ସୁବର୍ଣ୍ଣପୁର, (ପ୍ରଭୁଦତ୍ତ ରଥ) : ପ୍ରସିଦ୍ଧ ଶାକ୍ତପୀଠ ସୁବର୍ଣ୍ଣପୁରର ଅଧିଷ୍ଠାତ୍ରୀ ଲୋକଦେବୀ ସୁରେଶ୍ୱରୀଙ୍କ ଧବଳମୁଖୀ ବେଶ ଆଜି ଅନୁଷ୍ଠିତ ହୋଇଛି । ବଡି ଭୋରରୁ ଦେବୀଙ୍କ ଦିବ୍ୟସ୍ନାନ ପରେ ପାରମ୍ପାରିକ ରୀତିନୀତିରେ ଦେବୀ ସୁରେଶ୍ୱରୀଙ୍କୁ ଗମ୍ଭିରା ସେବାୟତ ଓ ପୂଜକଙ୍କ ଦ୍ୱାରା ଧବଳମୁଖୀ ବେଶରେ ସଜ୍ଜିତ କରାଯାଇଛି । ବେଶ ପରେ ଦେବୀଙ୍କ ପାଖରେ ଷୋଡଶ ଉପଚାର ପୂଜାଧଜା ସହ ନୈବେଦ୍ୟ ଓ ଭୋଗରାଗ ଲଗାଯାଇଛି । ସକାଳ ଧୂପ ସହ ମଧ୍ୟାହ୍ନ ଆଳତୀ ହୋଇସାରିବା ପରେ ତ୍ରିସଂଧ୍ୟାରେ ପଂଚ ମହା ଆଳତୀ ପ୍ରଦାନର କାର୍ୟ୍ୟକ୍ରମ ରହିଛି । ସୂଚନୀୟ,ସୁବର୍ଣ୍ଣପୁରର ସୋମବଂଶୀ ରାଜୁଡା ଅମଳରୁ ଆଶ୍ବିନ ଅମାବାସ୍ୟା ତିଥିରେ ଦେବୀ ସୁରେଶ୍ବରୀଙ୍କୁ କର୍ପୁର ମିଶ୍ରିତ ଧବଳ ଶଂଖ ଭସ୍ମରେ ଏହି ଅନନ୍ୟ ଶାକମ୍ବରୀ ଧବଳମୁଖୀ ବେଶ କରାଯାଇ ଆସୁଛି । ତେବେ, କୋଭିଡ କଟକଣା ଯୋଗୁଁ ମନ୍ଦିର ବନ୍ଦ ଥିବାରୁ ବର୍ଷକ ଥରେ ମା’ଙ୍କ ଏହି ଦୁର୍ଲ୍ଲଭ ଧବଳମୁଖୀ ବେଶ ଦେଖିବାକୁ ଶ୍ରଦ୍ଧାଳୁ ଭକ୍ତମାନେ ଏଥର ବଂଚିତ ହୋଇଛନ୍ତି ।