ରାଣୀପୁର ଝରିଆଲରୁ ହେଲିକେପ୍ଟର ଯୋଗେ ଆସି ଗୁରୁଣ୍ଡାରେ ବିରାଟ ଅଭିଯୋଗ ଶୁଣାଣି
ମଂଦିର, ମସଜିଦ, ଗୀର୍ଜା, କମ୍ୟୁନିଟି ସେଂଟର ପାଇଁ ଅନୁଦାନର ଅଭାବ ରହିବ ନାହିଁ, ଭଲ କାମ କଲେ ଆହୁରି ମିଳିବ ଅନୁଦାନ
କୃଷକମାନଙ୍କ ପାଇଁ ଅନେକ ଯୋଜନା, କୃଷକ ହସିଲେ ଦେଶ ହସିବ, ବିନା ସୁଧରେ ୫ ଲକ୍ଷ ଟଙ୍କାର ଋଣ ପ୍ରଦାନ
ମିଶନ ଶକ୍ତି ମାଧ୍ୟମରେ ସରକାର ମହିଳାମାନଙ୍କୁ ସ୍ୱାବଲମ୍ବୀ କରୁଛନ୍ତି, ଅବ୍ୟବହୃତ ସରକାରୀ କୋଠା ଏସ୍.ଏଚ୍.ଜି. ହେବ ମହିଳାଙ୍କ ଅଫିସ
ଅଗଷ୍ଟ ୧୫ ସୁଦ୍ଧା ୪ଲକ୍ଷ ୩୦ ହଜାରଙ୍କୁ ଭତା ପ୍ରଦାନ
ସମସ୍ତ କାର୍ଯ୍ୟ ମୋ ସରକାରରୁ ୭ ଦିନ ମଧ୍ୟରେ ହେବ କାର୍ଯ୍ୟକାରୀ
ସଭାର ମଂଚରେ କୌଣସି ବିଧାୟକ କିମ୍ବା ବିଧାୟକ ପ୍ରାର୍ଥୀଙ୍କୁ ନିମନ୍ତ୍ରଣ ଥିଲା ବାରଣ
କଂଟାବାଂଜି, (ଗୁରୁଦୟାଲ ହଂସ) : ବଲାଙ୍ଗିର ଜିଲ୍ଲା କଂଟାବାଂଜି ବିଧାନ ସଭା ନିର୍ବାଚନ ମଣ୍ଡଳୀରେ ସୋମବାର ଦିନ ଓଡିଶା ସରକାରଙ୍କ ୫ଟି ସଚିବ ଭି.କେ. ପାଣ୍ଡିଆନ ପାଦ ଦେଇ ଏକ ବିରାଟ ଜନ ଶୁଣାଣି ଅଭିଯୋଗର ସାଧାରଣସଭା ହୋଇଛି । ଏହା ମୁରିବାହାଲ ବ୍ଲକ ଗୁରୁଣ୍ଡା ଖେଲପଡିଆରେ ଅନୁଷ୍ଠିତ ହୋଇଛି । ସର୍ବ ପ୍ରଥମେ ଶ୍ରୀ ପାଣ୍ଡିଆନ ହେଲିକେପ୍ଟର ଯୋଗେ ବଙ୍ଗୋମୁଣ୍ଡା ବ୍ଲକ ରାଣୀପୁର ଝରିଆଲର ସର୍ବ ପୁରାତନ ଚୌଷଠି ଯୋଗିନୀ ମଂଦିର ପଡିଆରେ ଓହ୍ଲାଇଥିଲେ । ସେଠାରେ ଚୌଷଠି ଯୋଗିନୀ ମଂଦିରର ଉନ୍ନତିକରଣ ଏବଂ ପୁନର୍ବିକାଶ ପାଇଁ ବିିଭିନ୍ନ ବିଭାଗୀୟ ଅଧିକାରୀ ଏବଂ ମଂଦିର ପରିଚାଳନା କମିଟି ତଥା ଝରିଆଲ ଗ୍ରାମର ଜନସାଧାରଣଙ୍କ ସହ ଆଲୋଚନା କରିଛନ୍ତି । ଶ୍ରୀ ପାଣ୍ଡିଆନ ଚୌଷଠି ଯୋଗିନୀ ମଂଦିରର ବିକାଶ ପାଇଁ ଜିଲ୍ଲାପାଳ ଏବଂ ଦେବୋତ୍ତର ବିଭାଗ ସହ ଆଲୋଚନା କରିବା ସହିତ ଆବଶ୍ୟକ ଅନୁଦାନ ଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅବଗତ କରିବେ ବୋଲି କହିଛନ୍ତି । ଏହା ପରେ ସେ ମୁରିବାହାଲ ବ୍ଲକ ଗୁରୁଣ୍ଡା ଖେଲପଡିଆରେ ଅବତରଣ କରିଥିଲେ । ହେଲିକେପ୍ଟରରୁ ଓହ୍ଲାଇବା ପରେ ହେଲିପ୍ୟାଡର ଚାରିପଟେ ବୁଲି ଜନସାଧାରଣଙ୍କ ସହ ହାତକୁ ହାତ ମିଳାଇ କଥାବାର୍ତା କରିଥିଲେ । ଏପରିକି ହେଲିପେଡର ଚାରିପଟେ ଥିବା ହଜାର ହଜାର ମହିଳା, ଯୁବତୀ, ପୁରୁଷ, ଯୁବକ ତଥା ବିଭିନ୍ନ ମହିଳା ସ୍ୱଂୟ ସହାୟକ ଗୋଷ୍ଠୀଙ୍କ ସହ ହାତ ମିଳାଇ ଅଭିଯୋଗ ମାନ ଗ୍ରହଣ କରିଥିଲେ । ପରେ ସଭାସ୍ଥଳକୁ ଆସି ସଭାସ୍ଥଳରେ ଥିବା ହଜାର ହଜାର ମିଶନ ଶକ୍ତି ସ୍ୱଂୟ ସହାୟକ ଗୋଷ୍ଠୀର ମହିଳା ମାନଙ୍କ ସ୍ଥାନକୁ ଯାଇ ଅଭିଯୋଗ ମାନ ଗ୍ରହଣ କରିଥିଲେ । ଏହି ସମୟରେ ତାଙ୍କୁ ଫୁଲତୋଡା, ମାଲା, ଦେଇ ସ୍ୱାଗତ କରାଯାଇଥିଲା । ଏହା ପରେ ସଭାସ୍ଥଳକୁ ଆସି ପ୍ରଥମେ କଂଟାବାଂଜି ନିର୍ବାଚନ ମଣ୍ଡଳୀର ଜନସାଧାରଣଙ୍କୁ ମା’ ସମଲେଶ୍ୱରୀ ଏବଂ ଜୟ ଜଗନ୍ନାଥ ସମ୍ବୋଧନ କରିଥିଲେ । ଏହା ପରେ ଜନ ସାଧାରଣଙ୍କୁ ସମ୍ବୋଧନ କରି କଂଟାବାଂଜି ଅଂଚଳର ସମସ୍ୟାର ସମାଧାନ ପାଇଁ ମୂଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ପଠାଇଥିବା କହିଥିଲେ । ଏହା ପରେ କଂଟାବାଂଜି, ମୁରିବାହାଲ, ତୁରେକେଲା ଓ ବଙ୍ଗୋମୁଣ୍ଡା ଅଂଚଳର ହଜାର ହଜାର ଅଭିଯୋଗ ପତ୍ର ମୁଖ୍ୟମନ୍ତ୍ରୀଙ୍କୁ ୫-ଟି ସଚିବଙ୍କ ଜରିଆରେ ଦିଆଯାଇଥିଲା । ପ୍ରଥମେ ନିଜର ବକ୍ତବ୍ୟରେ ମଂଦିର, ମସଜିଦ, ଗୀର୍ଜା ଓ କମ୍ୟୁନିଟି ସେଂଟରର ଉନ୍ନତିକରଣ ପାଇଁ ଆବଶ୍ୟକ ଅନୁଦାନ ଦିଆଯିବ, ସମସ୍ତ ଅନୁଦାନ ସ୍ୱଛତାର ସହ କଲେ ୨ୟ ଓ ୩ୟ କିସ୍ତି ଯଥା ଶୀଘ୍ର ପ୍ରଦାନ କରାଯିବ ବୋଲି କହିଥିଲେ । ଏପରିକି ଜନସାଧାରଣଙ୍କ ସହଯୋଗ ରହିଲେ ଓଡିଶା ନିଶ୍ଚିତ ଭାବେ ଆଗେଇଯିବ ବୋଲି କହିଥିଲେ । ଗ୍ରାମାଂଚଳରେ ଥିବା ପାଣି ସମସ୍ୟା ଉପରେ ବିଭାଗୀୟ ଅଧିକାରୀମାନେ ୩ ଦିନ ମଧ୍ୟରେ ତାର ସମାଧାନ କରିବେ । ମିଶନ ଶକ୍ତିର ସ୍ୱଂୟ ସହାୟକ ଗୋଷ୍ଠୀର ମହିଳାମାନଙ୍କୁ ବିନା ସୁଧରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଦିଆଯାଉଥିବା ବେଳେ ଆଗାମୀ ଦିନରେ ୭ରୁ ୧୦ ଲକ୍ଷ ଯାଏ ବୃଦ୍ଧି କରାଯିବା । ସେହିପରି ବିଜୁ ସ୍ୱାସ୍ଥ୍ୟ କାର୍ଡ ଉପରେ ମହିଳାମାନଙ୍କୁ ୧୦ଲକ୍ଷ ଏବଂ ପୁରୁଷମାନଙ୍କୁ ୫ ଲକ୍ଷ ଟଙ୍କାର ସହାୟତା ମିଳୁଥିବା