ରାଉରକେଲା, (ସସ୍ମିତା ପ୍ରଧାନ) : ସ୍ୱାଧୀନତାର ୭୫ ବର୍ଷ ପୂର୍ତ୍ତି ଉପଲକ୍ଷେ ଆଜାଦୀ କା ଅମୃତ ମହୋତ୍ସବ ସାରା ଦେଶରେ ପାଳିତ ହେଉଛି । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ୱାନ କ୍ରମେ ‘ହର୍ ଘର୍ ତ୍ରିରଙ୍ଗା’ କାର୍ଯ୍ୟକ୍ରମରେ ସାରା ଦେଶ ମଧ୍ୟ ସାମିଲ ହୋଇଛି । ଏହି ଅବସରରେ ‘ବହୁଜନ ହିତାୟ, ବହୁଜନ ସୁଖାୟ’ ମନ୍ତ୍ରରେ ମନ୍ତ୍ରିତ ଆକାଶବାଣୀ ରାଉରକେଲା ଏକ ଅଭିନବ ତଥା ଅଦ୍ଵିତୀୟ କାର୍ଯ୍ୟ କରିବାରେ ସଫଳ ହୋଇଛି । ସ୍ଥାନୀୟ ସେକ୍ଟର ୬ ସ୍ଥିତ ଦୁର୍ଗାପୁର ପାହାଡ଼ ଉପରେ ଅବସ୍ଥିତ ଏହାର ଟ୍ରାନ୍ସମିଟରଠାରେ ଥିବା ରେଡ଼ିଓ ଟାୱାରରେ ଜାତୀୟ ପତାକା ଉତ୍ତୋଳନ କରି ରାଉରକେଲାବାସୀଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇପାରିଛି । ସୂଚନା ଯୋଗ୍ୟ ଯେ, ୨୪ ଜୁନ୍ ୧୯୯୫ ମସିହାରେ ତତ୍କାଳୀନ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ କାମାକ୍ଷା ପ୍ରସାଦ ସିଂହଦେଓଙ୍କ କରକମଳରେ ଉଦ୍ଘାଟିତ ହୋଇଥିବା ଏହି ବେତାର କେନ୍ଦ୍ରର ଷ୍ଟୁଡ଼ିଓ ଜଗଦାଠାରେ ରହିଛି । ଏହି କେନ୍ଦ୍ରଟି ପ୍ରତିଷ୍ଠା ହେବା ଦିନଠାରୁ ସବୁବର୍ଗର ଶ୍ରୋତା ତଥା ସବୁଦିଗକୁ ଦୃଷ୍ଟିରେ ରଖି ସୂଚନା, ଶିକ୍ଷା, ସ୍ୱାସ୍ଥ୍ୟ, ପରିବେଶ, ସ୍ୱଚ୍ଛତା, କଳା, ସାହିତ୍ୟ, ସଂସ୍କୃତି, ଶିଳ୍ପ, ବିଜ୍ଞାନ, ମନୋରଞ୍ଜନ ତଥା ସରକାରଙ୍କର ବିଭିନ୍ନ ଯୋଜନା ଆଦି ବିଷୟରେ ଉନ୍ନତମାନର କାର୍ଯ୍ୟକ୍ରମମାନ ପ୍ରସାରଣ କରିଆସୁଛି ଏବଂ ଏହି ୬ କିଲୋୱାଟ କ୍ଷମତା ବିଶିଷ୍ଟ ଟ୍ରାନ୍ସମିଟର ଜରିଆରେ ଜନସାଧାରଣଙ୍କ ନିକଟରେ ପହଞ୍ଚି ପାରୁଛି । ଏହି ଟ୍ରାନ୍ସମିଶନ କେନ୍ଦ୍ରଠାରେ ଜାତୀୟ ପତାକାକୁ ଆକାଶବାଣୀ ରାଉରକେଲା କେନ୍ଦ୍ର ଯାନ୍ତ୍ରିକ ବିଭାଗର ମୁଖ୍ୟ ଇଞ୍ଜିନିଅର