ରାଉରକେଲା, (କେପିଏନ୍ଏସ୍) : ରାଉରକେଲାର ସାମାଜିକ ଅନୁଷ୍ଠାନ ହାପି ମୋମେଣ୍ଟସ ତରଫରୁ ଉତ୍କଳ ଦିବସ ପାଳନ ଅବସରରେ ଭୁବନେଶ୍ଵର ଜୟଦେବ ଭବନଠାରେ ପ୍ରତିଭା ରତ୍ନ ସମାରୋହ ଅନୁଷ୍ଠିତ ହୋଇଯାଇଛି । ଅନୁଷ୍ଠାନର ଉପଦେଷ୍ଟା କୁଞ୍ଜବିହାରୀ ରାଉତଙ୍କ ସଭାପତିତ୍ୱ ଓ ସଂଯୋଜନାରେ ତଥା ଅଧ୍ୟକ୍ଷ ରାଜେନ୍ଦ୍ର ପ୍ରସାଦ ପଣ୍ଡାଙ୍କ ଆବାହକତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ରାଜ୍ୟ ଯୋଜନା ବୋର୍ଡର ସଭ୍ୟ ଡଃ ପ୍ରସନ୍ନ କୁମାର ପାଟ୍ଟଶାଣୀ ମୁଖ୍ୟଅତିଥି ଓ ଭୁବନେଶ୍ୱର ଲୋକ ସମ୍ପର୍କ ବିଭାଗର ଯୁଗ୍ମ ନିର୍ଦ୍ଦେଶକ ସୂର୍ଯ୍ୟରଂଜନ ମହାନ୍ତି ସମ୍ମାନିତ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ପ୍ରଶଂସା କରିବା ସହ ଏଭଳି କାର୍ଯ୍ୟକ୍ରମ ଅନ୍ୟମାନଙ୍କ ପାଇଁ ଉଦାହରଣ ଓ ପ୍ରେରଣାଦାୟକ ବୋଲି ମତ ରଖିଥିଲେ । ଏହି ଅବସରରେ ସମଗ୍ର ଓଡିଶାକୁ ବିଭିନ୍ନ କ୍ଷେତ୍ରରେ ଗର୍ବିତ କରିଥିବା ପଥର ଶିଳ୍ପୀ ପଦ୍ମଶ୍ରୀ ପ୍ରଭାକର ମହାରଣା, ଭାଷାବିତ୍ ପଦ୍ମଶ୍ରୀ ଦେବୀପ୍ରସାଦ ପଟ୍ଟନାୟକ, ଓଡିଶୀ ନୃତ୍ୟଶିଳ୍ପୀ ପଦ୍ମଶ୍ରୀ ଇଲିଆନା ସୀତାରିଷ୍ଟ, ସମାଜସେବୀ ଲାୟନ ଅଶୋକ ଜଲାନ, ରାଷ୍ଟ୍ରପତି ପୁରଷ୍କାର ବିଜେତା ଗାୟିକା ସସ୍ମିତା ଦାସ, ଅର୍ଜୁନ ପୁରସ୍କାରପ୍ରାପ୍ତ କ୍ରୀଡାବିତ୍ ଦୁତି ଚାନ୍ଦ, ବରିଷ୍ଠ ଔଷଧ ବିଶେଷଜ୍ଞ ସୁରେନ୍ଦ୍ର ନାଥ ସ୍ୱାଇଁ, ଡାକ୍ତର ଲିତା ମହାପାତ୍ର, ସୌନ୍ଦର୍ଯ୍ୟ ଏକ୍ସପର୍ଟ ବବିତା ମହାନ୍ତି, ହାଇଦ୍ରାବାଦର ସମାଜସେବୀ ସର୍ବଶ୍ରୀ ସେନାପତି ଅଜିତ କୁମାର, ଲକ୍ଷ୍ମଣ ଦାସ, ଦେବେନ୍ଦ୍ର ଦାସ, ଜିତେନ୍ଦ୍ର କୁମାର ପଣ୍ଡା, ପ୍ରକାଶ ଚନ୍ଦ୍ର ବିଶ୍ବାଳ, ଦୀପକ କୁମାର ମହାପାତ୍ର, ରଶ୍ମିରଂଜନ ଜେନା, ଓଡିଶୀ ନୃତ୍ୟଶିଳ୍ପୀ ବିପଞ୍ଚି ଦାସ, ଚଳଚ୍ଚିତ୍ର ନିର୍ଦ୍ଦେଶକ ବିକାଶ ଚୌଧୁରୀ,ଏନ୍ଆଇଟିର ପ୍ରଧ୍ୟାପକ ଡଃ ଅଜିତ ବେହେରା, ବାଲୁକା ଶିଳ୍ପୀ ଦଶରଥ ମହନ୍ତ, ନୃତ୍ୟଶିଳ୍ପୀ ରାଜସ୍ମିତା କର, ଯୁବ ଶିଳ୍ପଦ୍ୟୋଗୀ ନିବେଦିତା ଶତପଥୀ, ଓଲିଉଡ କଳାକାର ମଧୁମିତା ମହାନ୍ତି, କ୍ରିକେଟର ନଟରାଜ ବେହେରା, ନୃତ୍ୟଶିଳ୍ପୀ ଡଃ ମିଲନ, ମଡେଲ ପୁଷ୍ପାଞ୍ଜଳି ସ୍ବାଇଁ, ବୈଜ୍ଞାନିକ ଦିବ୍ୟାଭାରତୀ ସାହୁ, କ୍ଷିତିଶ କୁମାର ଦାସ, ସାହିତ୍ୟିକ ଓମ୍ ଅଭିଜ୍ଞାନ ସାହୁ, ନୃତ୍ୟଶିଳ୍ପୀ ଶକ୍ତି ସଂପୂର୍ଣ୍ଣା ପରିଡା, ଶରତ କୁମାର ଦାସ, ସାମ୍ବାଦିକ ଅଞ୍ଜନ କୁମାର ଲେଙ୍କା, ଭାରତ ସରକାରଙ୍କ ପ୍ରଧାନ ବୈଜ୍ଞାନିକ ଡଃ ପ୍ରମୋଦ କୁମାର ପଣ୍ଡା ଓ ସମାଜକୁ ଉଲ୍ଲେଖନୀୟ ଅବଦାନ ନିମନ୍ତେ ଓଏଏସ୍ଇୟୁକୁ ଅତିଥିମାନେ ମାନପତ୍ର, ପୁଷ୍ପଗୁଚ୍ଛ, ଉପଢୌକନ ଓ ମୋମେଣ୍ଟୋ ଦେଇ ସମ୍ବର୍ଦ୍ଧିତ କରିଥିଲେ । ଏହି କାର୍ଯ୍ୟକ୍ରମକୁ ସଂପାଦିକା ରଶ୍ମିତା ପଣ୍ଡା ପ୍ରାଥମିକ ସୂଚନା ପ୍ରଦାନ କରିଥିବା ବେଳେ ଅନ୍ୟମାନଙ୍କ ମଧ୍ୟରେ ରାମଚନ୍ଦ୍ର ଜେନା, ଦିବାକର ଦାସ, ବିମଳ ଗାହାଣ, ପ୍ରିତି ଦଳେଇ, ଆଦାକ୍ଷା ପଣ୍ଡା, ଜୋସ୍ନାରାଣୀ ରାଉତ, ଜୁଲି ସାହୁ ଓ ଅନ୍ୟମାନେ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ଶେଷରେ ଦେବେନ୍ଦ୍ର ଦାସ ଧନ୍ୟବାଦ ଅର୍ପଣ କରିଥିଲେ ।