ଦେଓଗାଁ, (ମନୀଷ କୁମାର ସାହୁ) : ଦେଓଗାଁ ବ୍ଲକର ୨ ଜଣ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଏବଂ ୩ ଜଣ ହାଇସ୍କୁଲ ଶିକ୍ଷକ ରବିବାର ଦିନ ଅବସର ଗ୍ରହଣ କରିଛନ୍ତି । ପରୁଆଭାଡ଼ି ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ସୁଧିର ଦେଓ, ସାଗରପାଲି ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଜୋସ୍ନା ଦାଶ ଅବସର ଗ୍ରହଣ କରିଛନ୍ତି । ସେହିପରି ଦେଓଗାଁ ହାଇସ୍କୁଲର ସଂସ୍କୃତ ଶିକ୍ଷକ ଚୈତନ୍ୟ ସାହୁ, ଜରାସିଂହା ହାଇସ୍କୁଲର ହିନ୍ଦୀ ଶିକ୍ଷକ ବ୍ରଜକିଶୋର ରଣା ଓ ଅର୍ଜୁନପୁର ହାଇସ୍କୁଲର ହିନ୍ଦୀ ଶିକ୍ଷକ ଡିଙ୍ଗର ରାଉତ ମଧ୍ୟ ଅବସର ଗ୍ରହଣ କରିଥିବା ବ୍ଲକ ଶିକ୍ଷା କାର୍ଯ୍ୟାଳୟରୁ ଜଣାପଡ଼ିଛି । ଦେଓଗାଁ ହାଇସ୍କୁଲର ଶିକ୍ଷକ ଶ୍ରୀ ସାହୁ ଦୀର୍ଘ ୩୫ ବର୍ଷ ଧରି କେବଳ ଦେଓଗାଁ ହାଇସ୍କୁଲରେ ରହିଥିବା ବେଳେ ଅର୍ଜୁନପୁର ହାଇସ୍କୁଲର ଶିକ୍ଷକ ଶ୍ରୀ ରାଉତ ମଧ୍ୟ ଦୀର୍ଘ ୩୮ ବର୍ଷ ଓ ଶ୍ରୀ ରଣା ଦୀର୍ଘ ୧୩ବର୍ଷ ହେଲା ସ୍କୁଲରେ ଥିଲେ । ପ୍ରାଥମିକ ବିଦ୍ୟାଳୟର ୨ ଜଣ ଶିକ୍ଷକ ଓ ହାଇସ୍କୁଲ ସ୍ତରରେ ୩ ଜଣ ଶିକ୍ଷକ ପଦବୀ ଖାଲି ହୋଇଛି । ପ୍ରାଥମିକ ବିଦ୍ୟାଳୟର ୨ ଜଣ ଶିକ୍ଷକଙ୍କ ଅବସର ଗ୍ରହଣ ପରେ ଦେଓଗାଁ ବ୍ଲକରେ ପ୍ରାଥମିକ ସ୍ତରରେ ୧୦୫ ଜଣ ଶିକ୍ଷକଙ୍କ ପଦବୀ ଖାଲି ରହିଥିବା ଜଣାପଡ଼ିଛି । ଏହି ଅବସରରେ ସଂପୃକ୍ତ ଶିକ୍ଷକମାନଙ୍କୁ ବିଦାୟକାଳୀନ ସମ୍ବର୍ଦ୍ଧନା ଦିଆଯାଇଥିଲା । ଦୀର୍ଘ ବର୍ଷ ପର୍ଯ୍ୟନ୍ତ ସ୍କୁଲରେ ଶିକ୍ଷକତା କରିଥିବା ବେଳେ ଅବସର ଗ୍ରହଣ କରିଥିବାରୁ ଶିକ୍ଷାପ୍ରେମୀ ମହଲରେ ମୁଖ୍ୟ ଆଲୋଚନାର ବିଷୟ ହୋଇପଡ଼ିଛି ।