କୋକସରା : ଆସନ୍ତା ରବି ଋତୁ ଧାନଚାଷ ପାଇଁ କୋକସରା ବ୍ଲକର କୋକସରା ଓ ମାଝୀଗୁଡା ପଞ୍ଚାୟତ ପର୍ଯ୍ୟନ୍ତ ମେଗାଲିଫ୍ଟ କେନାଲରୁ ଜଳସେଚନ ସମ୍ପ୍ରସାରଣ କରିବାକୁ କୋକସରା ବ୍ଲକର ଚାଷୀ ନେତା ଶିବ ପ୍ରସାଦ ପ୍ରଧାନୀ ଓ କୋକସରା ସରପଞ୍ଚ କିଶୋର ଚନ୍ଦ୍ର ପ୍ରଧାନୀଙ୍କ ନେତୃତ୍ୱରେ ଏକ ଚାଷୀ ପ୍ରତିନିଧି ଦଳ ମୁଖୀଗୁଡା ଇନ୍ଦ୍ରାବତୀ ମୁଖ୍ୟ ନିର୍ମାଣ ଯନ୍ତ୍ରୀ ଅନିଲ କୁମାର ପାଣିଗ୍ରାହୀଙ୍କୁ ମଙ୍ଗଳବାର ସାକ୍ଷାତ କରି ଚାଷୀଙ୍କ ହିତକୁ ଦୃଷ୍ଟିରେ ରଖି ଜଳସେଚନ ସୁବିଧା ଯୋଗାଇ ଦେବାକୁ ଅନୁରୋଧ କରିବା ସହ ଲିଖିତ ଦାବୀ କରିଛନ୍ତି । ନିର୍ମାଣ ଯନ୍ତ୍ରୀ ମେଗାଲିଫ୍ଟର ଅଧିକାରୀଙ୍କ ସହ ଆଲୋଚନା କରି ଜଳସେଚନ ସମ୍ପ୍ରସାରଣ କରିବାକୁ ପଦକ୍ଷେପ ନିଆଯିବ ବୋଲି କହିବା ସହ ପ୍ରତିଶ୍ରୁତି ଦେଇଥିଲେ । ବୁଧବାର କୁସୁମଖୁଣ୍ଟିଠାରେ ଥିବା ମେଗାଲିଫ୍ଟ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟରେ ପୁଣିଥରେ ଚାଷୀଙ୍କ ପ୍ରତିନିଧି ଓ ଚାଷୀମାନେ ପହଞ୍ଚି ନିର୍ବାହୀ ଯନ୍ତ୍ରୀ ଅକ୍ଷୟ କୁମାର ଭୋଇ ଓ ସହକାରୀ ଯନ୍ତ୍ରୀ ଅରୁଣ କୁମାର ପ୍ରଧାନଙ୍କୁ ଭେଟି ଆଲୋଚନା କରିଛନ୍ତି । ମେଗାଲିଫ୍ଟ ଡିଏମ୍ ୧୩ ଏ ଗେଟ ପର୍ଯ୍ୟନ୍ତ ଜଳସେଚନ ସୁବିଧା ଯୋଗାଇ ଦିଆଯିବା ନେଇ ଅଧିକାରୀମାନେ ପ୍ରତିଶୃତି ଦେଇଥିବା ନେଇ ଚାଷୀନେତା ପ୍ରକାଶ କରିଛନ୍ତି । ଡିଏମ୍ ୧୩ ପର୍ଯ୍ୟନ୍ତ ଜଳସେଚନ ହେଲେ କୋକସରା ସିର୍ଲିଗୁଡା, ଗଡରାମାଲ, ଚିଲିଗୁଡା, ରେଙ୍ଗାଳପାଲି, ଝରିଆଗୁଡା, ପାଣିଗା, ମାଝୀଗୁଡା, କଚାରପଡା ଗ୍ରାମର ଚାଷୀମାନେ ଉପକୃତ ହେବେ । ଲକ୍ଷ୍ମୀ ନାରାୟଣ ପ୍ରଧାନୀ, ଦୈତାରି ବାରିକ, ରଘୁନାଥ ପଣ୍ଡା, ଜୟଲାଲ ନାଏକ, ଧନେଶ୍ୱର ପଣ୍ଡା, ସୁଦାମ ଗହୀର, ବୁଟୁ ଗୋପାଳ, ମନିଜର ପୋଢ଼ ତୁଲାରାମ ଗହୀର ପ୍ରମୁଖ ଚାଷୀମାନେ ଏହି ପ୍ରତିନିଧି ଦଳରେ ଉପସ୍ଥିତ ରହିଥିଲେ । ମେଗାଲିଫ୍ଟରୁ ପ୍ରଥମ ଥର ପାଇଁ ଅଞ୍ଚଳରେ ରବି ଚାଷକୁ ନେଇ ଚାଷୀଙ୍କ ମଧ୍ୟରେ ଉତ୍ସାହ ଦେଖାଦେଇଛି ।