ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲାରେ ଜଣେ ବିଶିଷ୍ଟ ଡାକ୍ତର ଭାବରେ ଡା. ରାମଚନ୍ଦ୍ର ହୋତାଙ୍କ ବିଶେଷ ସୁନାମ ରହିଛି । ଆଜି ତାଙ୍କର ୭୪ତମ ଜନ୍ମ ଦିବସ । ଏହି ଅବସରରେ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟୁଥିବା ଦେଖିବାକୁ ମିଳିଛି । ସୂଚନାଯୋଗ୍ୟ ଯେ, ଜଣେ ସ୍ପଷ୍ଟବାଦୀ ତଥା ଜନାଭିମୁଖୀ ଡାକ୍ତର ଭାବରେ ଡା. ହୋତା ବଲାଙ୍ଗିର ସହରରେ ବେଶ୍ ଜଣାଶୁଣା । ଶୃଙ୍ଖଳାର ସହ ଜଣେ ସରକାରୀ ଡାକ୍ତର ଭାବରେ ଚାକିରୀ କାଳ ସମାପ୍ତ କରିବା ପରେ ମଧ୍ୟ ଏବେ ବି ସେ ଲୋକଙ୍କୁ ସ୍ୱାସ୍ଥ୍ୟସେବା ପ୍ରଦାନ ପାଇଁ ନିଜକୁ ପ୍ରତି ମୁହୂର୍ତ୍ତରେ ପ୍ରସ୍ତୁତ ରଖିଛନ୍ତି । ଜୀବନର ଅନେକ ଘାତ ପ୍ରତିଘାତ ସତ୍ୱେ କେମିତି ବଂଚିବାକୁ ହୁଏ ଏବଂ ଜଗତର ସୁନ୍ଦରପଣକୁ ସାଉଁଟି ହୁଏ, ସେ ସଂପର୍କରେ ତାଙ୍କର ବକ୍ତବ୍ୟ ସମୂହ ବେଶ୍ ଜୀବନ୍ମୟ ସବୁବେଳେ । ପ୍ରତ୍ୟହ କିଛି ଗରିବ ରୋଗୀଙ୍କୁ ବିନା ମୂଲ୍ୟରେ ଚିକିତ୍ସା ପ୍ରଦାନ କରିବା ତାଙ୍କର ଏକ ବିଶେଷ ଗୁଣ କହିଲେ କିଛି ଅତ୍ୟୁକ୍ତି ହେବନାହିଁ । ଅର୍ଥ ଉପାର୍ଜନ ଅପେକ୍ଷା ଜୀବନ ଉପାର୍ଜନ ପ୍ରତି ସେ ସର୍ବଦା ଯତ୍ନବାନ । ପ୍ରତ୍ୟେକ ମଣିଷ ଜୀବନକୁ କିଭଳି ନିର୍ଦ୍ଧାରିତ ସମୟ ପର୍ଯ୍ୟନ୍ତ ସୁରକ୍ଷିତ ରଖାଯାଇପାରେ, ସେ ଦିଗରେ ସବୁବେଳେ ଡା. ହୋତା କର୍ମତତ୍ପର । ‘କୋଶଳ ପ୍ରବାହ’ ପରିବାର ଡା. ହୋତାଙ୍କୁ ତାଙ୍କ ୭୪ତମ ଜନ୍ମ ଦିବସ ଅବସରରେ ଅନେକ ଅନେକ ଶୁଭେଚ୍ଛା ଜଣାଇବା ସହ ତାଙ୍କ ସୁସ୍ଥ ଓ ନିରାମୟ ଦୀର୍ଘ ଜୀବନ କାମନା କରୁଛି ।