ସୋନପୁର, (କେପିଏନ୍ଏସ୍) : ଗଞ୍ଜେଇ ଚୋରା ଚାଲାଣ ଅଭିଯୋଗରେ ଆଜି ସୋନପୁର ଅବକାରୀ ବିଭାଗ ପକ୍ଷରୁ ୨ ଜଣଙ୍କୁ ଗିରଫ କରାଯାଇଥିବା ଜଣାପଡିଛି । ଗିରଫ ଅଭିଯୁକ୍ତମାନେ ହେଲେ ବରଗଡ଼ ଜିଲ୍ଲା ବରଗଡ଼ ଥାନା ଅନ୍ତର୍ଗତ ଟଙ୍ଗରପାଲି (ନାଗେନପାଲି) ଗ୍ରାମର ସୁନୀଲ ସାହୁ(୩୧) ଏବଂ ଖଳିଆପାଲି ଗ୍ରାମର ପ୍ରୀତମ ସିଂହ(୩୨) । ଅଭିଯୁକ୍ତମାନଙ୍କ ନିକଟରୁ ଏକ କାର୍ ସହ ୧ କୁଇଣ୍ଟାଲ ୫ କେଜି ଗଞ୍ଜେଇ ଜବତ କରାଯାଇଛି । ସୂଚନା ଅନୁଯାୟୀ ବୌଦ୍ଧ ଜିଲ୍ଲା ମନମୁଣ୍ଡା ପଟରୁ ଏକ କାର୍ରେ ସୋନପୁର ବିନିକା ଦେଇ ଗଞ୍ଜେଇ ଚାଲାଣ ହେଉଥିବା ସମୟରେ ସୋନପୁର ବିନିକା ରାସ୍ତା ଧଉରାଖମନ ଛକରେ ଅଭିଯୁକ୍ତମାନେ ଅବକାରୀ ବିଭାଗ ହାତରେ ଧରାପଡ଼ିଥିଲେ । ଅବକାରୀ ଏସପି ସୁମତି ତ୍ରିପାଠୀଙ୍କ ନିର୍ଦ୍ଦେଶକ୍ରମେ ଏହି ଚଢ଼ାଉରେ ଇନ୍ସପେକ୍ଟର ପ୍ରକାଶ ସା’, ଏସଆଇ ସୁଧୀର ମିଶ୍ର, ଏସଆଇ ବଲବୀର ଗଡ଼ନାୟକ, ଏଏସଆଇ ପୃଥ୍ୱୀରାଜ କହଁର, ଡୋଳାମଣି ପ୍ରଧାନ, ପିଣ୍ଟୁ ସାହୁ ପ୍ରମୁଖ ସାମିଲ ଥିଲେ ।