ଆଗଲପୁର, (କେପିଏନ୍ଏସ୍) : ଝରଣୀପାଲି ପଞ୍ଚାୟତର କୁଦୋପାଲି- ସାଲେଡୁଙ୍ଗୁରି ଠାରେ ପଞ୍ଚାୟତ ସ୍ତରୀୟ ଆନ୍ତର୍ଜାତୀୟ ମହିଳା ଦିବସ ପାଳିତ ହୋଇଯାଇଛି ।ଏହି ଅବସରରେ ମହିଳା ସଭା ଓ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହେବା ସହିତ ମହିଳାଙ୍କ ସମ୍ବନ୍ଧୀୟ ସାମୁହିକ କୁଇଜ୍ ପ୍ରତିଯୋଗିତା ଆୟୋଜିତ ହୋଇଥିଲା । ଏଥିରେ ମହିଳା ମାନେ ଗୀତ ଗାଇବା ସହ ମହିଳା ଦିବସ ଉପରେ ବକ୍ତୃତା ପ୍ରଦାନ କରିଥିଲେ । ସମସ୍ତ ମହିଳାଙ୍କୁ ନେଇ ଚୌକିବସା ପ୍ରତିଯୋଗିତା ଆୟୋଜିତ ହୋଇଥିଲା । କୁଇଜ୍, ବକ୍ତୃତା ଏବଂ ଚୌକିବସା ପ୍ରତିଯୋଗିତାରେ ବିଜୟିନୀ ହୋଇଥିବା ମହିଳାମାନଙ୍କୁ ପୁରସ୍କୃତ କରାଯାଇଥିଲା । ଏଥିସହିତ ସମସ୍ତ ମହିଳାମାନେ ସାମୁହିକ ନାଚଗୀତରେ ମଜ୍ଜି ମନୋରଞ୍ଜନ କରିଥିଲେ । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସରପଞ୍ଚ ସୁନିତା ସାହୁ ଯୋଗ ଦେଇଥିବା ବେଳେ ଝରଣୀପାଲି ମହିଳା ସ୍ୱାସ୍ଥ୍ୟକର୍ମୀ ରେଖା ସ୍ୱାଇଁ, ଭରସୂଜା ମହିଳା ସ୍ୱାସ୍ଥ୍ୟକର୍ମୀ ପ୍ରଭାସିନୀ ପୁଟା ଏବଂ ଶୋଭାଗିନି ପୁଟା ଉପସ୍ଥିତ ଥିଲେ । ଅନ୍ୟମାନଙ୍କ ମଧ୍ୟରେ ପଞ୍ଚାୟତର ସମସ୍ତ ଅଙ୍ଗନୱାଡ଼ି ତଥା ଆଶା କର୍ମୀ ଏବଂ ଗ୍ରାମର ମହିଳା ମାନେ ଯୋଗ ଦେଇଥିଲେ ।