ମୁନିଗୁଡା, (ରମାକାନ୍ତ ପଡ଼ାଲ) : ଗତ ୯ ତାରିଖ ଦିନ ବାଟାଲିୟନ ପକ୍ଷରୁ ଡିମିରିଗୁଡ଼ା କ୍ୟାମ୍ପସରେ ସିଆରପିଏଫ୍ କମାଣ୍ଡେଣ୍ଟ ଫିରୋଜ କୁଜୁରଙ୍କ ନିର୍ଦ୍ଦେଶରେ ମହୁମାଛି ଚାଷ ଓ ମହମବତି ତିଆରି ପାଇଁ ମହିଳାମାନଙ୍କୁ ପ୍ରଶିକ୍ଷଣ ଦିଆଯାଇଥିବା ବେଳେ ଆଜି ଡେପୁଟି କମାଣ୍ଡେଣ୍ଟ ମୁକେଶ ସିଂ ଓ ଚତୁର୍ଥ ବାହିନୀ କମ୍ପାନୀ କମାଣ୍ଡର ରାମକେସ ମୀନାଙ୍କ ଉପସ୍ଥିତିରେ ମହିଳାମାନଙ୍କୁ ଉତ୍ସାହିତ କରିବା ପାଇଁ ଉପକରଣମାନ ପ୍ରଦାନ କରାଯାଇଛି । ରାୟଗଡ଼ା ଜିଲ୍ଲା ମୁନିଗୁଡା ବ୍ଲକ ଅନ୍ତର୍ଗତ ଡିମିରିଗୁଡ଼ା ଠାରେ ଥିବା ବି.କମ୍ପାନୀ ଚତୁର୍ଥ ବାଟାଲିୟନଙ୍କ ଦ୍ୱାରା ଜନ ସମ୍ପର୍କ କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ଡେପୁଟି କମାଣ୍ଡେଣ୍ଟ ମୁକେଶ ସିଂ ଓ ଚତୁର୍ଥ ବାହିନୀ କମ୍ପାନୀ କମାଣ୍ଡର ରାମକେସ ମୀନା ଉପସ୍ଥିତ ରହିଥିଲେ । ଏହି ଜନ ସମ୍ପର୍କ କାର୍ଯ୍ୟକ୍ରମରେ ଚତୁର୍ଥ ବାଟାଲିୟନ ଦ୍ଵାରା ଅଞ୍ଚଳର ଗରିବ ଓ ଅସହାୟ ଲୋକଙ୍କୁ ସ୍ୱାବଲମ୍ବୀ କରିବା ପାଇଁ ବିଭିନ୍ନ ଉପକରଣ ପ୍ରଦାନ କରାଯାଇଥିଲା । କାର୍ଯ୍ୟକ୍ରମରେ ରାଘୁବାରୀ, ଦୋରାଗାଁ, ଭାଲିଆପଦର, ଟିକରପଡା, ଡେମାପଦର ଗ୍ରାମର ମହିଳା ଗୋଷ୍ଠୀଙ୍କୁ ମହୁମାଛି ଚାଷ ନିମନ୍ତେ ମହୁମାଛି ରହିବା ବାସ୍କ ଓ ଡିମିରିଗୁଡ଼ା ମହିଳା ଗୋଷ୍ଠୀଙ୍କୁ ମହମବତି ତିଆରି ପାଇଁ ଉପକରଣ ସହ କଞ୍ଚାମାଲ ଯୋଗାଇ ଦିଆଯାଇଛି । ଏସ୍ଆଇ ସୁନାକର ଜେନା, ଏସ୍ଆଇ ରାମ ସିଂ, ଏସ୍ଆଇ ଅକ୍ଷୟ କୁମାର ଓ ସୁନୀଲ କୁମାର, ଡିମିରିଗୁଡା ସରପଞ୍ଚ ଚୁମୁଲି ମାଝୀ, ରଘୁବାରି ସରପଞ୍ଚ ନାଉଙ୍ଗା ମାଝୀ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହାୟତା କରିଥିବା ବେଳେ ଚତୁର୍ଥ ବାଟାଲିୟର ସମସ୍ତ କର୍ମଚାରୀ ଉପସ୍ଥିତ ରହି ସହଯୋଗ କରିଥିଲେ ।