ରାଉରକେଲା, (ସସ୍ମିତା ପ୍ରଧାନ) : ବନ୍ଧମୁଣ୍ଡା ଡି-କ୍ୟାବିନ ଅଞ୍ଚଳରେ ଦୀର୍ଘଦିନ ଧରି ଜଳ ଓ ସ୍ବଚ୍ଛତା ସମସ୍ୟା ହୋଇରହିଥିଲା । ପରିସ୍ଥିତିକୁ ଦେଖି ଆଇଏମ୍ସି ପକ୍ଷରୁ ଜେସିବି ମେସିନ୍ ଲଗାଇ ବ୍ୟାପକ ସଫେଇ ଅଭିଯାନ କରାଯାଇଥିଲା । ଏହି ପଦକ୍ଷେପ ଫଳରେ ସମଗ୍ର ଅଞ୍ଚଳର ଚିତ୍ର ପରିବର୍ତ୍ତିତ ହୋଇଯାଇଛି ଏବଂ ପରିବେଶ ସ୍ୱଚ୍ଛ ହୋଇଛି । ଏହି କାମକୁ ଦେଖି ସ୍ଥାନୀୟ ଲୋକମାନେ ପ୍ରଶାସନଙ୍କୁ ପ୍ରଶଂସା କରି ଖୁସି ବ୍ୟକ୍ତ କରିଛନ୍ତି । କେବଳ ସଫେଇ ନୁହେଁ, ଚୂଡ଼ି ବସ୍ତି ଓ ବୋଗଦା ବସ୍ତିରେ ପାଣି ଯୋଗାଇ ଦିଆଯାଇଥିବାରୁ ମଧ୍ୟ ଲୋକମାନଙ୍କ ମଧ୍ୟରେ ବହୁତ ଉତ୍ସାହ ଦେଖାଯାଇଛି । ଦୀର୍ଘଦିନ ଧରି ପାଣି ସମସ୍ୟାରେ ଭୋଗୁଥିବା ଲୋକମାନେ ବର୍ତ୍ତମାନ ଆସ୍ୱସ୍ଥି ଅନୁଭବ କରୁଛନ୍ତି, ଯାହାଫଳରେ ଅଞ୍ଚଳରେ ଖୁସିର ଲହରୀ ଦେଖାଯାଇଛି । ବନ୍ଧମୁଣ୍ଡା ମଣ୍ଡଳ ଅଧ୍ୟକ୍ଷ ଲକ୍ଷଣ ଲୋହାର ନେତୃତ୍ୱ ଓ ପ୍ରତ୍ୟକ୍ଷ ତତ୍ତ୍ଵାବଧାନରେ ଏହି ସରକାରୀ କାମରେ ଜୋର୍ ଧରିଛି । ତାଙ୍କର ନିରନ୍ତର ପ୍ରୟାସ ଓ ଜନସେବା ଭାବନାରେ ଅଞ୍ଚଳର ଉନ୍ନତି କାମ ଗତି ପାଇଛି । ଏହି ଅବସରରେ ବନ୍ଧମୁଣ୍ଡା ଭାଜପା ଶକ୍ତି କେନ୍ଦ୍ର ପ୍ରମୁଖ ସତ୍ୟଜିତ ପ୍ରଧାନ, ବୋଗଦା ବସ୍ତି ଓ ଚୂଡ଼ି ବସ୍ତି ବୁଥ୍ ସଭାପତି ହରି ଡୋରା, ସୁନ୍ଦର ଯୋଶୀ, ଲକ୍ଷ୍ମଣ ଡୋରା, ଚୁନ୍ନୁ ପଣ୍ଡିତ, ମୁକଲେଶ ସିଂହ, ସନ୍ଦୀପ ପ୍ରଧାନ ଓ ରୀନା ସହିତ ଅନେକ କାର୍ଯ୍ୟକର୍ତ୍ତା ଉପସ୍ଥିତ ରହି କାର୍ଯ୍ୟକ୍ରମ ତଦାରଖ କରିଥିଲେ । ସେହିପରି ବନ୍ଧମୁଣ୍ଡା ସେକ୍ଟର ଡି. କେବିନ ଅଞ୍ଚଳରେ ଦୀର୍ଘଦିନ ଧରି ଖରାପ ସଡ଼କ ହେତୁ ସ୍ଥାନୀୟ ବାସିନ୍ଦାମାନେ ବହୁତ ଅସୁବିଧାର ସମ୍ମୁଖୀନ ହେଉଥିଲେ । ସଡ଼କରେ ଜାଗା ଜାଗାରେ ଗର୍ତ୍ତ ସୃଷ୍ଟି ହୋଇ ଯାତାୟାତ କଷ୍ଟସାଧ୍ୟ ହୋଇପଡ଼ିଥିଲା, ଯାହା ନେଇ ଲୋକମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଥିଲା । ଏହା ବନ୍ଧମୁଣ୍ଡା ଭାଜପା ମଣ୍ଡଳ ଅଧ୍ୟକ୍ଷ ଲକ୍ଷଣ ଲୋହାରଙ୍କ ଦୃଷ୍ଟିଗୋଚର ହେବା ପରେ, ସେ ତୁରନ୍ତ ପଦକ୍ଷେପ ଗ୍ରହଣ କରି ୧୦ ନମ୍ବର ବସ୍ତିରେ ସଡ଼କ ମରାମତି କାମ ଆରମ୍ଭ କରାଇଥିଲେ । ସୂଚନାଯୋଗ୍ୟ ଯେ, ୱ।ଟକୋ ଦ୍ୱାରା ପାଣିର ପାଇପଲାଇନ ପ୍ରତିଷ୍ଠା ସମୟରେ ସଡ଼କ କ୍ଷତିଗ୍ରସ୍ତ ହୋଇଥିଲା । ସଡ଼କ ମରାମତି କାମ ଆରମ୍ଭ ହେବାରୁ ସ୍ଥାନୀୟ ଲୋକମାନେ ଶାନ୍ତିରେ ନିଶ୍ୱାସ ନେଉଛନ୍ତି । ବର୍ତ୍ତମାନ ସେମାନେ ଆଶା କରୁଛନ୍ତି ଯେ, ଶୀଘ୍ର ଯାତାୟାତ ସୁବିଧାଜନକ ହେବ ଓ ଦୈନନ୍ଦିନ ଜୀବନରେ ହେଉଥିବା ଅସୁବିଧା ଦୂର ହେବ । ଏହା ସହିତ ସେକ୍ଟର- ବିର ଚୁଡ଼ି ବସ୍ତିରେ ମଧ୍ୟ ଜଳ ସଂଯୋଗ ଦେବା କାମ ଜୋରସୋରରେ ଚାଲିଛି । ପ୍ରଶାସନ ପକ୍ଷରୁ ସମସ୍ତ ବସ୍ତିରେ ପରିଷ୍କାର ପାଣି ଉପଲବ୍ଧ କରାଇବା ପାଇଁ ଲଗାତାର ପ୍ରୟାସ ଚାଲିଛି । ଏହି ଗୁରୁତ୍ୱପୂର୍ଣ୍ଣ କାମକୁ ସଫଳ କରିବାରେ ସତ୍ୟଜିତ ପ୍ରଧାନ, ଅମିତ ସିଂହ ଗୁପ୍ତା, ମୁକଲେଶ ସିଂହ, ପରମେଶ୍ୱର ସାମର୍ସ, ଲକ୍ଷ୍ମୀ ଥାପା ଓ ପୂଜା ବିଷ୍ଟଙ୍କ ଉଲ୍ଲେଖନୀୟ ଅବଦାନ ରହିଛି ।