କ୍ରିକେଟ୍ କିମ୍ବଦନ୍ତୀ ଏବଂ ଭାରତ ରତ୍ନ ସଚିନ୍ ତେନ୍ଦୁଲକର ନିର୍ବାଚନ କମିଶନଙ୍କ ରାଷ୍ଟ୍ରୀୟ ଆଇକନ ଭାବରେ ନିଜର ଇନିଂସ ଆରମ୍ଭ କରିଛନ୍ତି
- ଅଧିକରୁ ଅଧିକ ମତଦାନ ପାଇଁ ଭୋଟରମାନଙ୍କୁ ସଚେତନ କରିବେ
- କ୍ରିକେଟ୍ ମ୍ୟାଚ ସମୟରେ ଯେଉଁ ହୃଦୟ ଟିମ୍ ଇଣ୍ଡିଆ ପାଇଁ ସ୍ପନ୍ଦିତ ହେଉଥିଲା, ମତଦାନ କରି ଗଣତନ୍ତ୍ରକୁ ଆଗକୁ ନେବା ଦିଗରେ ସେହିପରି ସ୍ପନ୍ଦିତ ହେବ : ସଚିନ ତେନ୍ଦୁଲକର
- ତେନ୍ଦୁଲକର ଅଧିକରୁ ଅଧିକ ଭୋଟରଙ୍କୁ ଭୋଟ୍ ଦେବା ପାଇଁ ପ୍ରେରିତ କରିବାରେ ଆଦର୍ଶ ବିକଳ୍ପ ଅଟନ୍ତି : ମୁଖ୍ୟ ନିର୍ବାଚନ କମିଶନର ରାଜୀବ କୁମାର
ନୂଆଦିଲ୍ଲୀ, (ପିଆଇବି) : କ୍ରିକେଟ୍ କିମ୍ବଦନ୍ତୀ ତଥା ଭାରତ ରତ୍ନ ପୁରସ୍କାର ପ୍ରାପ୍ତ ସଚିନ୍ ତେନ୍ଦୁଲକର ଆଜି ଏକ ନୂତନ ଇନିଂସ ଆରମ୍ଭ କରିଛନ୍ତି । ଭାରତର ନିର୍ବାଚନ ଆୟୋଗ ଲାଗି ଭୋଟର ସଚେତନତା ସୃଷ୍ଟି କରିବା ପାଇଁ ‘ଜାତୀୟ ଆଇକନ୍’ ଭାବରେ ନିଜର ଦାୟୀତ୍ବ ଆରମ୍ଭ କରିଛନ୍ତି। ମୁଖ୍ୟ ନିର୍ବାଚନ କମିଶନର ଶ୍ରୀ ରାଜୀବ କୁମାର ଏବଂ ନିର୍ବାଚନ କମିଶନର ଶ୍ରୀ ଅନୁପ ଚନ୍ଦ୍ର ପାଣ୍ଡେ ଏବଂ ଶ୍ରୀ ଅରୁଣ ଗୋଏଲଙ୍କ ଉପସ୍ଥିତିରେ ନୂଆଦିଲ୍ଲୀର ଆକାଶବାଣୀ ରଙ୍ଗ ଭବନରେ ଆୟୋଜିତ ଏକ କାର୍ଯ୍ୟକ୍ରମରେ 3 ବର୍ଷ ପାଇଁ ଏକ ଏମଓୟୁ ସ୍ୱାକ୍ଷରିତ ହୋଇଥିଲା । ଏହି ସହଯୋଗ ଆଗାମୀ ନିର୍ବାଚନ, ବିଶେଷ କରି ସାଧାରଣ ନିର୍ବାଚନ 2024 ରେ ଭୋଟରଙ୍କ ଅଂଶଗ୍ରହଣ ବୃଦ୍ଧି କରିବା ପାଇଁ ଯୁବକମାନଙ୍କ ଉପରେ ତେନ୍ଦୁଲକରଙ୍କ ଅଦ୍ବିତୀୟ ପ୍ରଭାବର ଲାଭ ଉଠାଇବା ଦିଗରେ ଏକ ମହତ୍ତ୍ବପୂର୍ଣ୍ଣ ପଦକ୍ଷେପ ଅଟେ । ଏହି ସହଯୋଗ ମାଧ୍ୟମରେ ଭାରତ ନିର୍ବାଚନ ଆୟୋଗର ଉଦ୍ଦେଶ୍ୟ ନାଗରିକମାନଙ୍କୁ ବିଶେଷ ଭାବରେ ଯୁବକମାନଙ୍କୁ ଏବଂ ସହରୀ ଜନସଂଖ୍ୟାକୁ ଭୋଟ ଦେବା ପାଇଁ ସଚେତନ କରିବା, ଯଦ୍ବାରା ସହରୀ ଏବଂ ଯୁବ ଉଦାସୀନତାର ଆହ୍ବାନକୁ ସମାଧାନ କରାଯାଇପାରିବ ।
