ବାଲିଅନ୍ତା : କମିସନରେଟ ପୁଲିସ ପାହାଳ ଥାନା ଅନ୍ତର୍ଗତ ୪ ନମ୍ବର ୱାର୍ଡ ନହରକଣ୍ଟା ଅଞ୍ଚଳରେ ଶୁକ୍ରବାର ରାତିରେ ଗଣେଶ ମୂର୍ତ୍ତି ଭସାଣ ଶୋଭାଯାତ୍ରାକୁ ନେଇ ଗଣ୍ଡଗୋଳ ଘଟିଛି । ଢେଲା ପଥର ମାଡ଼ ହୋଇଥିବା ବେଳେ ୫ରୁ ଅଧିକ ବ୍ୟକ୍ତି ଆହତ ହୋଇଛନ୍ତି । ଉତ୍ତେଜନା ଲାଗି ରହିଥିବା ବେଳେ ଘଟଣାସ୍ଥଳରେ ପୁଲିସ ଉପସ୍ଥିତ ରହିଥିଲା ।
ପୁଲିସଠାରୁ ମିଳିଥିବା ସୂଚନା ଅନୁସାରେ ନହରକଣ୍ଟା ଗଡ଼ସାହିର ଗଣେଶ ମେଢ଼ ଭସାଣ ଶୋଭାଯାତ୍ରା ଚାଲିଥିବା ବେଳେ ଅନ୍ୟ ଏକ ସାହିର ଶୋଭାଯାତ୍ରା ଗଡ଼ସାହି ଭିତରେ ପ୍ରବେଶ କରିଥିଲା । ଏହି ସମୟରେ ଉଭୟ ପକ୍ଷ ଶୋଭାଯାତ୍ରାକାରୀଙ୍କ ମଧ୍ୟରେ ବଚସା ହୋଇଥିଲା । କିଛି ଲୋକ ଶୋଭାଯାତ୍ରାକୁ ବିରୋଧ କରିଥିଲେ । ଏହାକୁ ନେଇ ଉଭୟ ପକ୍ଷ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା । କ୍ରମଶଃ ଘଟଣା ଉଗ୍ରରୂପ ଧାରଣ କରିଥିଲା । ହାତାହାତି ଓ ଢେଲା ପଥର ମାଡ଼ରେ ୫ରୁ ଅଧିକ ବ୍ୟକ୍ତି ଆହତ ହୋଇଥିବା ବେଳେ ପରିସ୍ଥିତି ଅଣାୟତ୍ତ ହୋଇଥିଲା । ସହକାରୀ ପୁଲିସ ଆୟୁକ୍ତ, ପୁଲିସ ସଦଳବଳେ ପହଞ୍ଚି ପରିସ୍ଥିତି ଆୟତ୍ତ କରିବାକୁ ଚେଷ୍ଟା କରିଥିଲେ । ରିପୋର୍ଟ ଲେଖା ହେବା ବେଳକୁ ଉତ୍ତେଜନା ଲାଗି ରହିଛି । ଘଟଣାସ୍ଥଳରେ ପୁଲିସ ମୁତୟନ ରହିଥିବା ସୂଚନା ମିଳିଛି । ପ୍ରକାଶ ଯୋଗ୍ୟ ଯେ, ଗତ ମାର୍ଚ୍ଚ ମାସରେ ଏକ ଯଜ୍ଞାନୁଷ୍ଠାନକୁ ନେଇ ଉଭୟ ପକ୍ଷ ମଧ୍ୟରେ ବିବାଦ ଦେଖା ଦେଇଥିଲା । ତତ୍କାଳୀନ ପୁଲିସ ଅଧିକାରୀ ଏହାର ସମାଧାନ କରିଥିଲେ । ତେବେ ପୂର୍ବ ବିବାଦକୁ ନେଇ ଏପରି ଘଟଣା ଘଟିଥିବା କୁହାଯାଉଛି ।