ବେଲପଡା, (ଅଶୋକ କୁମାର ବାଗ) : ପାଟଣାଗଡରେ ସାଧାରଣ ନିର୍ବାଚନ ଯେତିକି ପାଖେଇ ଆସୁଛି ପାଟଣାଗଡ଼ ନିର୍ବାଚନ ମଣ୍ଡଳୀରେ ବିଜେଡି ବିଧାୟକଙ୍କ ଲୋକପ୍ରିୟତା ବଢ଼ି ଚାଲିଛି । ଥରକୁ ଥର କର୍ମୀ ସମ୍ମିଳନୀ ଓ ମହିଳା ସମାବେଶ କରି ହଜାର ହଜାର ସଂଖ୍ୟାରେ ଲୋକଙ୍କ ସମାଗମ ଦେଖାଇ ବିଧାୟକ ସରୋଜ କୁମାର ମେହେର ନିଜର ଦବଦବା ଦେଖାଉଛନ୍ତି । ପ୍ରଥମେ ପାଟଣାଗଡ଼ ବ୍ଳକ ପରେ ଖପ୍ରାଖୋଲ ତାପରେ ବେଲପଡା ବ୍ଲକରେ କାର୍ଯ୍ୟକ୍ରମ କରି ଜନସମ୍ପର୍କ କରିସାରିଥିବା ବେଳେ ରବିବାର ବଲାଙ୍ଗିର ଜିଲ୍ଲା ପାଟଣାଗଡ଼ ନିର୍ବାଚନ ମଣ୍ଡଳୀର ବେଲପଡା ବ୍ଲକ ବେଲପଡା ଜୋନ୍ ଅନ୍ତର୍ଗତ କାନୁଟ ହାଇସ୍କୁଲ୍ ଖେଳ ପଡିଆଠାରେ ବିଜୁ ଜନତାଦଳ ପକ୍ଷରୁ ମହିଳା ସମାବେଶ ଓ କର୍ମୀ ସମ୍ମିଳନୀ ଅନୁଷ୍ଠିତ ହୋଇଥିଲା । ଏଥିରେ ମୁଖ୍ୟ ଅତିଥି ଭାବେ ପାଟଣାଗଡ଼ ବିଧାୟକ ସରୋଜ କୁମାର ମେହେର ଯୋଗଦେଇ କାର୍ଯ୍ୟର ଶୁଭାରମ୍ଭ କରିଥିଲେ । ମୁଖ୍ୟ ଅତିଥି ନିଜ ବକ୍ତବ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକାଭିମୁଖୀ ଯୋଜନା ବିଷୟରେ ଲୋକମାନଙ୍କୁ ଜଣାଇଥିଲେ ଏବଂ ସରକାରୀ କର୍ମଚାରୀଙ୍କ ଦରମା ବୃଦ୍ଧି ବିଷୟରେ କହିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଷଷ୍ଠ ଥର ପାଇଁ ମୁଖ୍ୟମନ୍ତ୍ରୀ କରି ବିଶ୍ୱ ବିଖ୍ୟାତ କରାଇବା ପାଇଁ ଜନସାଧାରଣଙ୍କୁ ଆହ୍ୱାନ ଦେଇଛନ୍ତି ବିଧାୟକ ଶ୍ରୀ ମେହେର । ଉକ୍ତ କାର୍ଯ୍ୟକ୍ରମରେ ବେଲପଡା ଜୋନ୍ର ହଜାର ହଜାର ପୁରୁଷ ଓ ମହିଳା ଯୋଗଦାନ କରି କାର୍ଯ୍ୟକୁ ସାଫଲ୍ୟ ମଣ୍ଡିତ କରିଥିଲେ । କାର୍ଯ୍ୟକ୍ରମ ମାନଙ୍କରେ ଲୋକ ସଂଖ୍ୟା ଦେଖି ଆଗାମୀ ନିର୍ବାଚନରେ ପାଟଣାଗଡ଼ ନିର୍ବାଚନ ମଣ୍ଡଳୀରେ ବିଧାୟକ ସରୋଜ କୁମାର ମେହେରଙ୍କ ବିଜୟ ସୁନିଶ୍ଚିତ ବୋଲି ଜନସାଧାରଣରେ ଚର୍ଚ୍ଚା ହେଉଛି ।