ସଚିନ ତେନ୍ଦୁଲକର, ଭାରତର ନିର୍ବାଚନ ଆୟୋଗ ପାଇଁ ଜାତୀୟ ଆଇକନ୍ ଭାବରେ ତାଙ୍କର ଉତ୍ସାହ ଏବଂ ପ୍ରତିବଦ୍ଧତା ପ୍ରକାଶ କରି କହିଛନ୍ତି ଯେ ଭାରତ ଭଳି ଏକ ଗଣତନ୍ତ୍ର ପାଇଁ ଯୁବକମାନେ ରାଷ୍ଟ୍ର ନିର୍ମାଣରେ ପ୍ରମୁଖ ଭୂମିକା ଗ୍ରହଣ କରୁଛନ୍ତି । କ୍ରୀଡା ମ୍ୟାଚ୍ ସମୟରେ ଯେଉଁ ହୃଦୟ ଟିମ ଇଣ୍ଡିଆ ପାଇଁ ଏକ ସ୍ବରରେ ‘ଇଣ୍ଡିଆ, ଇଣ୍ଡିଆ!’ ର ଜୟକାର ସହିତ ସ୍ପନ୍ଦିତ ହୋଇଥାଏ, ତାହା ଆମର ଅମୂଲ୍ୟ ଗଣତନ୍ତ୍ରକୁ ଆଗକୁ ନେବା ପାଇଁ ସେହିପରି ଭାବରେ ସ୍ପନ୍ଦିତ ହେବ । ଏପରି କରିବାର ଏକ ସରଳ କିନ୍ତୁ ସବୁଠାରୁ ଶକ୍ତିଶାଳୀ ଉପାୟ ହେଉଛି ସର୍ବଦା ନିଜର ମତାମତ ଭୋଟ୍ ମାଧ୍ୟମରେ ପ୍ରଦାନ କରିବା ।
ଏହି ଅବସରରେ ସେ କହିଛନ୍ତି ଯେ ଷ୍ଟାଡିୟମ ଠାରୁ ଆରମ୍ଭ କରି ଜନଗହଳିପୂର୍ଣ୍ଣ ମତଦାନ ବୁଥ ପର୍ଯ୍ୟନ୍ତ, ଜାତୀୟ ଦଳ ପାଖରେ ଠିଆ ହେବା ଠାରୁ ଆରମ୍ଭ କରି ଆମର ଭୋଟ୍ ଦେବା ପାଇଁ ସମୟ ବାହାର କରିବା ପର୍ଯ୍ୟନ୍ତ ଆମେ ଆଗ୍ରହ ଓ ଉତ୍ସାହର ସହିତ ଏଥିରେ ସାମିଲ୍ ହେବା ଆବଶ୍ୟକ । ଯେତେବେଳେ ଦେଶର କୋଣ ଅନୁକୋଣରୁ ଯୁବକମାନେ ନିର୍ବାଚନୀ ଗଣତନ୍ତ୍ରରେ ବହୁ ସଂଖ୍ୟାରେ ଅଂଶଗ୍ରହଣ କରନ୍ତି, ଆମେ ଆମ ଦେଶ ପାଇଁ ଏକ ସମୃଦ୍ଧ ଭବିଷ୍ୟତକୁ ଏହା ମାଧ୍ୟମରେ ସୁନିଶ୍ଚିତ କରିପାରିବା ।
ଏହି ଅବସରରେ ସିଇସି ରାଜୀବ କୁମାର କହିଛନ୍ତି ଯେ କେବଳ ଭାରତରେ ନୁହେଁ ବିଶ୍ୱବ୍ୟାପୀ ସମ୍ମାନିତ ଆଇକନ୍ ଶ୍ରୀ ସଚିନ୍ ତେନ୍ଦୁଲକରଙ୍କର ଏକ ସ୍ବତନ୍ତ୍ର ପରିଚୟ ରହିଛି ଯାହା ତାଙ୍କ କ୍ରିକେଟ୍ ଦକ୍ଷତା ଠାରୁ ବହୁ ଉର୍ଦ୍ଧ୍ବରେ । ରାଜୀବ କୁମାର କହିଛନ୍ତି