ବିଜେପି ଏକ ମୁସଲମାନ ବିରୋଧୀ ଦଳ ନୁହେଁ, କିନ୍ତୁ ଦେଶର ଶତ୍ରୁମାନଙ୍କୁ ଚିହ୍ନିବା ଗୁରୁତ୍ୱପୂର୍ଣ୍ଣ : ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲ
ଦିଶପୁର : ଆସାମର ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି ଯେ ବିଜେପି ମୁସଲମାନ ବିରୋଧୀ ଦଳ – ଏହା ଏକ ମିଥ୍ ମାତ୍ର । ସେ କହିଛନ୍ତି ଯେ ଦଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସ୍ଲୋଗାନ ‘ସବକା ସାଥ, ସବକା ବିକାଶ, ସବକା ବିଶ୍ୱାସ’ ଅନୁସରଣ କରୁଛି ଏବଂ ରାଜ୍ୟର ଯେକୌଣସି ସ୍ଥାନରେ ସରକାରୀ ଯୋଜନାର ଲାଭରେ କୌଣସି ବ୍ୟକ୍ତିଙ୍କୁ ବାରଣ କରାଯାଇ ନାହିଁ ।
ଗଣମାଧ୍ୟମକୁ ଦେଇଥିବା ଏକ ସାକ୍ଷାତକାରରେ ୫୯ ବର୍ଷିୟ ସୋନୋୱାଲ କହିଛନ୍ତି, “ଆମେ ଗଣତନ୍ତ୍ରର ଆତ୍ମା ଏବଂ ଧର୍ମନିରପେକ୍ଷତାର ନୀତି ବଜାୟ ରଖିଛୁ । କିନ୍ତୁ ଆମକୁ ଦେଶର ଶତ୍ରୁମାନଙ୍କୁ ଚିହ୍ନଟ କରିବାକୁ ପଡିବ । ଆମେ ଏପରି ଶକ୍ତିକୁ କେବେବି ଅନୁମତି ଦେବୁ ନାହିଁ ଯାହା କେବଳ ଦେଶ ପାଇଁ ବିପଦ ନୁହେଁ, ବରଂ ଆମର କଳା, ସଂସ୍କୃତି, ଭୂମି ଏବଂ ଭାଷା ପାଇଁ ମଧ୍ୟ ବିପଦ ।” ସୂଚନାଯୋଗ୍ୟ ଯେ, ଆଗାମୀ ଆସାମ ବିଧାନସଭା ନିର୍ବାଚନ ପାଇଁ ସୋନୋୱାଲ ନାମାଙ୍କନ ଦାଖଲ କରିଛନ୍ତି ।