ଗାଇସିଲାଟ, (ଦିଲ୍ଲିପ ସରାପ) : ଆଜି ପବିତ୍ର ଶ୍ରୀକୃଷ୍ଣ ଜନ୍ମାଷ୍ଟମୀ ଅବସରରେ ଗାଇସିଲେଟ ସରସ୍ଵତୀ ଶିଶୁ ବିଦ୍ୟା ମନ୍ଦିରରେ ଜନ୍ମାଷ୍ଟମୀ ଉତ୍ସବ ପାଳନ ହୋଇଯାଇଛି । ଉକ୍ତ ଉତ୍ସବରେ ପତଞ୍ଜଳି ଜିଲ୍ଲା ପ୍ରଭାରୀ ନବୀନ କୁମାର ତ୍ରିପାଠୀ ଏବଂ ତାଙ୍କର ଧର୍ମପତ୍ନୀ ଶ୍ରୀମତୀ ଶକୁନ୍ତଳା ତ୍ରିପାଠୀ ମୁଖ୍ୟ ଅତିଥି ରୂପେ ଯୋଗଦେଇ ଭଗବାନ ଶ୍ରୀକୃଷ୍ଣଙ୍କର ଚରଣରେ ଦୀପ ପ୍ରଜ୍ୱଳନ କରି ଭଗବାନ ଶ୍ରୀକୃଷ୍ଣଙ୍କର ବାଲ୍ୟଲୀଳା ଉପରେ ଆଲୋକପାତ କରିଥିଲେ । ପ୍ରଧାନ ଆଚାର୍ଯ୍ୟ ଅଶ୍ୱିନୀ କୁମାର ବାରିକ ଅତିଥି ପରିଚୟ ଓ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ବେଦବ୍ୟାସ ଗୁରୁଜୀ ସଂଯୋଜନା କରିଥିଲେ । ଉକ୍ତ ଉତ୍ସବରେ ୧୪୩ ଜଣ ରାଧା ଓ କୃଷ୍ଣ ବେଶଧାରୀ ଭାଇ ଭଉଣୀଙ୍କ ସହିତ ବହୁ ଅଭିଭାବକ ଅଭିଭାବିକା, ଶୁଭେଚ୍ଛୁ ଯୋଗ ଦେଇଥିଲେ । ମୁଖ୍ୟ ଅତିଥିଙ୍କ ଦ୍ୱାରା ବେଶଧାରୀ ରାଧାକୃଷ୍ଣଙ୍କର ବନ୍ଦନ କରାଯାଇ ତାଙ୍କୁ ଦୋଳିରେ ଝୁଲାଇ ଦୋଳି ଗୀତ ବୋଲା ଯାଇଥିଲା । ସୁଦର୍ଶନ ବାରିକ ଏବଂ ନବୀନଚନ୍ଦ୍ର ସାହୁ, କୁମୁଦ ଚନ୍ଦ୍ର ନାୟକଙ୍କ ସହିତ ବିଦ୍ୟାଳୟର ଭାଇ ଭଉଣୀ ଏବଂ ଗୁରୁଜୀ ଗୁରୁମା ଦୋଳି ଗୀତ ପରିବେଷଣରେ ସାହାଯ୍ୟ କରିଥିଲେ । ଉକ୍ତ ଉତ୍ସବରେ ପରିଚାଳନା ସମିତିର ସଭାପତି ଦିବ୍ୟ କିଶୋର ପଣ୍ଡା ଏବଂ ସଂପାଦକ ସଞ୍ଜୟ କୁମାର ପୁରୋହିତ ଉପସ୍ଥିତ ଥିଲେ । ଶେଷରେ ପ୍ରସାଦ ସେବନ ପରେ ବେଶଧାରୀ ରାଧାକୃଷ୍ଣମାନଙ୍କୁ ପୁରସ୍କାର ପ୍ରଦାନ କରାଯାଇଥିଲା ।