ଯେ ତାଙ୍କର ଉତ୍କୃଷ୍ଟ କ୍ୟାରିୟର ହେଉଛି ଉତ୍କର୍ଷତା, ଦଳଗତ କାର୍ଯ୍ୟ ଏବଂ ସଫଳତାର ନିରନ୍ତର ଅନୁସରଣ ପାଇଁ ତାଙ୍କର ପ୍ରତିବଦ୍ଧତାର ପ୍ରମାଣ । ମୁଖ୍ୟ ନିର୍ବାଚନ କମିଶନର କହିଛନ୍ତି ଯେ ତାଙ୍କର ପ୍ରଭାବ କ୍ରୀଡା ଠାରୁ ଉର୍ଦ୍ଧ୍ବରେ, ଯେଉଁଥିପାଇଁ ସେ ଭାରତ ନିର୍ବାଚନ ଆୟୋଗ ସହିତ ସହଯୋଗ କରିବା ଏବଂ ମତଦାତାଙ୍କୁ ଆକର୍ଷିତ କରିବା ପାଇଁ ଏକ ଆଦର୍ଶ ବିକଳ୍ପ ଭାବରେ ସୃଷ୍ଟି ହୋଇଛନ୍ତି ।
ଏହି ସହଭାଗୀତା ବିଭିନ୍ନ ଟିଭି ଟକ୍ ସୋ / କାର୍ଯ୍ୟକ୍ରମ ତଥା ଡିଜିଟାଲ୍ ଅଭିଯାନ ଇତ୍ୟାଦିରେ ଶ୍ରୀ ତେନ୍ଦୁଲକରଙ୍କ ଭୋଟର ସଚେତନତାକୁ ପ୍ରୋତ୍ସାହିତ କରିବା ସହିତ ବିଭିନ୍ନ କାର୍ଯ୍ୟକଳାପକୁ ଅନ୍ତର୍ଭୁକ୍ତ କରିବ, ଯାହା ଭୋଟ୍ ଦେବାର ମହତ୍ତ୍ୱ ଏବଂ ଦେଶର ଭାଗ୍ୟ ଗଠନରେ ଏହାର ଭୂମିକା ବିଷୟରେ ସଚେତନତା ସୃଷ୍ଟି କରିବାକୁ ଲକ୍ଷ୍ୟ ରଖିଛି ।
ଏହି କାର୍ଯ୍ୟକ୍ରମରେ ନ୍ୟାସନାଲ୍ ସ୍କୁଲ୍ ଅଫ୍ ଡ୍ରାମାର ଛାତ୍ରମାନେ ମଧ୍ୟ ଗଣତନ୍ତ୍ରକୁ ମଜବୁତ କରିବାରେ ଭୋଟ୍ ଦେବାର ଗୁରୁତ୍ୱ ଉପରେ ଏକ ପ୍ରଭାବଶାଳୀ ନାଟକ ଉପସ୍ଥାପନ କରିଥିଲେ ।
ଭାରତୀୟ ନିର୍ବାଚନ ଆୟୋଗ ବିଭିନ୍ନ କ୍ଷେତ୍ରର ପ୍ରଖ୍ୟାତ ଭାରତୀୟଙ୍କ ସହ ନିଜକୁ ଜଡିତ କରେ ଏବଂ ଗଣତନ୍ତ୍ରର ଉତ୍ସବରେ ଅଂଶଗ୍ରହଣ କରିବାକୁ ଭୋଟରଙ୍କୁ ଉତ୍ସାହିତ କରିବା ପାଇଁ ସେମାନଙ୍କୁ ଭାରତୀୟ ନିର୍ବାଚନ ଆୟୋଗ ର ଜାତୀୟ ଆଇକନ୍ ଭାବରେ ନିଯୁକ୍ତ କରିଥାଏ । ଗତ ବର୍ଷ ଆୟୋଗ ପ୍ରସିଦ୍ଧ ଅଭିନେତା ପଙ୍କଜ ତ୍ରିପାଠୀଙ୍କୁ ଜାତୀୟ ଆଇକନ୍ ଭାବରେ ସ୍ୱୀକୃତି ଦେଇଥିଲେ । ଏହାପୂର୍ବରୁ, 2019 ଲୋକସଭା ନିର୍ବାଚନ ସମୟରେ,ଏମ.ଏସ. ଧୋନୀ, ଆମୀର ଖାନ ଏବଂ ମେରି କୋମଙ୍କ ପରି ମହାନ୍ ବ୍ୟକ୍ତିତ୍ବ ଜାତୀୟ ଆଇକନ୍ ହୋଇଥିଲେ ।
