● ଚେନ୍ନାଇରେ ଅଶ୍ୱିନୀ ବୈଷ୍ଣବଙ୍କ ଦ୍ୱାରା ଭାରତୀୟ କମ୍ପାନୀ ସିର୍ମା ଏସ୍.ଜି.ଏସ୍.ର ଅତ୍ୟାଧୁନିକ ଲାପଟପ୍ ଆସେମ୍ବ୍ଲି ଲାଇନ ଉଦ୍ଘାଟିତ
● ପିଏଲ୍ଆଇ-୨ର ୧୮ମାସର ସ୍ୱଳ୍ପ ସମୟ ମଧ୍ୟରେ ତାମିଲନାଡ଼ୁରେ ପ୍ରଥମ ୟୁନିଟ୍ ଆରମ୍ଭ ହୋଇଛି; “ମେଡ୍ ଇନ୍ ଇଣ୍ଡିଆ” ଲାପଟପ ଉତ୍ପାଦନ ଆରମ୍ଭ
● ଆତ୍ମନିର୍ଭର ଭାରତ ଲକ୍ଷ୍ୟକୁ ଆଗକୁ ବଢ଼ାଇବା ଲାଗି ଇଲେକ୍ଟ୍ରୋନିକ୍ ଉପାଦାନ ଇକୋସିଷ୍ଟମର ସ୍ୱଦେଶୀ ବିକାଶ ପାଇଁ କେନ୍ଦ୍ର ମନ୍ତ୍ରୀଙ୍କ ଆହ୍ୱାନ
● କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟର ସହାୟତାରେ, ତାମିଲନାଡ଼ୁ ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ରରେ ଏକ କେନ୍ଦ୍ରସ୍ଥଳୀ ଭାବେ ଉଭା ହୋଇଛି, ଯାହା ୧ ଲକ୍ଷ ୩୦ ହଜାର କୋଟି ଟଙ୍କାର ଉତ୍ପାଦନ ଏବଂ ଭାରତର ରପ୍ତାନୀର ୩୦ ପ୍ରତିଶତକୁ ପରିଚାଳିତ କରୁଛି
● ପିଏଲଆଇ-୨ ଭାରତର ଆଇ.ଟି. ହାର୍ଡୱେର୍ ବିପ୍ଳବକୁ ଇନ୍ଧନ ଯୋଗାଉଛି : ୧୮ ମାସରେ ୧୦ ହଜାର କୋଟି ଟଙ୍କାର ଉତ୍ପାଦନ ଏବଂ ୩,୯୦୦ ନିଯୁକ୍ତି ସୃଷ୍ଟି ହୋଇଛି
ନୂଆଦିଲ୍ଲୀ, (ପିଆଇବି) : ଭାରତର ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ର ପାଇଁ ଏକ ଯୁଗାନ୍ତକାରୀ ଘଟଣାକ୍ରମରେ କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି, ରେଳ, ସୂଚନା ଏବଂ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ ଚେନ୍ନାଇରେ ସିର୍ମା ଏସ୍ଜିଏସ୍ ଟେକ୍ନୋଲୋଜିର ଅତ୍ୟାଧୁନିକ ଲାପଟପ୍ ଆସେମ୍ବ୍ଲି ଲାଇନକୁ ଉଦ୍ଘାଟନ କରିଛନ୍ତି । ମାଡ୍ରାସ ଏକ୍ସପୋର୍ଟ ପ୍ରୋସେସିଂ ଜୋନ୍ (ଏମ୍ଇପିଜେଡ୍)ରେ ଅବସ୍ଥିତ ଏହି ନିର୍ମାଣ କେନ୍ଦ୍ର ଭାରତର ‘ମେକ୍ ଇନ୍ ଇଣ୍ଡିଆ’ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନକୁ ଚିହ୍ନିତ କରିବା ସହିତ ମୋବାଇଲ୍ ଫୋନରୁ ଆଇଟି ହାର୍ଡୱେର୍ ଉତ୍ପାଦନ, ବିଶେଷ କରି ଲାପଟପ୍ ପର୍ଯ୍ୟନ୍ତ ଦେଶର ପ୍ରାଧାନ୍ୟ ବିସ୍ତାର କରିବାକୁ ଯାଉଛି ।
