ବଲାଙ୍ଗିର, (କେପିଏନ୍ଏସ୍) : ନେସ୍ନାଲ ପିସ୍ ୟୁନିସନ୍(ଇଣ୍ଡିଆ) ପକ୍ଷରୁ ସ୍ଥାନୀୟ ହୋଟେଲ ପାର୍କ ଲେଣ୍ଡର ସମ୍ମିଳନୀ କକ୍ଷରେ ନିଃସ୍ୱାର୍ଥପର ସେବାର ନିଆରା ନାୟକ ପୁଣ୍ୟଶ୍ଲୋକ ଲଳିତ ନାୟକଙ୍କ ସ୍ମୃତିରେ ଆଜି ସଂଧ୍ୟାରେ ଏକ ଶ୍ରଦ୍ଧାଂଜଳି ସଭା ଅନୁଷ୍ଠିତ ହୋଇଯାଇଛି । ବରିଷ୍ଠ ସାମ୍ବାଦିକ ସତ୍ୟନାରାୟଣ ବେହେରା, ଡା. ଲକ୍ଷ୍ମୀକାନ୍ତ ମହାପାତ୍ର, ଗୁରୁଶ୍ରୀ ଡା. ଘାସିରାମ ମିଶ୍ର, ଡ. ଶ୍ରୀକର ମିଶ୍ର, ନେସ୍ନାଲ ପିସ୍ ୟୁନିସନ୍ ଚେୟାର୍ମେନ୍ ରବିରଂଜନ ପୂଜାରୀ ଏବଂ ନିର୍ଦ୍ଦେଶକ ସତ୍ୟରଂଜନ ମିଶ୍ର ମଂଚାସୀନ ଥିଲେ । ସଭା ଆରମ୍ଭରୁ ସ୍ୱର୍ଗତ ନାୟକଙ୍କ ଅମର ଆତ୍ମାର ସଦ୍ଗତି ନିମନ୍ତେ ୨ ମିନିଟ୍ ନୀରବ ପ୍ରାର୍ଥନା କରାଯାଇଥିଲା । ଏହାପରେ ଲଳିତ ନାୟକଙ୍କୁ ଭଲ ପାଉଥିବା ଶତାଧିକ ଶ୍ରଦ୍ଧାଳୁ ଏହି ଶ୍ରଦ୍ଧାଂଜଳି ସଭାରେ ଯୋଗଦାନ କରି ତାଙ୍କ ବହୁମୁଖୀ ପ୍ରତିଭା ଓ ନିଃସ୍ୱାର୍ଥପର ସମାଜସେବା ସଂପର୍କରେ ଆଲୋଚନା କରିଥିଲେ । ଏହି ଅବସରରେ ବିଶିଷ୍ଟ କଣ୍ଠଶିଳ୍ପୀ ବୁବୁ ଉଦ୍ଗାତାଙ୍କ ‘ଚଲୋ ହମ୍ ଲେ ଚଲେ’ ଗୀତ ଏବଂ ନିଗମାନନ୍ଦ ନାଥଙ୍କ କବିତା ଉପସ୍ଥିତ ବ୍ୟକ୍ତିବିଶେଷଙ୍କ ଭାବପ୍ରବଣ କରି ପକାଇଥିଲା ।
