଥନୀତି, ଇଂରାଜୀ, ଶିକ୍ଷା ଏବଂ ବିଏଡ୍, ଭୁତତ୍ତ୍ବ ବିଜ୍ଞାନ, ଇତିହାସ, ଗଣିତ ଏବଂ ପରିସଂଖ୍ୟନ, ଓଡ଼ିଆ, ପଦାର୍ଥ ବିଜ୍ଞାନ, ରାଜନୀତି ବିଜ୍ଞାନ ଏବଂ ପ୍ରାଣୀ ବିଜ୍ଞାନ । ସୂଚନା ଅନୁସାରେ, ଓଡ଼ିଶା ବିଶ୍ୱବିଦ୍ୟାଳୟ ଆଇନ୍-୧୯୮୯ର ଧାରା ୨୧ ଅନୁଯାୟୀ ଏହି ପଦବୀଗୁଡ଼ିକରେ ସିଧାସଳଖ ନିଯୁକ୍ତି ଗ୍ରହଣ କରାଯିବ । ପୂର୍ବରୁ ବିଶ୍ୱବିଦ୍ୟାଳୟରେ ୧୬ଟି ବିଭାଗର ଗୋଟିଏ ଲେଖାଏଁ ପ୍ରଫେସର ପଦବୀ ରହିଥିଲା । ଏଣିକି ଦୁଇଟି ଲେଖାଏଁ ପ୍ରଫେସର ପଦବୀ ରହିବ । ସୂଚନା ଯୋଗ୍ୟ ଯେ, ବିଶ୍ୱବିଦ୍ୟାଳୟରେ ୮୮ଟି ନିୟମିତ ଶିକ୍ଷକ ପଦବୀ ରହିଛି । ସେଥିରୁ ୫୬ଟି ପଦବୀ ଖାଲି ପଡ଼ିଛି । ମାତ୍ର ୩୨ଜଣ ନିୟମିତ ଶିକ୍ଷକ କାର୍ଯ୍ୟ କରୁଛନ୍ତି । ଖାଲି ପଦବୀଗୁଡ଼ିକରେ ଅତିଥି ଅଧ୍ୟାପକଙ୍କୁ ନେଇ ପାଠପଢ଼ା ଚାଲିଛି । ପୂର୍ବରୁ ଖଲ୍ଲିକୋଟ ସ୍ୱୟଂ ଶାସିତ ମହାବିଦ୍ୟାଳୟ ରହିଥିଲା । ଗତ ୨୦୨୧ ମସିହା ମେ’ ୫ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୧୬୬ ବର୍ଷର ଏହି ଶିକ୍ଷାନୁଷ୍ଠାନକୁ ଏକକ ବିଶ୍ୱବିଦ୍ୟାଳୟରେ ପରିଣତ କରିବାକୁ ଘୋଷଣା କରିଥିଲେ ।