ଡାକ୍ତରୀ ସୁବିଧା କିପରି ଉପଭୋଗ କରିପାରିବେ ସେଥିପ୍ରତି ଅଂଚଳର ଜନପ୍ରତିନିଧି ତଥା ଅଧିକାରୀଙ୍କ ପରାମର୍ଶ ନେବା ପାଇଁ କହିଥିଲେ । କୃଷକମାନଙ୍କ ପାଇଁ ମଧ୍ୟ ବିନା ସୁଧାରେ ଋଣ ଦିଆଯାଉଥିବା କହିଥିଲେ । ଚଳିତ ବର୍ଷ ଫସଲ ବୀମାରେ ଓଡିଶା ସରକାର ସମସ୍ତ ପ୍ରିମିୟମ ପଇସା ନିଜେ ପଇଠ କରିଥିବା କହିଥିଲେ । ଏହି ଯୋଜନାରେ ଲକ୍ଷାଧିକ ଚାଷୀଙ୍କୁ ସାମିଲ କରିଥିବା କହିଥିଲେ । ମଧୁବାବୁ ପେନସନ ଯୋଜନାରେ ଅଗଷ୍ଟ ୧୪ ତାରିଖ ସୁଦ୍ଧା ୪ଲକ୍ଷ ୩୦ ହଜାର ନୂତନ ହିତାଧିକାରୀଙ୍କୁ ଭତ୍ତା ପ୍ରଦାନ କରିବା କହିଥିଲେ । ଅଂଚଳରେ ଜଳ ସେଚନ ପାଇଁ ମଧ୍ୟ ସରକାର ଅନେକ ମେଗା ଯୋଜନା କରିଥିବା ବେଳେ ମୁରିବାହାଲ ବ୍ଲକରେ ୩୩ଟି, ତୁରେକେଲା ବ୍ଲକରେ ୬୬ଟି ଏବଂ ତୁରେକେଲା, ମୁରିବାହାଲ ଓ ବଙ୍ଗୋମୁଣ୍ଡା ବ୍ଳକରେ ମିଳିତ ଭାବେ ୫୮ଟି ମେଗା ପି.ଡବ୍ଲ.ଏସ ପ୍ରୋଜେକ୍ଟ ସରକାର କାର୍ଯ୍ୟକାରୀ କରୁଥିବା କହିଛନ୍ତି । ଆଜିର ଅଭିଯୋଗ ଶୁଣାଣି ସଭାରେ ହଜାର ହଜାର ସଂଖ୍ୟାରେ ଅଭିଯୋଗ ଆସିଥିବାରୁ ଏହା ମୁଖ୍ୟମନ୍ତ୍ରୀଙ୍କ ଦୃଷ୍ଟି ଗୋଚର କରିବା ସହିତ ଏହାର ସମାଧାନ ୭ ଦିନ ମଧ୍ୟରେ ନିଶ୍ଚିତ ଭାବେ ଦିଆଯିବା ସହ ମୋ ସରକାର ଯୋଗେ ଜଣାଇଦେବେ ବୋଲି କହିଥିଲେ । ଏହି ସଭାସ୍ଥଳ ମଂଚରେ କଂଟାବାଂଜି ଜିଲ୍ଲା ଦାବୀ ନେଇ ଜିଲ୍ଲା ସଂଘର୍ଷ ସମିତି ଶ୍ରୀ ପାଣ୍ଡିଆନଙ୍କୁ ଦାବୀପତ୍ର ଦେବା ସହିତ ସ୍ଲେଗାନ ମଧ୍ୟ ଦେଇଥିଲେ । ସଭାସ୍ଥଳରେ ଜିଲ୍ଲାପାଳ ବଲାଙ୍ଗିର, ପୋଲିସ ଅଧିକ୍ଷକ, ସମସ୍ତ ତିନି ଗୋଟି ବ୍ଲକର ବିଡିଓ, ତହସିଲଦାର ଏବଂ ଅନ୍ୟାନ୍ୟ ସରକାରୀ କର୍ମଚାରୀ ଥିବା ବେଳେ ପଂଚାୟତ ପ୍ରତିନିଧିମାନଙ୍କ ବ୍ୟତୀତ କୌଣସି ବିଧାୟକ କିମ୍ବା ବିଧାୟକ ପ୍ରାର୍ଥୀଙ୍କୁ ଅନୁମତି ଦିଆଯାଇ ନ ଥିବା ବିଶ୍ୱସ୍ତ ସୂତ୍ରରୁ ଜଣାପଡିଛି । ଏହି ସଭାରେ ୧୫ହଜାରରୁ ଅଧିକ ଜନସାଧାରଣ, ମହିଳା ଗୋଷ୍ଠୀ ସଭ୍ୟା ଏବଂ ଯୁବତୀ ଯୁବକ ଉପସ୍ଥିତ ଥିବାର ଦେଖିବାକୁ ମିଳିଛି । ସଭାଟି କଡା ପୋଲିସ ସୁରକ୍ଷା ମଧ୍ୟରେ ହୋଇଥିବା ବେଳେ କୌଣସି ଅପ୍ରିତିକର ଘଟଣା ଘଟି ନ ଥିଲା ।