“ମେକ ଇନ୍ ଇଣ୍ଡିଆ”ରେ ଏକ ମାଇଲଖୁଣ୍ଟ
ନୂତନ ଆସେମ୍ବ୍ଲି ଲାଇନ ପ୍ରାରମ୍ଭରେ ବାର୍ଷିକ ୧ ଲକ୍ଷ ଲାପଟପ୍ ଉତ୍ପାଦନ କରିବ, ଯାହା ଆଗାମୀ ୧-୨ ବର୍ଷ ମଧ୍ୟରେ ୧୦ ଲକ୍ଷ ନିୟୁତ ୟୁନିଟ୍ ପର୍ଯ୍ୟନ୍ତ ସମ୍ପ୍ରସାରଣ କ୍ଷମତା ସହିତ ସିର୍ମା ଏସ୍ଜିଏସ୍ ବର୍ତ୍ତମାନ ଚେନ୍ନାଇରେ ଚାରୋଟି ଉତ୍ପାଦନ ୟୁନିଟ୍ ପରିଚାଳନା କରୁଛି, ଏହାର ୟୁନିଟ୍ ୩ ବର୍ତ୍ତମାନ ଲାପଟପ୍ ଉତ୍ପାଦନ ଆରମ୍ଭ କରିଛି । ଉଦ୍ଘାଟନୀ ଉତ୍ସବରେ ଉଦବୋଧନ ଦେଇ ଅଶ୍ୱିନୀ ବୈଷ୍ଣବ କହିଥିଲେ, “ଆଗାମୀ ସମୟରେ ଇଲେକ୍ଟ୍ରୋନିକ୍ କମ୍ପୋନେଣ୍ଟ୍ ଇକୋସିଷ୍ଟମ୍ ମଧ୍ୟ ବିକଶିତ ହେବା ସୁନିଶ୍ଚିତ କରିବା ପାଇଁ ଆମକୁ ସୂକ୍ଷ୍ମତାର ସହ କାର୍ଯ୍ୟ କରିବାକୁ ପଡ଼ିବ । ଏହା କେବଳ ଭାରତ ପାଇଁ ଏକ ପ୍ରମୁଖ ଅଭିବୃଦ୍ଧି କାହାଣୀକୁ ଆଗେଇ ନେବ ନାହିଁ, ବରଂ ଆମର ଆତ୍ମନିର୍ଭରଶୀଳ ଭାରତର ଦୃଷ୍ଟିକୋଣ, ଆତ୍ମନିର୍ଭରଶୀଳତାକୁ ପ୍ରୋତ୍ସାହିତ କରିବା ଏବଂ ବିଶ୍ୱ ଇଲେକ୍ଟ୍ରୋନିକ୍ସ ଉତ୍ପାଦନ ପରିଦୃଶ୍ୟରେ ଆମର ସ୍ଥିତିକୁ ମଜବୁତ କରିବ । ଆଇ.ଟି. ହାର୍ଡୱେର୍ ପାଇଁ ପି.ଏଲ୍.ଆଇ. ୨ ଯୋଜନାର ଅଂଶବିଶେଷ ଭାବେ ଏହି ପଦକ୍ଷେପ ଉଚ୍ଚମୂଲ୍ୟର ଇଲେକ୍ଟ୍ରୋନିକ୍ସ ଉତ୍ପାଦନରେ ଭାରତର ବୃଦ୍ଧି ପାଉଥିବା ସାମର୍ଥ୍ୟ ଉପରେ ଆଲୋକପାତ କରୁଛି ଏବଂ ଆଇ.ଟି. ହାର୍ଡୱେର କ୍ଷେତ୍ରରେ ଦେଶର ଆତ୍ମନିର୍ଭରଶୀଳତାକୁ ସୁଦୃଢ଼ କରୁଛି ।
ଆସେମ୍ବ୍ଲି ଲାଇନର ମୁଖ୍ୟାଂଶ
ବିଶ୍ୱ ଭାଗିଦାରୀ : ସିର୍ମା ଏସ୍.ଜି.ଏସ୍. ତାଇୱାନର ଏକ ଅଗ୍ରଣୀ ଟେକ୍ନୋଲୋଜି କମ୍ପାନୀ ମାଇକ୍ରୋ-ଷ୍ଟାର୍ ଇଣ୍ଟରନ୍ୟାସନାଲ (ଏମ୍.ଏସ୍.