- ଜିଲ୍ଲା ସ୍ତରୀୟ ଆକାଂକ୍ଷା ହାଟ ଉଦଘାଟିତ
ସୁନ୍ଦରଗଡ଼, (ସସ୍ମିତା ପ୍ରଧାନ) : ଆଜି ଶଙ୍କରା ସ୍ଥିତ କଲ୍ୟାଣ ମଣ୍ଡପଠାରେ ସମ୍ପୂର୍ଣ୍ଣତା ଅଭିଯାନ ସମ୍ମାନ ସମାରୋହ ଅନୁଷ୍ଠିତ ହୋଇଯାଇଛି । ସେହିଭଳି ଆକାଂକ୍ଷା ହାଟ ମଧ୍ୟ ଉଦଘାଟିତ ହୋଇଯାଇଛି । କାର୍ଯ୍ୟକ୍ରମରେ ମାନ୍ୟବର ମନ୍ତ୍ରୀ, ରାଜସ୍ୱଏବଂ ବିପର୍ଯ୍ୟୟ ପରିଚାଳନା ବିଭାଗ, ଓଡ଼ିଶା ସରକାର ସୁରେଶ ପୂଜାରୀ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । କାର୍ଯ୍ୟକ୍ରମରେ ଓଡ଼ିଶା ବିଧାନ ସଭାର ଉପବାଚସ୍ପତି ଭବାନୀ ଶଙ୍କର ଭୋଇ, ବିଧାୟକ ରଘୁନାଥପାଲି ଦୁର୍ଗା ଚରଣ ତନ୍ତୀ, ଜିଲ୍ଲା ପରିଷଦ ଅଧ୍ୟକ୍ଷା ସୁଶ୍ରୀ କୁନ୍ତୀ ପ୍ରଧାନ, ସୁନ୍ଦରଗଡ଼ ପୌରପାଳିକାର ଅଧ୍ୟକ୍ଷା ତନୟା ମିଶ୍ର ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ମୁଖ୍ୟ ଅତିଥି ମନ୍ତ୍ରୀ ଶ୍ରୀ ପୂଜାରୀ ସୁନ୍ଦରଗଡ଼ରେ ବିତାଇଥିବା ନିଜର ଛାତ୍ର ସମୟର ସ୍ମୃତି ଚାରଣ କରିଥିଲେ । ସୁନ୍ଦରଗଡ଼ ଜିଲ୍ଲାରେ ନାରୀ ସଶକ୍ତିକରଣର ବଳିଷ୍ଠ ଝଲକ ରହିଛି । ଏଠାକାର ସ୍ଵୟଂ ସହାୟକ ଗୋଷ୍ଠୀର ମହିଳା ମାନେ ନିଜକୁ ପ୍ରତ୍ୟେକ କ୍ଷେତ୍ରରେ ସଫଳ ଭାବେ ପ୍ରତିପାଦିତ କରି ପାରିଛନ୍ତି । ସେହିଭଳି ସମସ୍ତେ ଏକ ଟିମ୍ ଭାବେ ସମନ୍ଵୟ ରକ୍ଷା କରି ଜିଲ୍ଲାର ବିକାଶ ଦିଗରେ କାର୍ଯ୍ୟ କରିବାକୁ ନିଜ ବକ୍ତବ୍ୟରେ ପ୍ରକାଶ କରିଥିଲେ ।
ସେହିଭଳି ଜିଲ୍ଲାର ଉନ୍ନତି ଦିଗରେ ସମସ୍ତେ ଏକଜୁଟ ହେବା ଏବଂ ଜିଲ୍ଲାକୁ ଉନ୍ନତି ପଥରେ ଆଗେଇ ନେବାକୁ ଅତିଥିମାନେ ନିଜ ଅଭଭାଷଣ ରଖିଥିଲେ । ଏହି କାର୍ଯ୍ୟକ୍ରମରେ ଜିଲ୍ଲାପାଳ ଡ଼ା ଶୁଭଙ୍କର ମହାପାତ୍ର, ଆରକ୍ଷୀ ଅଧିକ୍ଷକ ପ୍ରତ୍ୟୁଷ ଦିବାକର, ଡି ଏଫ୍ ଓ ଖୁସୱନ୍ତ ସିଂ, ଅତିରିକ୍ତ ଜିଲ୍ଲାପାଳ ସୁରଜ ପଟ୍ଟନାୟକ, ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ସୁରଞ୍ଜନ ସାହୁ, ପାନପୋଷ ଉପ ଜିଲ୍ଲାପାଳ ବିଜୟ କୁମାର ନାୟକ, ଆଇ ଏ ଏସ ଶିକ୍ଷାନବିଷ ଫାବୀ ରସିଦ, ସମସ୍ତ ବିଭାଗୀୟ ଅଧିକାରୀ, ବିଭିନ୍ନ ବ୍ଲକରୁ ଆସିଥିବା ସ୍ଵୟଂ ସହାୟକ ଗୋଷ୍ଠୀର ସଭ୍ୟା, ସୁନ୍ଦରଗଡ଼ ଜିଲ୍ଲାରେ ଥିବା ଦୁଇ ଗୋଟି ଆକାଂକ୍ଷା ବ୍ଲକ ଯଥା ନୂଆଗାଁ ଓ ବାଲିଶଙ୍କରାରେ ବିଭିନ୍ନ ସରକାରୀ ଯୋଜନା ଗୁଡ଼ିକର ତୃଣମୂଳ ସ୍ତରରେ କାର୍ଯ୍ୟକାରୀ କରାଯାଇ ସମ୍ପୂର୍ଣ୍ଣତା ଅଭିଯାନର ସଫଳ ରୂପାୟନ କରାଯାଇଛି । ଏହି ଅଭିଯାନ ନିମନ୍ତେ ବିଭିନ୍ନ ସୁଚକାଙ୍କ ବା ଇଣ୍ଡିକେଟର ରହିଛି ଯେମିତିକି ସ୍ୱାସ୍ଥ୍ୟ, ପୋଷଣ, ଶିକ୍ଷା, କୃଷି, ଜଳ ସମ୍ପଦ, ଆର୍ଥିକ ଅନ୍ତର୍ଭୁକ୍ତ କରିବା, ଦକ୍ଷତା ଇତ୍ୟାଦି । ଏହି ସୁଚକାଙ୍କ ଗୁଡ଼ିକୁ ସଫଳତାର ସହ ରୂପାୟନ କରିଥିବାରୁ ନୂଆଗାଁ ବ୍ଲକକୁ ସରକାରଙ୍କ ତରଫରୁ ରୌପ୍ୟ ପଦକ ଏବଂ ବାଲିଶଙ୍କରା ବ୍ଲକକୁ ତାମ୍ର ପଦକ ପ୍ରଦାନ କରାଯାଇଛି । ସେହିଭଳି ଆଜି ଏହି ଅବସରରେ ସଂପୃକ୍ତ ବ୍ଲକରେ ତୃଣମୂଳ ସ୍ତରରେ ଅକ୍ଲାନ୍ତ ପରିଶ୍ରମ କରି ଏହି ସମ୍ପୂର୍ଣାତା ଅଭିଯାନକୁ ସଫଳ କରିଥିବା ଜିଲ୍ଲାସ୍ତରୀୟ ଅଧିକାରୀ ଏବଂ କ୍ଷେତ୍ର କର୍ମଚାରୀମାନଙ୍କୁ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । ସେହିଭଳି ଆଜି ବରେଣ୍ୟ ଅତିଥି ମାନଙ୍କ ଦ୍ଵାରା ଆକାଂକ୍ଷା ହାଟର ମଧ୍ୟ ଶୁଭ ଉଦଘାଟନ ହୋଇଛି ଏବଂ ସମସ୍ତ ଅତିଥିମାନେ ସମସ୍ତ ଷ୍ଟଲ ପରିଦର୍ଶନ କରି ଉତ୍ପାଦିତ ଦ୍ରବ୍ୟ,ସାମଗ୍ରୀ ଗୁଡ଼ିକ ଆଦି ସମ୍ପର୍କରେ ପଚାରି ବୁଝି ଥିଲେ । ଏଥିରେ ଏହି ଦୁଇ ଗୋଟି ଆକାଂକ୍ଷା ବ୍ଲକରୁ ବିଭିନ୍ନ ମହିଳା ସ୍ଵୟଂ ସହାୟକ ଗୋଷ୍ଠୀ ଦ୍ଵାରା ଏବଂ ଅନ୍ୟାନ୍ୟ ବିଭାଗ ଯଥା – କୃଷି, ଉଦ୍ୟାନ କୃଷି, ହସ୍ତଶିଳ୍ପ, ଶିକ୍ଷା, ସ୍ୱାସ୍ଥ୍ୟ, ସମନ୍ଵିତ ଆଦିବାସୀ ଉନ୍ନୟନ ସଂସ୍ଥା, ଓରମାସ ଆଦି ବିଭାଗ ଦ୍ଵାରା ୨୦ ଗୋଟି ଷ୍ଟଲ ସ୍ଥାନିତ ହୋଇଛି । ଏହି ଆକାଂକ୍ଷା ହାଟ ଦ୍ଵାରା ଉତ୍ପାଦକ ମାନେ ନିଜର ଉତ୍ପାଦନକୁ ବିକ୍ରି ପାଇଁ ଏକ ଉତ୍କୃଷ୍ଟ ବଜାର ବ୍ୟବସ୍ଥା ପାଇବେ । ଏହା ଦ୍ୱାରା ସ୍ଥାନୀୟ ସ୍ଵୟଂ ସହାୟକ ଗୋଷ୍ଠୀ, ଚାଷୀ, କାରିଗର, ବୁଣାକାରମାନଙ୍କ ଆର୍ଥିକ ଉନ୍ନତି ଘଟିବା ସହିତ ଉପଭୋକ୍ତାମାନଙ୍କୁ ମଧ୍ୟ ସ୍ଥାନୀୟ ଉତ୍ପାଦ ଗୁଡ଼ିକ ସହଜ ଏବଂ ସୁଲଭ ମୂଲ୍ୟରେ ଉପଲବ୍ଧ ହୋଇପାରିବ । ଏହି ଆକାଂକ୍ଷା ହାଟ ଅଗଷ୍ଟ ୬ ତାରିଖ ପର୍ଯ୍ୟନ୍ତ ଚାଲିବ ।