ପଦ୍ମପୁର, (ନିରୋଜ କୁମାର ପାଣୀ) : ପଦ୍ମପୁର ଉପଖଣ୍ଡ ପଲସାନୀ ଠାରୁ ସାପଲହରକୁ ଯୋଡି ହେବ ନୂଆ ରାସ୍ତା । ସରିଲା ପଂଚାୟତବାସୀଙ୍କ ଦୁଃଖ । ବହୁ ଦିନର ଦାବିକୁ ପୂରଣ କଲେ ବରଗଡ଼ ସାଂସଦ ପ୍ରଦୀପ ପୁରୋହିତ । ଏହି ରାସ୍ତା ପ୍ରକଳ୍ପ ଦ୍ୱାରା ୬ଟି ପଂଚାୟତ ବାସୀ ଉପକୃତ ହେବେ । ଏଥି ଲାଗି ୮ କୋଟି ୨୬ ଲକ୍ଷ ଟଙ୍କା ବ୍ୟୟ କରାଯିବ । ସବୁଠୁ ବଡ଼ କଥା ହେଲା ଏହି ରାସ୍ତା ଛତିଶଗଡ଼କୁ ମଧ୍ୟ ସଂଯୋଗ କରିବ । ଆଜି ବୁକୁରାମୁଣ୍ଡା ପଂଚାୟତଠାରେ ଏହି ପ୍ରକଳ୍ପର ଶୁଭ ଶିଳାନ୍ୟାସ କରିଛନ୍ତି ସାଂସଦ ଶ୍ରୀ ପୁରୋହିତ । ଏହା ସହ କିଭଳି ଏହି ରାସ୍ତାର ଉନ୍ନତ ମାନର କାମ ହୋଇପାରିବ ସେ ନେଇ ସ୍ଥାନୀୟ ଏସଡିଓ ଓ ଠିକାଦାରଙ୍କ ସହ ଆଲୋଚନା କରିଛନ୍ତି ସାଂସଦ ଶ୍ରୀ ପୁରୋହିତ । କାମ ଚାଲିବା ସମୟରେ କେହି କେମିତି ଅସୁବିଧାର ସମ୍ମୁଖୀନ ନହେବେ ସେ ନେଇ ଅଧିକାରୀ ଓ ଠିକାଦାରଙ୍କୁ ତାଗିଦ୍ କରିଛନ୍ତି । ଠିକ୍ ସମୟ ସୀମାରେ କାମ କରିବାକୁ ମଧ୍ୟ ନିଦ୍ଦେର୍ଶ ଦେଇଛନ୍ତି ସାଂସଦ । ଆଜି ଶିଳାନ୍ୟାସ ସମୟରେ ବୁକୁରାମୁଣ୍ଡା ସରପଞ୍ଚ ଅନିତା ଭୋଇ, ଟେମିରି ସରପଞ୍ଚ ଦିଲ୍ଲୀପ ବେହେରା, ଚାଷୀ ନେତା ଲିଙ୍ଗରାଜ ପ୍ରଧାନ, ପ୍ରମୋଦ ମେହେର, ନିଲାଂଚଲ ଦରୁଆନ୍, ବିମଳ ସାହୁ, ପରମାନନ୍ଦ ଭୋଇଙ୍କ ସମସ୍ତ କାର୍ଯ୍ୟକର୍ତ୍ତା, ପଂଚାୟତବାସୀ ଉପସ୍ଥିତ ଥିଲେ