ମହମ୍ମଦ ସମିମ୍ ଉତ୍ତୋଳନ କରିଥିଲେ । ଉତ୍ତୋଳନ ହୋଇଥିବା ୨୦×୩୦ଫୁଟ ଆକାରର ଏହି ଜାତୀୟ ପତାକାଟିକୁ ଲୁଧିଆନାରୁ ଅଣାଯାଇ ବିଶେଷଜ୍ଞଙ୍କ ଦ୍ୱାରା ଟ୍ରାନ୍ସମିଟର ସ୍ଥିତ ରେଡ଼ିଓ ଟାୱାରରେ ଖଞ୍ଜାଯିବା ସହିତ ତିନିରଙ୍ଗର ଆଲୋକୀକରଣ ବ୍ୟବସ୍ଥା ମଧ୍ୟ କରାଯାଇଛି । ସୂଚନା ଯୋଗ୍ୟ ଯେ, ଏହା ସମୁଦ୍ର ପତନଠାରୁ ୬୧୭ ଫୁଟ ଉଚ୍ଚ ଦୁର୍ଗାପୁର ପାହାଡ଼ ସ୍ଥିତ ୪୭ ମିଟର ବିଶିଷ୍ଟ ରେଡ଼ିଓ ଟାୱାରରେ ଉତ୍ତୋଳନ ହୋଇଛି । ଏହି କାର୍ଯ୍ୟକ୍ରମରେ ଆକାଶବାଣୀ ରାଉରକେଲା କେନ୍ଦ୍ରର କାର୍ଯ୍ୟକ୍ରମ ମୁଖ୍ୟା ତଥା କାର୍ଯ୍ୟକ୍ରମ ନିଷ୍ପାଦିକା ଆଲ୍ହାଦିନୀ ହୋତା, ପ୍ରସାରଣ ନିଷ୍ପାଦକ ବସନ୍ତ କୁମାର ସ୍ୱାଇଁ, ବରିଷ୍ଠ ଉଦ୍ଘୋଷକ ରଘୁନନ୍ଦନ ଲାକ୍ରା, ଏକାଉଣ୍ଟାଣ୍ଟ ସିକନ୍ଦର ସଏ, ଯାନ୍ତ୍ରିକ ବିଭାଗର ସିନିଅର ଇଂଜିନିୟରିଂ ଆସିଷ୍ଟାଣ୍ଟ ମଞ୍ଜୁଳା ମିଶ୍ର, ହରିହର ନାୟକ, ଇଂଜିନିୟରିଂ ଆସିଷ୍ଟାଣ୍ଟ ବିଲଚାନ୍ଦ ମିଞ୍ଜ ଦେବାଶିଷ ଚକ୍ରବର୍ତ୍ତୀ, ନାରାୟଣ ପରମାଣିକ, ଚିତ୍ତରଞ୍ଜନ ଜେନା, ସୌଭାଗ୍ୟ ବାରିକ, ଦେବଯାନୀ ଚକ୍ରବର୍ତ୍ତୀ, ସନ୍ତୋଷ କୁମାର ଗୁପ୍ତା, ବିକାଶ ସାମଲ, ସତ୍ୟ ସାହୁ, ମିନାକ୍ଷୀ ନାୟକ, ନିରଞ୍ଜନ ତ୍ରିପାଠୀ, ଗିରିଶ ନାୟକ, ଶ୍ୟାମ ହାଁସଦା, ଦିଲ୍ଲୀପ ଖଡ଼ିରତ୍ନ, ବିକ୍ରମ ସାହୁ, ସୁରେଶ ସିଂହ, ଶ୍ୟାମ ଚରଣ ଯାଦବ ଏବଂ ବିତ୍ତ ଓ ପ୍ରଶାସନ ବିଭାଗର ରମେଶ ବାଡ଼ାଇକ୍, ସ୍ଵର୍ଣ୍ଣଲତା ହେମ୍ରମ, ନିରଞ୍ଜନ ମୁଣ୍ଡାରୀ, ଉଦ୍ଘୋଷକ ଅଶୋକ କୁମାର ରାଉତ, ଉପସ୍ଥାପିକା ଶୁଚିସ୍ମିତା ପ୍ରଧାନ ପ୍ରମୁଖ ଉପସ୍ଥିତ ଥିଲେ । ଅନୁଷ୍ଠିତ ଏହି କାର୍ଯ୍ୟକ୍ରମ ପରିଚାଳନାରେ ଆକାଶବାଣୀ ରାଉରକେଲାର କାର୍ଯ୍ୟକ୍ରମ ବିଭାଗ, ଯାନ୍ତ୍ରିକ ବିଭାଗର କର୍ମଚାରୀଙ୍କ ସମେତ ସୁରକ୍ଷା ବିଭାଗ କର୍ମଚାରୀ ସହଯୋଗ କରିଥିଲେ ।