ଆଇ.) ସହ ଭାଗିଦାରୀ କରିଛି, ଯାହା ଉଭୟ ଘରୋଇ ଓ ବିଶ୍ୱ ବଜାରର ଚାହିଦା ପୂରଣ କରିପାରୁଥିବା ଉଚ୍ଚମାନର ଲାପଟପ ଭାରତରେ ଉତ୍ପାଦନ କରିବ । ସ୍ଥାନୀୟ ଅର୍ଥବ୍ୟବସ୍ଥାକୁ ପ୍ରୋତ୍ସାହନ: ଏହି ସୁବିଧା ଦ୍ୱାରା ଆର୍ଥିକ ବର୍ଷ ୨୦୨୬ ସୁଦ୍ଧା ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ରରେ ସ୍ୱତନ୍ତ୍ର ବର୍ଗର ନିଯୁକ୍ତି ସୃଷ୍ଟି ହେବ ବୋଲି ଆକଳନ କରାଯାଇଛି, ଯାହା ଉଭୟ ତାମିଲନାଡ଼ୁ ଏବଂ ଭାରତର ଜାତୀୟ ଅର୍ଥବ୍ୟବସ୍ଥା ଉପରେ ଯଥେଷ୍ଟ ପ୍ରଭାବ ପକାଇବ । ଏହି ଭୂମିକା ଗୁଡ଼ିକ ଏକ ସୁଦୂରପ୍ରସାରୀ ପ୍ରଭାବ ପକାଇବ ବୋଲି ଆଶା କରାଯାଉଛି, ଯାହା ଏହି କ୍ଷେତ୍ରରେ ଭବିଷ୍ୟତର ଶ୍ରମଶକ୍ତିକୁ ରୂପ ଦେବ ଏବଂ ବୃଦ୍ଧି କରିବ ।
ବିଶ୍ୱସ୍ତରୀୟ ମାନଦଣ୍ଡ : ଉତ୍ପାଦିତ ଲାପଟପଗୁଡ଼ିକ ଆନ୍ତର୍ଜାତୀୟ ମାନର ମାନଦଣ୍ଡ ପୂରଣ କରିବ, ଯାହା ଭାରତର ବିକଶିତ ବୈଷୟିକ ଏବଂ ଉତ୍ପାଦନ ଦକ୍ଷତାକୁ ପ୍ରଦର୍ଶିତ କରିବ ।
ଭାରତର ବର୍ଦ୍ଧିତ ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ର
ଭାରତର ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ର ଗତ ଦଶନ୍ଧି ମଧ୍ୟରେ ଦ୍ରୁତ ଗତିରେ ବୃଦ୍ଧି ପାଇଛି, ଯାହାର ମୋଟ ଉତ୍ପାଦନ ୨୦୧୪ ରେ ୨.୪୦ ଲକ୍ଷ କୋଟି ଟଙ୍କାରୁ ୨୦୨୪ ରେ ୯.୮ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି । ୨୦୨୪ ମସିହାରେ ୧.୫୦ ଲକ୍ଷ କୋଟି ଟଙ୍କାର ରପ୍ତାନୀ ସହିତ, କେବଳ ମୋବାଇଲ ଉତ୍ପାଦନ ୪.୪ ଲକ୍ଷ କୋଟି ଟଙ୍କା ଛୁଇଁଛି । ଭାରତରେ ବ୍ୟବହୃତ ହେଉଥିବା ମୋଟ ମୋବାଇଲ ଫୋନର ୯୮ ପ୍ରତିଶତ ଏବେ ଭାରତରେ ନିର୍ମିତ ହେଉଛି ଏବଂ ସ୍ମାର୍ଟ ଫୋନ ଭାରତର ଚତୁର୍ଥ ସର୍ବବୃହତ୍ ରପ୍ତାନୀ ସାମଗ୍ରୀ ହୋଇପାରିଛି ।
ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ (ଏମ୍ଇଆଇଟିୱାଇ) ର ବିଭିନ୍ନ ଯୋଜନା ଅଧୀନରେ ତାମିଲନାଡ଼ୁରେ ୪୭ ରୁ ଅଧିକ ଉତ୍ପାଦନ ୟୁନିଟ୍ ପ୍ରତିଷ୍ଠା ହୋଇଛି । ବୃହତ ଇଲେକ୍ଟ୍ରୋନିକ୍ସ ଉତ୍ପାଦନ ପାଇଁ ଉତ୍ପାଦନ ସଂଯୁକ୍ତ ପ୍ରୋତ୍ସାହନ (ପିଏଲ୍ଆଇ) ଯୋଜନାର ସବୁଠାରୁ ବଡ଼ ହିତାଧିକାରୀଙ୍କ ମଧ୍ୟରୁ ଏହି ରାଜ୍ୟ ଅନ୍ୟତମ, ପିଏଲ୍ଆଇ-୨ ଅଧୀନରେ ଅନୁମୋଦିତ ୨୭ଟି ୟୁନିଟ୍ ମଧ୍ୟରୁ ସାତଟି ଏଠାରେ ଅବସ୍ଥିତ । ଏହି ପଦକ୍ଷେପ ଅଧୀନରେ ପ୍ରଥମ ୟୁନିଟ୍ ଗତକାଲି ଉଦଘାଟିତ ହୋଇଥିଲା । ସିର୍ମା ଏସ୍.ଜି.ଏସ୍.ର ଲାପଟପ୍ ଆସେମ୍ବ୍ଲି ଲାଇନର ଉଦ୍ଘାଟନ ଭାରତର ଇଲେକ୍ଟ୍ରୋନିକ୍ସ ଯାତ୍ରାରେ ଏକ ନୂତନ ଅଧ୍ୟାୟକୁ ଚିହ୍ନିତ କରିବା ସହିତ ଆମଦାନୀ ଉପରେ ନିର୍ଭରଶୀଳତା ହ୍ରାସ, ନିଯୁକ୍ତି ସୁଯୋଗ ବୃଦ୍ଧି ଏବଂ ବିଶ୍ୱ ସ୍ତରୀୟ ଉତ୍ପାଦନ କ୍ଷମତା ପାଇଁ ମାର୍ଗ ପ୍ରଶସ୍ତ କରିଛି । ଏହି ସୁବିଧା ଦ୍ୱାରା ଉତ୍ପାଦନ ବୃଦ୍ଧି ପାଇବା ସହିତ, ଭାରତ ଆଇ.ଟି. ହାର୍ଡୱେର୍ ଉତ୍ପାଦନରେ ବିଶ୍ୱର ଅଗ୍ରଣୀ ହେବାକୁ ପ୍ରସ୍ତୁତ । ଆଇଟି ହାର୍ଡୱେର୍ ପାଇଁ ୨୯ ମେ ୨୦୨୩ରେ ଆରମ୍ଭ ହୋଇଥିବା ଉତ୍ପାଦନ ସଂଯୁକ୍ତ ପ୍ରୋତ୍ସାହନ (ପିଏଲ୍ଆଇ)-୨ ଯୋଗ୍ୟ କମ୍ପାନୀମାନଙ୍କୁ ୫ପ୍ରତିଶତ ପ୍ରୋତ୍ସାହନ ପ୍ରଦାନ କରି ଭାରତର ଇଲେକ୍ଟ୍ରୋନିକ୍ସ ଉତ୍ପାଦନ ଇକୋସିଷ୍ଟମକୁ ଆହୁରି ମଜବୁତ କରିବାକୁ ଲକ୍ଷ୍ୟ ରଖିଛି । ଏହି ଯୋଜନାରେ ଲାପଟପ୍, ଟାବଲେଟ୍, ଅଲ୍-ଇନ୍-ୱାନ୍ ପିସି, ସର୍ଭର୍ ଏବଂ ଅତି ଛୋଟ ଫର୍ମ ଫ୍ୟାକ୍ଟର୍ ଡିଭାଇସ୍ ଭଳି ଉତ୍ପାଦ ସାମିଲ ରହିଛି । ୩ ହଜାର କୋଟି ଟଙ୍କାର ଆନୁମାନିକ ନିବେଶ ସହିତ ପି.ଏଲ୍.ଆଇ. ୨.୩ ଲକ୍ଷ ୫୦ ହଜାର କୋଟି ଟଙ୍କାର ଉତ୍ପାଦନ କରିବ ଏବଂ ସାରା ଦେଶରେ ୪୭ ହଜାର ନିଯୁକ୍ତି ସୃଷ୍ଟି କରିବ ବୋଲି ଆଶା କରାଯାଉଛି । ଏହି ଯୋଜନା ୫୨୦ କୋଟି ଟଙ୍କାର ମୋଟ ନିବେଶ, ୧୦ ହଜାର କୋଟି ଟଙ୍କାର ଉତ୍ପାଦନ ଏବଂ ୩ ହଜାର ନିଯୁକ୍ତି ସୃଷ୍ଟି (ଡିସେମ୍ବର ୨୦୨୪ ସୁଦ୍ଧା) ସହିତ ଉଲ୍ଲେଖନୀୟ ଅଗ୍ରଗତି ହାସଲ କରିସାରିଛି ।