ନିମାପଡ଼ା, (ଈଶ୍ୱର ମହାରଣା) : ଭାରସ୍ୟାମ ହରାଇ ପୋଖରୀ ଭିତରକୁ ପଶିଗଲା କାର୍ । ଘଟଣା ସ୍ଥଳରେ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ଦୁଇଜଣ ଗୁରୁତର ହୋଇ ଗୋପ ମେଡିକାଲରେ ଚିକିତ୍ସିତ ହେଉଛନ୍ତି । ମୃତକ ନିମାପଡ଼ା ଗୁହାଳପଡା ଅଞ୍ଚଳର ସନ୍ଦୀପ ମହାପାତ୍ର ଓ ପଶ୍ଚିମବଙ୍ଗ ଦାନ୍ତୁନି ଅଞ୍ଚଳର ସନାତନ ସେନାପତି ହୋଇଥିବା ବେଳ ଉଭୟ ଆଜି ପୁରୀରେ ପରୀକ୍ଷା ଦେଇଥାନ୍ତେ । ଗୁରୁତର ଦୁଇଜଣ ମନୀଷ ସେନାପତି ଓ ବାଲିପାଟଣା ଅଞ୍ଚଳର ପୁପୁଲୁ ପରିଡା ବୋଲି ଜଣାପଡ଼ିଛି । ବିଳମ୍ବିତ ରାତିରେ କୋଣାର୍କ ନିମାପଡ଼ା ରାସ୍ତାର ଜୁଣେଇ ସଂଖ ଠାରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି । ସୂଚନା ମୁତାବକ, ୪ ଜଣ ଯୁବକ କୋଣାର୍କ ବୁଲିବାକୁ ଆସିଥିଲେ । କୋଣାର୍କରୁ ନିମାପଡ଼ା ଅଭିମୁଖେ ବିଳମ୍ବିତ ରାତ୍ରରେ ଯାଉଥିବା ବେଳେ ଭାରସାମ୍ୟ ହରାଇ କୋଣାର୍କ ନିମାପଡ଼ା ରାସ୍ତାର ଜୁଣେଇ ସଂଖ ଠାରେ ପୋଖରୀ ଭିତରକୁ କାର୍ ଓଲଟି ପଡିଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ କୋଣାର୍କ ଚମ୍ପାହାର ଅଗ୍ନିଶମ ବାହିନୀ ଏବଂ ପୋଲିସକୁ ଖବର ଦେଇଥିଲେ । ଖବର ପାଇବା ପରେ ଅଗ୍ନିଶମ ବାହିନୀର ଏକ ଟିମ୍ ଆସି ସେମାନଙ୍କୁ ଉଦ୍ଧାର କରି ଗୋପ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ସେଠାରେ ଡାକ୍ତର ଦୁଇଜଣଙ୍କୁ ମୃତ ଘୋଷଣା କରିଥିବା ଜଣାପଡିଛି । ମୃତ ଯୁବକ ଦ୍ୱୟ ଦୁଇ ସାଙ୍ଗ ହୋଇଥିବା ବେଳେ ଗୁରୁବାର ପୁରୀରେ ଲ’ ପରୀକ୍ଷା ଦେଇଥାନ୍ତେ । ହେଲେ ଦୁର୍ଭାଗ୍ୟବଶତଃ କାର୍ ଦୁର୍ଘଟଣାରେ ଯୁବକ ଦ୍ୱୟ ଜୀବନ ହାରିଛନ୍ତି । ଅନ୍ୟପଟେ କାର୍ଟି ପାଣିରେ ବୁଡ଼ି ରହିଥିବା ଜାଣିବା ପରେ କୋଣାର୍କ ପୋଲିସ ଘଟଣା ସ୍ଥଳରେ ପହଞ୍ଚି ଗାଡ଼ି ଉଦ୍ଧାର କରିଛନ୍ତି ।