ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଗଞ୍ଜାମ ଜିଲ୍ଲା ମହକୁମା ଛତ୍ରପୁର ରିଜର୍ଭ ପୋଲିସ ପଡ଼ିଆରେ ୯୦ତମ ଓଡ଼ିଶା ପୋଲିସ ପ୍ରତିଷ୍ଠା ଦିବସ ବର୍ଣ୍ଣାଢ଼୍ୟ ସମାରୋହରେ ପାଳିତ ହୋଇଯାଇଛି ଏଵଂ ସମ୍ମିଳିତ ପ୍ୟାରେଡ୍ ଅନୁଷ୍ଠିତ ହୋଇଥିଲା । ଗଞ୍ଜାମ ଏସ୍.ପି. ଶୁଭେନ୍ଦୁ ପାତ୍ର ମୁଖ୍ୟଅତିଥି ଭାବେ ଯୋଗ ଦେଇ ସମ୍ମିଳିତ ପ୍ୟାରେଡରେ ଅଭିବାଦନ ଗ୍ରହଣ କରିଥିଲେ ଏଵଂ ପୋଲିସ ଜଣେ ଶୃଙ୍ଖଳିତ ସେବକ, ସେମାନଙ୍କର ସମାଜ ସେବା ଓ କର୍ତ୍ତବ୍ୟ ବିଷୟରେ ଉଦବୋଧନ ଦେଇଥିଲେ । ଆଜିର ଦିବସ ଓଡ଼ିଶା ପୋଲିସ ପାଇଁ ଗର୍ବ ଏବଂ ଗୌରବର ଦିବସ ବୋଲି କହିଥିଲେ । ଜନସାଧାରଣଙ୍କ ସେବା ମନୋଭାବ ନେଇ ପୋଲିସ ବାହିନୀ ନିଜକୁ ଉତ୍ସର୍ଗ କରିବା ଉଚିତ । ଏହି ସଙ୍କଳ୍ପ ହିଁ ଶହୀଦଙ୍କ ପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ବୋଲି ଗଞ୍ଜାମ ଏସ୍.ପି. ଶୁଭେନ୍ଦୁ ପାତ୍ର ମତବ୍ୟକ୍ତ କରିଥିଲେ । ପୋଲିସ ଆଇନଶୃଙ୍ଖଳା ରକ୍ଷା କରିବା ସହ ଅପରାଧ ନିୟନ୍ତ୍ରଣ କରିଆସୁଛି । ଲୋକଙ୍କୁ ଉତ୍ତମ ସେବା ଯୋଗାଇବା ପୋଲିସ ପ୍ରଥମ ଧର୍ମ ବୋଲି ଏସ୍ପି କହିଥିଲେ । ଏହି ଅବସରରେ ଓଡ଼ିଶାର ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ବାର୍ତ୍ତାକୁ ଏସ୍.ପି. ସାର୍ ପଠନ କରିଥିଲେ । ସମାରୋହରେ ରିଜର୍ଭ ଇନ୍ସପେକ୍ଟର ଅମୁଲ୍ୟ କୁମାର ନାୟକଙ୍କ ତତ୍ତ୍ୱାବଧାନରେ ପରେଡ ପରିଚାଳନା କରାଯାଇଥିଲା । କର୍ତ୍ତବ୍ୟନିଷ୍ଠା ଓ ସାହସିକତା କ୍ଷେତ୍ରରେ ଉଲେଖନୀୟ କାର୍ଯ୍ୟ କରିଥିବା ଗଞ୍ଜାମ ଜିଲା ପୋଲିସର ୫ଜଣ ପୋଲିସ କର୍ମଚାରୀଙ୍କୁ ଏସ୍ପି ସମ୍ମାନିତ କରି ପୁରସ୍କୃତ କରିଥିଲେ । ସେମାନେ ହେଲେ ଏସ୍.ଆଇ. ଶୁଭ୍ରଜିତ ସାମନ୍ତରାୟ, ଏ.ଏସ୍.ଆଇ. ସୁମନ୍ତ କୁମାର ବେହେରା, ହାବିଲଦାର ବି. କାମରାଜୁ ଦୋରା, ଏପିଆର କନେଷ୍ଟବଳ ଟୁନା ମଲିକ ଓ କନେଷ୍ଟବଳ ଦିଲ୍ଲୀପ କୁମାର ବେହେରାଙ୍କୁ ଗଞ୍ଜାମ ଏସ୍.ପି. ଶୁଭେନ୍ଦୁ ପାତ୍ର ଅର୍ଥ ରାଶି ଟଙ୍କା ସହ ପୁରସ୍କୃତ କରିଥିଲେ । କାର୍ଯ୍ୟକ୍ରମରେ ଅତିରିକ୍ତ ଏସ୍ପି ଚିନ୍ମୟ କୁମାର ନାୟକ, ହାବିଲଦାର ଓ କନଷ୍ଟେବଲ ସଂଘର ସଭାପତି ଗୋରାଚାନ୍ଦ ତ୍ରିପାଠୀ । ସମ୍ପାଦକ ସୁବାସ ସେଠୀଙ୍କ ସମେତ ବହୁ ପୋଲିସ କର୍ମଚାରୀ, ବହୁ ଜିଲ୍ଲାସ୍ତରୀୟ ପୋଲିସ୍ ପଦାଧିକାରୀ ଉପସ୍ଥିତ ରହି ସକ୍ରୀୟ ସହଯୋଗ କରିଥିଲେ ।