ବୌଦ୍ଧ, (ବଂଶୀଧର ମାଝୀ) : ନିର୍ବାଚନ ସମୟରେ ପ୍ରତିପକ୍ଷ ପ୍ରାର୍ଥୀମାନଙ୍କ ରଣନୀତିକୁ ମାତଦେଇ ଭୋଟର୍ମାନଙ୍କୁ ନିଜର କରିବା ପାଇଁ ପ୍ରାର୍ଥୀମାନେ ଦିନରାତି କଠିନ ପରିଶ୍ରମ କରି ଘରକୁ ଘର ବୁଲି ଭୋଟ୍ ଭିକ୍ଷା କରିଥାନ୍ତି । ଏହି ସମୟରେ ପ୍ରାର୍ଥୀ ମାନଙ୍କ ନିଦ ହଜିଯାଉଥିବା ବେଳେ ଜେଲ ଭିତରେ ଥାଇ ମଧ୍ୟ ନିର୍ବାଚନରେ ବିଜୟୀ ହୋଇଥିବା ଦେଖିବାକୁ ମିଳିଛି କଣ୍ଟାମାଳ ବ୍ଲକ ସଦର ପଞ୍ଚାୟତ ଅନ୍ତର୍ଗତ ବନ୍ଧପାଲି ଗ୍ରାମର ୧୨ ନମ୍ୱର୍ ୱାର୍ଡରେ । ସୂଚନାନୁସାରେ ସଦ୍ୟ ସମାପ୍ତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ କଣ୍ଟାମାଳ ବ୍ଲକ ସଦର ପଞ୍ଚାୟତ ବନ୍ଧପାଲି ଗ୍ରାମର ୧୨ ନମ୍ବର ୱାର୍ଡ଼ରୁ ୱାର୍ଡ଼ ସଭ୍ୟ ପାଇଁ ସୁଶାନ୍ତ ସାହୁ, ସୁରୁ ପୁଟେଲ ଓ ଝସରୀ ବାଘ ପ୍ରମୁଖ ନାମାଙ୍କନ ଦାଖଲ କରି ନିର୍ବାଚନ ମଇଦାନକୁ ଓହ୍ଲାଇଥିଲେ । ଠିକ୍ ପ୍ରଚାର ସମୟରେ କୌଣସି କାରଣରୁ ଫେବୃୟାରୀ ୪ ତାରିଖ ଦିନ ପୋଲିସ ସୁଶାନ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ତେବେ ଜେଲ ଭିତରେ ଥିଲେ ମଧ୍ୟ ତାଙ୍କର ଲୋକ ପ୍ରିୟତା ଯୋଗୁଁ ସେ ତାଙ୍କର ନିକଟତମ ପ୍ରତିଦ୍ୱନ୍ଦୀ ଶୁରୁ ପୁଟେଲଙ୍କ ଠାରୁ ୩୫ ଖଣ୍ଡ ଭୋଟରେ ବିଜୟୀ ହୋଇ ଉଦାହରଣ ସୃଷ୍ଟି କରିଛନ୍ତି । ଏହି ୱାର୍ଡରେ ମୋଟ୍ ୪୪୬ଟି ଭୋଟ ହୋଇଥିବା ବେଳେ ସୁଶାନ୍ତ ସାହୁ କଲମ ଚିହ୍ନରେ ୧୭୦ଖଣ୍ଡ ଭୋଟ, ସୁରୁ ପଟେଲ ନିକିତି ଚିହ୍ନ ୧୪୦ ଭୋଟ ଓ ଝସାରି ବାଘ ଶଗଡ଼ ଚିହ୍ନରେ ୧୦୧ ଖଣ୍ଡ ଭୋଟ ପାଇଛନ୍ତି । ନିର୍ବାଚନ ସମୟରେ ୪ରୁ ୧୮ ତାରିଖ ପର୍ଯ୍ୟନ୍ତ ଜେଲ ଭିତରେ ଥିଲେ ମଧ୍ୟ ପ୍ରଶାନ୍ତ, ମହେନ୍ଦ୍ର, ପ୍ରକାଶ, ଗୋବିନ୍ଦ ସମେତ ଗ୍ରାମବାସୀଙ୍କ ଉଦ୍ୟମ ଯୋଗୁଁ ଏହି ବିଜୟ ସମ୍ଭବ ହୋଇଥିବା କହିଛନ୍ତି ଜେଲ୍ ଫେରନ୍ତା ସୁଶାନ୍ତ ସାହୁ ।