ବଲାଙ୍ଗିର, (କେପିଏନ୍ଏସ୍): ବଲାଙ୍ଗିର ସାଗରପଡା ନିବାସୀ ଅବସରପ୍ରାପ୍ତ ସ୍ୱାସ୍ଥ୍ୟବିଭାଗ କର୍ମଚାରୀ ଶଶୀଭୂଷଣ ନନ୍ଦ (୮୮)ଙ୍କ ସୋମବାର ଅପରାହ୍ଣରେ ପରଲୋକ ଘଟିଛି । ପିଲାଦିନରୁ ଗାନ୍ଧୀନୀତି ଆଦର୍ଶରେ ଅନୁପ୍ରାଣିତ ହୋଇ ସେ ଖଦୀ ପରିଧାନ କରୁଥିଲେ । ଶୃଙ୍ଖଳିତ ଭାବେ ଓ ନିଷ୍ଠାର ସହ ସେ ତାଙ୍କର ଚାକିରୀ ଜୀବନ କଟାଇବା ପରେ ଅବସର ଗ୍ରହଣ କରି ତାଙ୍କ ବଡଝିଅ ଓ ଜ୍ୱାଇଁଙ୍କ ପାଖରେ ରହୁଥିଲେ । ସ୍ୱର୍ଗତ ନନ୍ଦ ପୂର୍ବତନ ରାଜ୍ୟସଭା ସାଂସଦ ସ୍ୱର୍ଗତ ନରସିଂହ ପ୍ରସାଦ ନନ୍ଦଙ୍କ ମଝିଆ ଭାଇ ଏବଂ ବିଶିଷ୍ଟ ସମାଜସେବୀ ତଥା ବରିଷ୍ଠ ସାମ୍ବାଦିକ ସ୍ୱର୍ଗତ ଭାଗବତ ପ୍ରସାଦ ନନ୍ଦଙ୍କ ମଝିଅାଁ ବଡଭାଇ ଥିଲେ । ମୃତ୍ୟୁବେଳକୁ ସ୍ୱର୍ଗତ ନନ୍ଦଙ୍କ ଦୁଇଝିଅ, ଜ୍ୱାଇଁ ମଞ୍ଜୁଶ୍ରୀ, ଚିନ୍ତାମଣି, ଜୟଶ୍ରୀ ଓ ଶେଷଦେବ ଏବଂ ଏକମାତ୍ର ପୁଅ ଶଙ୍କର କୁମାର ଉପସ୍ଥିତ ଥିଲେ । ତାଙ୍କ ବିୟୋଗ ଖବର ପାଇବା ପରେ ସହରର ବହୁ ବୁଦ୍ଧିଜୀବୀ, ଜ୍ଞାତିକୁଟୁମ୍ପ ଓ ସମ୍ପର୍କୀୟ ଶେଷଦର୍ଶନ କରି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସୋମବାର ରାତିରେ ତାଙ୍କର ଅନ୍ତ୍ୟେଷ୍ଠି କ୍ରିୟା ସମ୍ପନ୍ନ କରାଯାଇଛି ।