- ଲେଖନୀ ଚାଳନା ପାଇଁ ବୟସ ଆଦୌ ପ୍ରତିବନ୍ଧକ ନୁହେଁ
ଭବାନୀପାଟଣା, (କେପିଏନ୍ଏସ୍) : ସ୍ଥାନୀୟ ସରସ୍ୱତୀ ଶିଶୁ ବିଦ୍ୟାମନ୍ଦିର, ବାଲାଜୀ ବିହାରଠାରେ ଶ୍ରୀରୂପା ପବ୍ଲିକେସନ୍ସ, ଭବାନୀପାଟଣା ତରଫରୁ ଲେଖିକା ହରିପ୍ରିୟା ଠାକୁରଙ୍କ ପ୍ରଥମ ଉପନ୍ୟାସ “ନୀଳୋତ୍ପଳା” ଲୋକାର୍ପିତ ହୋଇଯାଇଛି । ବହୁ ଚର୍ଚ୍ଚିତ ଲେଖକ ଓ କବିଙ୍କ ଗହଣରେ ଅନୁଷ୍ଠିତ ଏହି କାର୍ଯ୍ୟକ୍ରମରେ କଳାହାଣ୍ଡି ଜିଲ୍ଲା ବିଭିନ୍ନ ଅଞ୍ଚଳର ସାହିତ୍ୟ ପିପାସୁ ବ୍ୟକ୍ତି ବିଶେଷ ଯୋଗଦେଇଥିଲେ । କଥାକାର ସୁକାନ୍ତ ସାହୁଙ୍କ ସଭାପତିିିତ୍ୱରେ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ପ୍ରସିଦ୍ଧ ଅନୁବାଦକ, ଓଡ଼ିଶା ସାହିତ୍ୟ ଏକାଡ଼େମୀ ପୁରସ୍କାର ପ୍ରାପ୍ତ ଲେଖକ ବିଜୟ କୁମାର ପ୍ରଧାନ ଯୋଗଦେଇଥିବା ବେଳେ ସମ୍ମାନିତ ଅତିଥିଭାବେ ଅଧ୍ୟାପକ ଓ କବି ରବି ଶତପଥୀ, ମୁଖ୍ୟବକ୍ତାଭାବେ ବରିଷ୍ଠ ନାଟ୍ୟକାର ତଥା ଶିକ୍ଷାବିତ ଉମେଶ ଚନ୍ଦ୍ର ଶତପଥୀ, ସମୀକ୍ଷକ ଭାବେ ଗବେଷକ, ଅଧ୍ୟାପକ ତଥା ନାଟ୍ୟକାର ପରମେଶ୍ୱର ମୁଣ୍ଡ ଯୋଗଦେଇଥିଲେ । କାର୍ଯ୍ୟକ୍ରମ ପରଚାଳନା କରିଥିଲେ ସୁଖ୍ୟାତ ବ୍ୟଙ୍ଗକବି ବିରଞ୍ଚି ନାରାୟଣ ମୁଣ୍ଡା ମଂଚାସୀନ ଥିଲେ । ନୀଳୋତ୍ପଳାର ଲେଖିକା ହରିପ୍ରିୟା ଠାକୁର ଓ ତାଙ୍କ ସ୍ୱାମୀ ଗୌରୀଶଙ୍କର ପଣ୍ଡା । ୪୨୨ ପୃଷ୍ଠା ଏହି ସୁଦୃଶ୍ୟ ଉପନ୍ୟାସଟି ୫୦ ବର୍ଷ ତଳର କଳାହାଣ୍ଡିର ଜନଜୀବନର କାହାଣୀ କହେ । ଉପନ୍ୟାସଟିରେ ତତ୍କାଳୀନ କଳାହାଣ୍ଡି ସମାଜ ବ୍ୟବସ୍ଥା, ଶିକ୍ଷା, ସ୍ୱାସ୍ଥ୍ୟ, ଯୋଗାଯୋଗ ବ୍ୟବସ୍ଥାର ଚିତ୍ର ଅତି ନିଖୁଣ ଭାବରେ ଚିତ୍ରିତ ହୋଇଥିବା କଥା ଅତିଥିମାନେ ତାଙ୍କ ବକ୍ତବ୍ୟରେ ପ୍ରକାଶ କରିଥିଲେ । ଖୁବ୍ ସରଳ ଓ ସାଧାରଣ ଭାଷାରେ ରଚିତ ଏହି ଉପନ୍ୟାସଟି ପାଠକଙ୍କୁ ବାନ୍ଧି ରଖିବାର ସମସ୍ତ କଳା ରଖିଛି । ୭୫ ବର୍ଷ ବୟସରେ ଲେଖିକାଙ୍କର ପ୍ରଥମ ସାହିତ୍ୟ କୃତୀ ନୀଳୋତ୍ପଳା ପ୍ରକାଶ ପାଇଥିବାରୁ ତରୁଣ ଲେଖକଙ୍କ ମଧ୍ୟରେ ପ୍ରବଳ ଉତ୍ସାହ ପ୍ରକାଶ ପାଇଛି । ଲେଖାଲେଖି କରିବା ପାଇଁ ବୟସ ଏକ ପ୍ରତିବନ୍ଧକ ନୁହେଁ ବୋଲି ଲେଖିକା ପ୍ରମାଣିତ କରିଦେଇଛନ୍ତି ବୋଲି ମୁଖ୍ୟ ଅତିଥି ଶ୍ରୀ ପ୍ରଧାନ କହିଥିଲେ । ଶ୍ରୀ ପ୍ରଧାନ ନିଜେ ୭୧ ବର୍ଷରେ ମଧ୍ୟ ଲେଖାଲେଖିକୁ ନେଇ ବ୍ୟସ୍ତ ରହୁଥିବା କଥା କହିଛନ୍ତି । ଆହୁରି ମଧ୍ୟ ବହୁ ବର୍ଷିୟାନ ଲେଖକଙ୍କ ଉଦାହରଣ ଦେଇ କହିଥିଲେ ଯେ ଲେଖାଲେଖି ପାଇଁ ପ୍ରଚୁର ଅଭିଜ୍ଞତା ଓ ଅନୁଭବ ଦରକାର । ଏ ସଂସାରର ସବୁ ମଣିଷ ଜଣେ ଜଣେ ସାରସ୍ୱତ ସ୍ରଷ୍ଟା ବୋଲି ଅତିଥିମାନେ ବକ୍ତବ୍ୟ ମାଧ୍ୟମରେ ମତ ରଖିଥିଲେ । ନୀଳୋତ୍ପଳା ବିପୁଳ ପାଠକୀୟ ଶ୍ରଦ୍ଧା ପାଇବ ବୋଲି ସମସ୍ତେ କାମନା କରିଥିଲେ ।