କଟକ : କେବଳ ଛୁଟିଦିନକୁ ଛାଡ଼ିଦେଲେ ଆସନ୍ତା ୫ ତାରିଖରୁ ପ୍ରତି ଶନିବାର ସର୍ବସାଧାରଣଙ୍କ ପାଇଁ ଖୋଲା ରହିବ ଓଡ଼ିଶା ହାଇକୋର୍ଟ । ଦୁଇ ସିଫ୍ଟରେ ଓଡ଼ିଶା ହାଇକୋର୍ଟ ପରିଦର୍ଶନ କରିପାରିବେ । ସକାଳ ୧୦ଟାରୁ ସାଢ଼େ ୧୧ଟା ଓ ସାଢ଼େ ୧୧ରୁ ୧ଟା ପର୍ଯ୍ୟନ୍ତ ଲୋକେ ହାଇକୋର୍ଟ ପରିଦର୍ଶନ କରିବେ । ପ୍ରତ୍ୟେକ ସିଫ୍ଟରେ ସର୍ବାଧିକ ୪୦ଜଣ ପର୍ଯ୍ୟଟକ ରହିବେ । ଆଜି ଏ ସଂକ୍ରାନ୍ତରେ ହାଇକୋର୍ଟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ପରିଦର୍ଶନ ସମୟରେ ପର୍ଯ୍ୟଟକମାନେ ହେରିଟେଜ୍ କୋଠାର କୋର୍ଟ ରୁମ୍, ହାଇକୋର୍ଟର ନୂଆ କୋଠା ଏବଂ ହାଇକୋର୍ଟର ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକ ବୁଲିପାରିବେ ।
ବୁଲିବା ସମୟରେ ହାଇକୋର୍ଟର ଅଧିକାରୀମାନେ ପରିଦର୍ଶକଙ୍କୁ ବିଭିନ୍ନ ସୂଚନା ଦେବାରେ ସହଯୋଗ କରିବେ । ଆଜିଠାରୁ ଅର୍ଥାତ ୩ ତାରିଖରୁ ପରିଦର୍ଶନ ପାଇଁ ପଞ୍ଜିକରଣ ଆରମ୍ଭ ହୋଇଛି । ଆଗ୍ରହୀ ବ୍ୟକ୍ତିମାନେ ଭିଜିଟର୍ସ ପାସ୍ କାଉଣ୍ଟରରୁ ପ୍ରତ୍ୟେକ କାର୍ଯ୍ୟ ଦିବସରେ ଅପରାହ୍ନ ୨ଟାରୁ ୫ଟା ମଧ୍ୟରେ ନିଜ ନାମ ପଞ୍ଜିକରଣ କରିବେ ଓ ସେଠାରୁ ପାସ୍ ସଂଗ୍ରହ କରିପାରିବେ । ପଞ୍ଜିକରଣ ବେଳେ ସେମାନେ ନିଜର ପରିଚୟପତ୍ର ପ୍ରଦାନ କରିବେ । ବୁଲିବାକୁ ଆସିବା ବେଳେ ମଧ୍ୟ ପରିଚୟପତ୍ର ସାଙ୍ଗରେ ଆଣିବେ । ହାଇକୋର୍ଟ ପକ୍ଷରୁ ଯେଉଁ ଗାଇଡ୍ ଦିଆଯିବ ସେଥିପାଇଁ କୌଣସି ଦେୟ ନିଆଯିବ ନାହିଁ ।
ଅନ୍ଲାଇନ୍ ପଞ୍ଜିକରଣ କାର୍ଯ୍ୟ ଖୁବ୍ଶୀଘ୍ର ଆରମ୍ଭ ହେବ ବୋଲି ହାଇକୋର୍ଟ ପକ୍ଷରୁ କୁହାଯାଇଛି । ଏଠାରେ ସୂଚନା ଥାଉ କି, ହାଇକୋର୍ଟ ଭିତରକୁ ମନମୁଖି ପ୍ରବେଶ ଉପରେ କଟକଣା ରହିଛି । ପୂର୍ବରୁ ଓକିଲମାନଙ୍କ ଦ୍ୱାରା ସ୍ୱୀକୃତିପ୍ରାପ୍ତ ମହକିଲମାନେ ହିଁ ଅଦାଲତ ଭିତରକୁ ଯାଇପାରୁଥିଲେ ।