ଆଠଗଡ଼ : ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିକଟରେ ରାଜ୍ୟ ମହିଳା ବିଜେଡିର ପୁନର୍ଗଠନ କରିଥିବା ବେଳେ ଏଥିରେ ସ୍ଥାନ ପାଇଥିବା ଆଠଗଡ଼ ଏନ୍ଏସିର ପୂର୍ବତନ ଅଧ୍ୟକ୍ଷା ସୁଶ୍ରୀ ସୁବର୍ଣ୍ଣମଞ୍ଜରୀ ଭଞ୍ଜଙ୍କୁ ୭ନଂ ୱାର୍ଡ ପକ୍ଷରୁ ବିପୁଳ ସମ୍ବର୍ଦ୍ଧନା ଜ୍ଞାପନ କରାଯାଇଛି । ବାଣୀକଣ୍ଠନଗରସ୍ଥିତ ସାଇ ମନ୍ଦିର ପରିସରରେ ୭ନଂ ୱାର୍ଡ ମହିଳା ବିଜେଡି ସଭାନେତ୍ରୀ ରଶ୍ମିପ୍ରଭା ମହାନ୍ତିଙ୍କ ସଂଯୋଜନାରେ ଅନୁଷ୍ଠିତ ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ଏନ୍ଏସି ଅଧ୍ୟକ୍ଷା ସସ୍ମିତା ରାଉତ ମୁଖ୍ୟ ଅତିଥି ଭାବେ ଯୋଗଦେଇ ନୂତନ ଭାବେ ମନୋନୀତ ମହିଳା ବିଜେଡି ଉପସଭାପତି ସୁଶ୍ରୀ ଭଞ୍ଜ ଜଣେ ଭଲ ସଂଗଠିକା ହୋଇଥିବାରୁ ଦଳର ମହିଳାମାନଙ୍କୁ ସଂଗଠିତ କରି ଦଳକୁ ତୃଣମୂଳସ୍ତରରେ ମଜବୁତ କରିପାରିବେ ବୋଲି ଆଶାବ୍ୟକ୍ତ କରିଥିଲେ । ସମ୍ମାନିତ ଅତିଥି ଭାବେ ୭ନଂ ୱାର୍ଡ କାଉନସିଲର ମମତା ଦାସ ଯୋଗଦେଇ ସୁଶ୍ରୀ ଭଞ୍ଜ ନିଜର ଦକ୍ଷତା ବଳରେ ଦଳକୁ ସୁସଂଗଠିତ କରିପାରିବେ ଏବଂ ତାଙ୍କୁ ଦଳ ଏପରି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଥିବାରୁ ୭ନଂ ୱାର୍ଡବାସୀଙ୍କ ସମେତ ଆଠଗଡ଼ବାସୀ ଆନନ୍ଦିତ ବୋଲି ପ୍ରକାଶ କରିଥିଲେ । ସମ୍ବର୍ଦ୍ଧନାର ଉତ୍ତରରେ ନବନିଯୁକ୍ତ ରାଜ୍ୟ ମହିଳା ବିଜେଡି ଉପସଭାପତି ସୁଶ୍ରୀ ଭଞ୍ଜ ତାଙ୍କୁ ଏପରି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ସ୍ଥାନୀୟ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ କୃତଜ୍ଞତା ଜଣାଇବା ସହ ନିଷ୍ଠାର ସହିତ ଏହି ଗୁରୁଦାୟିତ୍ୱ ତୁଲାଇବେ ବୋଲି କହିଥିଲେ । ଏହି କାର୍ଯ୍ୟକ୍ରମରେ ୭ନଂ ୱାର୍ଡର ପ୍ରାୟ ୧୫୦ରୁ ଅଧିକ ମହିଳା ଯୋଗ ଦେଇଥିବା ବେଳେ ଶେଷରେ ସରଳା ଶୁକ୍ଳ ଧନ୍ୟବାଦ ଅର୍ପଣ କରିଥିଲେ ।